Belozerskan rajon

Belozerskan rajon
Белозерский район

Znam	Flag
Valdkund	Venäma
Administrativine keskuz	Belozersk
Eläjiden lugu (2015)	15,752 ristitud
Pind	5,398 km²

Belozerskan rajon (ven.: Белозерский район) om rajon Vologdan agjas.

Administrativine keskuz om Belozersk-lidn, kudamb sijadase 214 km Vologd-lidnaspäi.

Lähembaine sur' lidn om Čerepovec, kudambahapäi om 120 km.

Istorii

Rajonan aluz om pandud vl 1927 elokun 1. päiväl Leningradan agjan Čerepovecan ümbrikos. Vl 1930 heinkun 23. päiväl heitihe ümbrikod, i vhesai 1937 rajon mülüi Leningradan agjaha kuti administrativine ühtnik. Vs 1937 sügüz'kun 23. päiväspäi mülüb Vologdan agjaha. Rajon om olmas nügüdläižiš röunoiš vspäi 1965.

Geografijan andmused

Rajonan territorii sijadase päilaskmaha da suvhe Vaugedjärven randalpäi, rajonidenkeskeine röun läbitab järved lodehespäi suvipäivnouzmha. Volgan-Baltijanmeren vezite ümbärdab Vaugedjärven randad. Rajonan piduz pohjoižespäi suvhe — 120 km, päivlaskmaspäi päivnouzmha — 95 km.

Pind — 5 398 nellikkilometrad. Mec otab territorijan nell' videndest (4525 km²). Kaik om 131 järved rajonas.

Om röunoid 6 Vologdan agjan rajonanke:

• pohjoižpäivnouzmas Vaškiden rajonanke;
• päivnouzmas Kirillovan rajonanke;
• suves Čerepovecan rajonanke;
• suvipäivlaskmas Kadujan rajonanke;
• päivlaskmas Babajevon rajonanke;
• lodehes Vitegran rajonanke.

Londuseližed varad oma turbaz, sauvondmaterialad (letked, gravii, dolomit), mec, kala, reskvezi.

Vs 2015 kezakun 1. päiväspäi rajonan territorii alajagase 6 municipaližhe ühtnikha: 1 lidnkundha da 5 küläkundha.

Tobmuz

Vs 2013 keväz'kun 10. päiväspäi Jevgenii Vladimirovič Šaškin om valitud i radab rajonan da sen administracijan pämehen, Ühthine Venäma-partijan ühtnii. Viž ohjandust alištudas rajonan administracijale.

Käskusenandai tobmuz om Ezitajiden Suim (videnz' kucund, 19 ezitajad). Järgvaličendad sihe oliba vl 2012 keväz'kun 4. päiväl. Aleksei Petrovič Jakovčuk radab sen ezimehen vl 2015.

Käskuzkundaline tobmuz om Belozerskan rajonan käskuzkund.

Eläjad

Vn 2010 Venäman rahvahanlugemižen mödhe eläjiden lugu oli 19 065 ristitud.

Kaik om 280 eländpunktad rajonas, sidä kesken 1 lidn, 8 žilod, 269 küläd da 2 futorad.

Toižed sured eländpunktad oma Zubovo-külä (1,5 tuh. rist. vl 2002) da Alamondom-žilo (1,1 tuh. rist. vl 2002).

Ižanduz

Rajonan ižandusen päsarakod oma mecan varhapanend da ümbriradmine, jogitransport da turizm, sömtegimišt da maižanduz.

• AAS «Belozerskii lespromhoz» («Belozerskan mectegimišton ižanduz»)
• «Belozerskije elektroteploseti»-edheotand («Belozerskan elektrolämbituzverkod»)
• AAS «Vologdaavtodor»:an palakund

Transport

Rajonankeskeižed avtoted asfal'tižbetonižen alusenke: Belozersk — Čerepovec, Belozersk — Vologd.

Belozerskan avtostancijan adres: Komsomolskaja-ird, 18.

Irdkosketused

• Belozerskan rajonan oficialine sait (belozer.ru). (ven.)
• Belozerskan rajon Vologdan agjan ohjastusen oficialižel vologda-oblast.ru-portalal. (ven.) (angl.)
• Belozerskan avtostancijan aigplan all-transport.info-saital. (ven.)