Aleksejevk

Aleksejevk
Алексеевка

Lidnanznam	Flag
Valdkund	Venäma
Eläjiden lugu (2023)	36,075 ristitud
Pind	37,87 km²
Telefonkod	+7−47 234-xx-xxx
Avtokod	31
Aigvö	UTC+3 (MSK+0)

Aleksejevk (ven.: Алексе́евка) om Venäman lidn Belgorodan agjan päivnouzmas. Se om Aleksejevkan ümbrikon (edel vn 2024 redukud lidnümbrikon, edel vn 2018 sulakud rajonan) administrativižeks keskuseks da palaks.

Istorii

Eländpunktan aluz om pandud vl 1685 kuti kozakoiden Aleksejevskai-slabad (ven.: слобода Алексеевская) kaičemha Venäman röunad. Ühtennimine stancii om saudud vl 1895 «Har'kov — Balašov»-keskustal. Vspäi 1918 oli makundan keskuseks. Kätihe slabadad radnikžiloks vl 1939. Suren sodan aigan žilo oli okkupiruidud (5. heinku 1942 — 19. viluku 1943), sen jäl'ghe Aleksejevkan ukrainine ristitišt poleni lujas. Radnikžilo sai lidnan statusad vn 1954 19. päiväl elokud.

Aleksejevk šingotase sömtegimišton edheotandoil (pühävoin, argvoin da razvoiden järed «EFKO»-tegim, maidkonservtegim, leibtegim, kombisötken tegim), himižel tegimel i katilmašiništon tegimel. Ende ladimensauvomižem «Deviz»-tegim, magaduzsijiden tegim, sahartegim i lihakombinat radoiba mugažo.

Geografijan andmused

Aleksejevkan ümbrikon sijaduz agjas vn 2010 kartal

Lidn sijadase ümbrikon lodehes, Tün' Sosn-jogen randoil (ven.: Тихая Сосна 161 km pitte, Donan oiged ližajogi), 120 m ü.m.t. keskmäižel korktusel.

Matkad Belgorodhasai om 148 km päivlaskmha orhal vai 172 km avtol. Lähembaižed lidnad avtoteidme oma Birüč kaks'kümne kilometrad päivlaskmha i Ostrogožsk (Voronežan agj) 50 km pohjoižpäivnouzmha.

Tobmuz

Aleksejevk oli lidnankundaks vll 2004−2019, sen üks'jäižeks eländpunktaks. Lidnankundan pind oli 124,52 km².

Lidnankundan jäl'gmäine pämez' oli Pavel Hvorostän vn 2017 keväz'kuspäi vn 2019 elokuhusai.

Eläjad

Vn 2010 Venäman rahvahanlugemižen mödhe lidnan eläjiden lugu oli 39 026 ristitud, rajonan koume videndest, vn 2021 — 36 578 ristitud. Kaik 38 447 eläjad oli lidnas vl 2017. Vll 1996−2019 lidnan ristitišton lugu oli kaikiš suremb, 38..39 tuhad eläjid (39 400 rist. vl 2008).

Ortodoksižen hristanuskondan nell' jumalanpertid oma kaičenus i saudud lidnas: ph. Aleksandr Nevalaižen, ph. Dimitrii Rostovalaižen, Eläban Eziauguižen Stroican, ph. Jurgii-vägestusenkandajan.

Lapsiden opendusen aluzkundad oma päivkodid, seičeme keskškolad (nomer 1..7), specialine (korrekcine) škol-internat, lapsiden sädamižen pert', čomamahtoiden škol, lapsiden da norišton sportškol. Aleksejevkan kolledž (ende pedagogine i maižandusen kolledžad eriži) i agrotehnine tehnikum oma lidnan professionaližen opendusen aluzkundoikš.

Galerei

• 
  Enččen lidnankundan administracijan sauvuz (2012)
• 
  Eläban Eziauguižen Stroican jumalanpert', vn 2014 nägu
• 
  «EFKO»-voitegimen ohjanduzkompanijan sauvuz vl 2014
• 
  Kodirandantedištandmuzei (2011, ende Lübivijad-torgovanoiden erižpert')
• 
  Sodakomissariat (2013, ende Mirošnikov-torgovanan pert')

Irdkosketused

• Lidnan da sen ümbrikon tobmuden sait (alekseevskij-r31.gosweb.gosuslugi.ru). (ven.)