Vanh Oskol

Vanh Oskol
Старый Оскол

Lidnanznam	Flag
Valdkund	Venäma
Eläjiden lugu (2021)	221,676 ristitud
Pind	200,8 km²
Pämez'	Vladimir Ždanov (tal'vku 2024—)
Telefonkod	+7−4725-xxx-xxx
Avtokod	31
Aigvö	UTC+3 (MSK+0)

Vanh Oskol (ven.: Ста́рый Оско́л) om Venäman lidn da lidnümbrik Belgorodan agjan pohjoižes. Se om agjan kahtenz' surtte lidn, om «sodahoštusen lidn»-arvonke vspäi 2011. Edel 2008. vot Vahn Oskol i sen rajon oliba eriži.

Enzne da nügüd'

Eländpunktan aluz om pandud vl 1593 kuti Oskol-sodakordon valdkundröunanno lidnan statusanke, nimitihe jogen mödhe. Vl 1655 udesnimitihe nügüdläižikš Carev Alekseev-lidnan udesnimitusenke. Vanh Oskol kändihe makundan keskuseks vl 1727.

Vanh Oskol šingotase raudan metallurgijan keskuseks sijaližel torhudel: elektrometallurgine kombinat i Stoilenskii-küllästamižtegim. Toižed sarakod oma sömtegimišt (leibänedheotandad, bekon, konditerfabrikad, maidkombinat, kalategim), mašiništonsauvomine (tegim metallurgijan täht, demfermašinoiden tegim, gidravline mašiništ), sauvondmaterialiden tehmine (cement, metalližkonstrukcijad, tagodud tegesed, kuivad sauvondsegoitused), mugažo plastmassantegim radab lidnas.

Geografijan andmused

Lidnümbrikon sijaduz vn 2010 agjan kartal

Lidn sijadase lidnümbrikon lodehes, Oskol-jogen üläjoksmusen randoil (Severskii Doncan hura ližajogi), 150 m ü.m.t. keskmäižel korktusel.

Matkad Belgorodhasai om 117 km suvipäivlaskmha orhal vai 140 km avtotedme. Lähembaine lidn om Gubkin, om kümne kilometrad matkad päivlaskmha sen röunhasai.

Tobmuz

Vanh Oskol jagase kudeks territorialižeks rajonaks: Keskuzline, Suvipäivlaskmaine, Pohjoižpäivnouzmaine, Raudten, Kotölan i Metallurgine rajonad. Kaik 78 eländpunktad mülüdas lidnümbrikho Vanhan Oskolan ližaks. Lidnümbrikon pind — 1693,5 km².

Lidnümbrikon tobmuden pämez' om sen Administracijan pämez'. Edeližed Administracijan pämehed oma Andrei Česnokov (tal'vku 2021 — tal'vku 2024), Aleksandr Sergijenko (kül'mku 2017 — tal'vku 2021).

Eläjad

Vn 2010 Venäman rahvahanlugemižen mödhe lidnan eläjiden lugu oli 221 085 ristitud, lidnümbrikon — 256 542 ristitud, vn 2021 lidnan — 221 676 ristitud. Vl 2017 kaik 259 986 ristitud elihe lidnümbrikos, sidä kesken 223 360 ristitud lidnas. Kaikiš suremb lidnan ristitišt oli 224 153 eläjad vl 2018.

Rahvahad (enamba 0,4 % vl 2021): venälaižed — 86,0 %, ukrainalaižed — 0,7 %, armenijalaižed — 0,4 %, toižed rahvahad — 1,7 %, rahvahuden ozutandata — 11,2 %.

Openduz

Lapsiden opendusen aluzkundad oma 58 päivkodid i 31 keskškolad (vn 2023 andmused).

Professionaližen keskopendusen aluzkundad oma koume kolledžad i nell' tehnikumad. Üläopendusen aluzkundad oma toižiden lidnoiden aluzkundoiden nell' filialad, znamasine om Vanhan Oskolan tehnologine institut (Moskvan MISIS-universitetan filial).

Transport

Avtobusad, kiruhtramvaid da taksid oma kundaližeks transportaks lidnas.

Tatanmaine civiline Vanhan Oskolan lendimport (УУОС / СОЛ, 6,6 tuh. passažiroid vl 2017) sijadase kudes kilometras lodeheze lidnaspäi. Tehtas reisid Moskvha.

Galerei

• 
  Lidnümbrikon tobmuden sauvuz (2018)
• 
  Rajonan Valdkundmaksoiden inspekcii (2010)
• 
  Ph. Aleksandr Nevalaižen kafedraline päjumalanpert' (letihe vl 1903), vn 2009 nägu
• 
  Kuividen sauvondsegoitusiden tegim vl 2010
• 
  Venäman valdkundaline geotedištelendan universitet Sergo Ordžonikidzen nimed (Moskv), Vanhan Oskolan filial (2014, ende Venäman kivivoin da gazan valdkundaližen universitetan Gubkinan nimed kampus)
• 
  Lidnan kodirandantedištandmuzei (2015)
• 
  Karusel' -torguimižbobuštuzkeskuz (2010)
• 
  Sportpert'kulu (2010)
• 
  Lidnan avtobusstancii vl 2012

Irdkosketused

• Lidnümbrikon tobmuden sait (oskolregion.gosuslugi.ru). (ven.)