Šebekino

Šebekino
Шебекино

Lidnanznam	Flag
Valdkund	Venäma
Eläjiden lugu (2021)	39,680 ristitud
Pind	40,55 km²
Telefonkod	+7−47 248-xx-xxx
Avtokod	31
Aigvö	UTC+3 (MSK+0)

Šebekino (ven.: Шебе́кино) om Venäman valdkundröunanverine lidn Belgorodan agjas. Se om Šebekinon lidnümbrikon (edel vn 2018 sulakud — rajonan) administrativine keskuz da üks'jäine lidn.

Istorii

Eländpunkt mainitase ezmäižen kerdan vl 1713 kuti Šebeko-alapolknikan manmehiden külä. Vspäi 1928 oli Šebekinon rajonan keskuseks. Vn 1938 16. päiväl tal'vkud radnikžilo sai lidnan statusad. Vozil 1942 (14. kezaku) — 1943 (9. uhoku) lidn oli nacistižen Germanijan okkupacijan al. Mülütihe rajonha vl 2006. Vll 2004−2018 Šebekino oli lidnankundaks.

Šebekinon ižandusen päsarakod oma himine (ezmäine kodihimijan tegim NSTÜ:s), mašinansauvomine (mašiništ sömtegimišton täht), sauvondmaterialiden tehmine (niiden kombinat, melan, asfal'tan, raudbetonan i čomitandmaterialoiden tegimed), sömtegimišt (voitegim, konservtegim, makaroniž-konditerine edheotand), om sötken tegimid. Edel Redukun revolücijad mugažo järed saharantegim, nahktegim, etilspirtan tegim, savičuntegim i hebonvodindan ferm radoiba Šebekinos da läz sidä.

Geografijan andmused

Šebekinon ümbrikon sijaduz agjas vn 2010 kartal

Lidn sijadase ümbrikon suvipäivlaskmas, Nežegol'-jogen randoil (ven.: Не́жеголь 75 km pitte, Severskii Doncan hura ližajogi), Severskii Doncan randpolel, 110 m korktusel valdmeren pindan päl.

Matkad Belgorodhasai om koumekümne kilometrad lodeheze, Ukrainan valdkundröun om viž kilometrad suvhe. Lähembaine lidn om Har'kovan agjan Volčansk (ukr.: Вовчанськ) 10 km suvhe.

Tobmuz

Lidnankundan jäl'gmäine pämez' om Dmitrii Pisklov (tal'vku 2017 — reduku 2019). Vn 2019 redukus lidnan erigoittud Administracii om likvidiruidud.

Eläjad

Vn 2010 Venäman rahvahanlugemižen mödhe lidnan da lidnankundan eläjiden lugu oli 44 279 ristitud, rajonan pol', vn 2021 lidnan — 39 680 ristitud. Kaik 42 465 eläjad oli lidnas vl 2017. Kaikiš suremb lidnan ristitišt oli läz 45 tuhad eläjid vozil 1989−2009.

Ortodoksižen hristanuskondan nell' jumalanpertid oma letud lidnas: Jumalanmaman «Kaikiden gorähižiden ihastuz»-jumalaižen (2004−2006), Phh. Kosma da Damian Rimalaižiden (1991−1996), Mikulai-čudonsädajan (1991−2000 enččes privatižes pertiš), Jumalanmaman Tihvinan jumalaižen Titovkas (2004−2010).

Lapsiden opendusen aluzkundad oma päivkodid, keskškolad. Šebekinon tegimišton i transportan tehnikum om lidnan professionaližen opendusen aluzkundaks.

Galerei

• 
  Ujundbassein (ezimal) i Kul'turšingotesen keskuz (tagamal, 2015)
• 
  Jumalanmaman «Kaikiden gorähižiden ihastuz»-jumalaižen jumalanpert', vn 2008 nägu
• 
  Šebekinon muzei vl 2015
• 
  Šebekinon tehnikuman üks' sauvusišpäi (tagamal) i Rebinderoiden kaumuz (ezimal, 2012)
• 
  «Aisberg»-jäaren (2013)
• 
  Avtobusstancii vl 2015

Irdkosketused

• Lidnan da sen ümbrikon tobmuden sait (shebekinskoe-r31.gosweb.gosuslugi.ru) (ven.) i sen edeline, no radai sait (admsheb.ru).
• Šebekinon istoriž-čomamahtoižen muzejan sait (museum-shebekino.bel.muzkult.ru). (ven.)