Buinaksk

Buinaksk
Буйнакск (ven.)
Шура (avar.)
Темир-хан-шура / Шура (kum.)
Буйнакъск / Шура (darg.)

Lidnanznam
Valdkund	Venäma
Eläjiden lugu (2025)	70,190 ristitud
Pind	20,95 km²
Pämez'	Mahač Abdulmuslimov (reduku 2024—)
Telefonkod	+7−87 237-xx-xxx
Avtokod	05
Aigvö	UTC+3 (MSK+0)

Buinaksk (ven.: Буйна́кск, avar.: Шура, kum.: Темир-хан-шура / Шура, darg.: Буйнакъск / Шура) om Venäman lidn da lidnümbrik Dagestanan Tazovaldkundan keskuzpalan suves. Se om Buinakskan rajonan administrativižeks keskuseks mugažo, ei mülü rajonha.

Istorii

Eländpunktan aluz om pandud vl 1834, i vhesai 1922 sen oficialine nimituz oli Temir-Han-Šur. Nimitihe järven i jogen mödhe, kuivatihe Temir-Han-Šur-järved vl 1854. Žilo sai lidnan statusad vl 1866. Luja manrehkaiduz tegihe lidnas vn 1970 14. päiväl semendkud.

Buinaksk šingotase nenil tegimil: agregattegim (gidravližed i poltuzagregatad), ladimensauvomižen tegim, konservtegim (keitišed, džemad, kompotad). Ende meblin, kengiden, omblendan, trikokanghiden fabrik radoiba mugažo.

Geografijan andmused

Buinaksk-lidnümbrikon (vauged läip) sijaduz rajonas i tazovaldkundas vn 2014 kartal

Lidn sijadase ümbärdajan rajonan keskuzpalas, Šuraozen'-mägijogen randal (ven.: Шураозе́нь 80 km pitte, lankteb Kaspijha), 500 m keskmäižel korktusel valdmeren pindan päl. Kurortine tahond levineb lidnas ümbri.

Matkad lähembaižhe Mahačkal-lidnhasai om nell'kümne kilometrad pohjoižpäivnouzmha orhal, raudtel vai avtol.

Tobmuz

Buinaksk om lidnümbrikon üks'jäižeks eländpunktaks.

Lidnümbrikon tobmuden pämez' om sen Administracijan pämez'. Edeližed lidnan Administracijan pämehed oma Šamil' Isaev (heinku-reduku 2024), Islamudin Nurgudaev (sügüz'ku 2017 — heinku 2024), Zakarja Amirov (eloku 2016 — sügüz'ku 2017), Gusein Gamzatov (reduku 2015 — eloku 2016), Zajirbek Valiev (radoi vn 2015 redukuhusai). Lidnümbrikon Deputatoiden suiman ezimez' om Jusupgadži Bartihanov (Юсупгаджи Бартыханов) vn 2025 redukuspäi. Edeližed lidnan suiman ezimehed oma Magomedhan Dajitbegov (reduku 2020 — reduku 2025), Temirlan Temirhanov (tal'vku 2015 — kül'mku 2018, reduku 2019 — reduku 2020), Šamil' Atašev (kül'mku 2018 — reduku 2019), Gusein Gamzatov (oli radnikusel vn 2015 tal'vkuhusai).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 62 623 ristitud, vn 2021 — 68 121 eläjad. Kaik 64 538 eläjad oli lidnas vl 2017. Kaikiš suremb lidnan ristitišt om nügüd'.

Rahvahad (enamba 0,4 % vl 2010): avarad — 45,8 %, kumikalaižed — 30,8 %, venälaižed — 7,0 %, lakalaižed — 6,8 %, darginalaižed — 6,3 %, azerbaidžanlaižed — 0,6 %, lezginalaižed — 0,4 %, toižed rahvahad — 1,9 %, rahvahuden ozutandata — 0,4 %.

Islaman järed džuma-mečet' i koume pühäpertid, medrese i institut oma avaitud lidnas. Ortodoksižen hristanuskondan ph. Aleksandr Nevskijan jumalanpert' om saudud vl 2000, panihe kaht tošt pühäpertid mantazole nevondkundaližen aigan. Judaizman pühäpert' ei ole väges hudran olendan tagut.

Openduz

Lapsiden opendusen aluzkundad oma kaks'kümne üks' nimitadud i nomeruidud päivkodid (nomer 1..21), kümne keskškolad (nomer 2..11), gimnazii nevondkundaližen A. Hutoränskii-vägimehen nimed, kaks' liceid (akademine i Fazu Alijevan nimed), keskškol-internat nomer 3, sanatorine škol-internat nomer 7, lapsiden sädamižen pert'kulu, muzikškol, koume sportškolad (muite, borcuindan, olimpižen varan boksas).

Professionaližen opendusen aluzkundad oma professionaliž-pedagogine kolledž Rasul Gamzatovan nimed, maižanduzkolledž Š.I. Šihsajidovan nimed, ekonomikan da edheotaikundan kolledž, medicinine škol, viž üläopendusen aluzkundad (Moskv, Belgorod, Mahačkal, Piter).

Galerei

• 
  Kodirandantedištandmuzei (2012). Tedotihe Dagestanad Tazovaldkundaks siš vl 1920
• 
  Islaman pühäpert', vn 2011 nägu
• 
  Lidnan tal'veline nägu vn 2015 lopus
• 
  Madina-torguindkeskusenno (Keskuztorguz, 2010)
• 
  Buinaksk-päraudtestancijan sauvuz vl 2006

Irdkosketused

• Lidnümbrikon tobmuden aluzkundoiden oficialine sait (buynaksk05.ru). (ven.)