Graivoron

Graivoron
Грайворон

Lidnanznam	Flag
Valdkund	Venäma
Eläjiden lugu (2021)	6,179 ristitud
Pind	10 km²
Telefonkod	+7−47 261-xx-xxx
Avtokod	31
Aigvö	UTC+3 (MSK+0)

Graivoron (ven.: Гра́йворон) om Venäman röunanverine lidn Belgorodan agjan suvipäivlaskmas. Se om Graivoronan lidnümbrikon (edel vn 2018 sulakud — rajonan) administrativine keskuz da pala.

Istorii

Eländpunktan aluz om pandud vl 1678 kozakoil kuti Graivoroni-slabad (ven.: слобода Грайвороны). Vl 1838 slabad sai makundan lidnan statusad. Vn 1848 lujan lämoipalon jäl'ghe udessaudihe lidnad oigedsaumaižen planan mödhe. Suren sodan aigan lidn oli okkupiruidud nacistižen Germanijan sodavägil kaks' pordod (19. reduku 1941 — 16. uhoku 1943, vn 1943 13. keväz'ku — 7. eloku).

Graivoron šingotase savičun, parketlaudan i saguden tegimil. Edel vn 2003 sulakud elektromehanine tegim oli, tegi nenid tavaroid: elektrokuivadimed fruktoiden täht, palad elektrovedimile, vezikatl'ad.

Geografijan andmused

Graivoronan lidnümbrikon sijaduz agjas vn 2010 kartal

Lidn sijadase ümbrikon suven keskuzpalas, Vorskl-jogen üläjoksmusen hural randal (ven.: Во́рскла 464 km pitte, Dnepran hura ližajogi), 130 m ü.m.t. keskmäižel korktusel.

Matkad Ukrainan röunhasai om seičeme kilometrad suvipäivlaskmha avtotedme, Belgorodhasai — 78 km päivnouzmha, se om Venäman lähembaine lidn. Lähembaine raudtestancii om Hotmižsk (ven.: Хотмы́жск) lidnümbrikon Hotmižsk-žilos vižtoštkümnes kilometras, läz Ukrainan röunmad.

Tobmuz

Lugovk-žilo (ven.: село Луговка, 221 rist. vl 2016) mülüi lidnankundha Graivoronan ližaks. Lidnankundan pind oli 30,64 km².

Lidnan suim om likvidiruidud vn 2019 keväz'kus, Vladimir Krasnokutskii oli sen likvidacižen laudkundan ohjandajan vn 2018 redukuspäi. Jurii Klimenko radoi Suiman jäl'gmäižen ezimehen edel vn 2018 redukud. Lidnankundan Administracii om likvidiruidud vn 2020 kezakus, Lüdmila Kreneva radoi sen likvidacižen laudkundan ohjandajan vn 2018 tal'vkuspäi. Administracijan jäl'gmäine pämez' oli Vladimir Krasnokutskii (semendku 2017 — tal'vku 2018). Niiden sijas Nevondkund Graivoronan lidnterritorijan šingoteses i Territorialine administracii oma sätud.

Eläjad

Vn 2010 Venäman rahvahanlugemižen mödhe lidnan eläjiden lugu oli 6 234 ristitud, lidnankundan — 6 444 ristitud, rajonan videndez. Vn 2021 rahvahanlugemižen mödhe lidnan ristitišt oli 6 179 eläjad. Kaik 6 404 eläjad oli lidnas vl 2017. Kaikiš suremb lidnan ristitišt oli 8 900 eläjad vl 1926, Suren sodan jäl'ghe — 6 506 eläjad vl 2016.

Rahvahad (enamba 0,4 % vl 2021): venälaižed — 89,2 %, ukrainalaižed — 1,9 %, čiganalaižed — 1,0 %, toižed rahvahad — 2,8 %, rahvahuden ozutandata — 5,1 %.

Ortodoksižen hristanuskondan koume pühäpertid oma kaičenus i saudud lidnas: ph. Mikulai-čudonsädajan päjumalanpert' (om saudud vll 1860−1865) i kaks' časounäd. Niiden ližaks Pühän Jumalanmaman päjumalanpert' (oli vspäi 1884) i Eläban Eziauguižen Stroican jumalanpert' (oli vll 1872−1943, panihe mantazole Suren sodan aigan) ei ole kaičenus.

Lapsiden opendusen aluzkundad oma Kapel'ka-päivkodi («tippuine»), keskškol, čomamahtoiden škol V.F. Trutovskijan nimed, sportškol. Tesauvondan radnikoiden openduzkeskuz om lidnan professionaližen opendusen aluzkundaks.

Galerei

• 
  Lapsiden kirjišt ph. Ioasaf Belgorodalaižen časounänke (1998) tagamal vl 2011
• 
  Ph. Mikulai-čudonsädajan päjumalanpert', vn 2011 nägu
• 
  20. voz'sadan augotišen torguindrived vl 2015
• 
  Lidnan keskškol (2011, ende prihaižiden progimnazii)
• 
  Nevondkundaline lidnanznam (1970-nded voded)

Irdkosketused

• Lidnan i sen municipaližen ümbrikon tobmuden sait (grajvoron-r31.gosweb.gosuslugi.ru). (ven.)