Aznakajevo

Aznakajevo
Азнакаево (ven.)
Азнакай (tot.)
Lidnanznam;	Flag;
Valdkund	Venäma
Eläjiden lugu (2021)	34,750 ristitud
Pind	15 km²
Pämez'	Marsel' Šaidullin; (reduku 2012—)
Telefonkod	+7−85 592-xx-xxx
Avtokod	16, 116, 716
Aigvö	UTC+3 (MSK+0)

Aznakajevo (tot.: Азнака́й / Aznaqay, ven.: Азнака́ево) om Venäman lidn da lidnankund Tatarstanan Tazovaldkundan suvipäivnouzmas. Se om Aznakajevon rajonan administrativine keskuz da üks'jäine lidn.

Istorii

Eländpunktan aluz om pandud vl 1762 kuti baškiralaižiden külä, oli mülünu Samaran i Ufan gubernijoihe. Vspäi 1920 mülüi Tatarstanan Bugul'man rajonha, vn 1931 redukuspäi om Aznakajevon rajonan keskuseks. Žilo sai lidnan statusad vl 1987.

Vspäi 1951 sadas kivivoid lidnan ümbrištos. Aznakajevon toine tegimišt om «Neftemaš»-tegim^[1] (kivivoinmašiništon tehmine, specavtod, mobiližed i modul'pertid), sömtegimišt, omblendfabrik.

Geografijan andmused

Lidn sijadase Stärle-jogen randoil (tot.: Стәрле 53 km pitte, Ik-jogen hura ližajogi, Kaman hurapol'ne bassein), 180 m ü.m.t. keskmäižel korktusel.

Matkad Kazanihesai om 270 km lodeheze orhal vai 325 km avtotedme. Lähembaižed avtoteidme lidnad oma Oktäbr'skii 59 km suvipäivnouzmha, Bugul'm 43 km suvhe (lähembaine lendimport), Leninogorsk 57 km suvipäivlaskmha i Al'met'jevsk 55 km päivlaskmha.

Tobmuz

Aznakajevo om lidnankundan üks'jäižeks eländpunktaks.

Lidnankundan tobmuden pämez' om Lidnan nevondkundan ezimez'. Lidnan Radonoigendajan komitetan ohjandai om El'vir Gabdrahmanov vn 2021 sulakuspäi. Edeline komitetan ohjandai om Marat Sultanov (eloku 2017 — keväz'ku 2021).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 34 853 ristitud, rajonan ristitišton viž ühesandest, vn 2021 — 34 750 ristitud. Kaik 34 863 eläjad oli lidnas vl 2017. Kaikiš suremb lidnan ristitišt oli 37 200 eläjad vl 2001.

Islaman kaks' pühäpertid oma avaitud. Ortodoksižen hristanuskondan koume pühäperid^[2] oma saudud lidnas: Veran, Nadeždan, Lübovin i heiden Sofija-maman jumalanpert' (om letud vll 2012−2021), Kazanin Jumalanmaman loičendpert' i Sündun Eläbzdusen časoun'.

Lapsiden opendusen aluzkundad oma ühesatoštkümne nimitadud i nomeruidud päivkodid (kaks' nomerad 1, 2..6, 8..10, 12..16, 18..21), kahesa keskškolad (nomer 1..3, 5..9), licei (nomer 4), lidnan gimnazii, škol lapsiden täht tervhuden röunatud voimusidenke, lapsiden sädamižen keskuz, norišton keskuz, čomamahtoiden škol, lapsiden da norišton Jubileinii-sportškol. Ei ole ičeze professionaližen opendusen aluzkundoid, Leninogorskan politehnižen kolledžan filial radab.

Transport

Avtobusad (nell' maršrutad) da taksid oma kundaližeks transportaks lidnas. Ühtenzoitase avtobusoil aglomeracijan toižidenke lidnoidenke.

Lähembaine Jutaz-raudtestancii (tot.: Ютазы / Yutazı, ven.: Ютаза) sijadase 34 km suvhe.

Homaičendad

↑ Aznakajevon «Neftemaš»-tegimen sait (aznk.ru). (ven.)
↑ Aznakajevon pühäpertid sobory.ru-saital. (ven.)

Irdkosketused

Lidnan da Aznakajevon rajonan sait (aznakayevo.tatarstan.ru) Tatarstanan Tazovaldkundan tobmuden portalal. (ven.) (tot.)

Aznakajevo Vikiaitas

	Tatarstanan Tazovaldkundan lidnad
	Agriz \| Al'met'jevsk \| Arsk \| Aznakajevo \| Bavli \| Bolgar \| Bugul'm \| Buinsk \| Čistopol' \| Innopolis \| Jarčalli \| Jelabug \| Kazan' \| Kukmor \| Laiševo \| Leninogorsk \| Mamadiš \| Mendelejevsk \| Menzelinsk \| Nižnekamsk \| Nurlat \| Zainsk \| Zelenodol'sk \| Tetüši

[1] Aznakajevon «Neftemaš»-tegimen sait (aznk.ru). (ven.)

[2] Aznakajevon pühäpertid sobory.ru-saital. (ven.)

[1]

[2]