Dagestanan Lämoid

Dagestanan Lämoid
Дагестанские Огни (ven.)
Дагъустан Огни (tab.)
Дағыстан Ишыглары (azerb.)
Дагъустандин ЦIаяр (lez.)
Lidnanznam;	Flag;
Valdkund	Venäma
Eläjiden lugu (2025)	32,673 ristitud
Pind	9,27 km²
Pämez'	Zamir Gadžimuradov; (tal'vku 2024—)
Telefonkod	+7−87 275-xx-xxx
Avtokod	05
Aigvö	UTC+3 (MSK+0)

Dagestanan Lämoid (ven.: Дагеста́нские Огни́, tab.: Дагъустан Огни, azerb.: Дағыстан Ишыглары / Dağıstan İşıqları, lezg.: Дагъустандин ЦIаяр) om Venäman lidn da lidnümbrik Dagestanan Tazovaldkundan suvipäivlaskmas. Om Derbentan lodehližeks ezilidnaks.

Istorii

Eländpunktan aluz om pandud vl 1914 sauvomha stöklantegint sijaližel torhudel — kvarcletkel. Oli saudud tošti Rahvahanikoiden sodan jäl'ghe, radaškanzi vl 1926 sijaližel londuseližel gazal, kudamban spontanižed tulendad man pindale andoiba žilole nimed. Vl 1990 žilo sai lidnan statusad.

Dagestanan Lämoid-lidn šingotase järedal stöklantegimel^[1], pörutügitegimel, savičuntegimel, mugažo kouranfabrik i vintegim ratas.

Geografijan andmused

Lidnümbrikon sijaduz Derbentan rajonas i Dagestanas vn 2011 kartal (pen' vauged läip lodeheze surembas vauktas läipaspäi — Derbentaspäi)

Lidn sijadase ümbärdajan rajonan keskuzpalan lodehes, Suren Kavkazan ezimägištol, 35 m keskmäižel korktusel valdmeren pindan päl.

Matkad Kaspijhasai om nell' kilometrad pohjoižpäivnouzmha, Mahačkalhasai — 120 km lodeheze. Lähembaine lidn om Derbent kümnes kilometras suvipäivnouzmha.

Tobmuz

Dagestanan Lämoid oma lidnümbrikon üks'jäižeks eländpunktaks.

Lidnümbrikon tobmuden pämez' om sen Administracijan pämez'. Edeližed lidnan Administracijan pämehed oma Alahverdi Halilov (kezaku-tal'vku 2024), Džalalutdin Alirzaev (keväz'ku 2020 — kezaku 2024), Zeidulla Gašimov (reduku 2015 — keväz'ku 2020). Lidnümbrikon Deputatoiden suiman 22 ühtnijad valičesoiš videks vodeks. Sen suiman nügüdläine ezimez' om Esedullah Gasanov vn 2025 redukuspäi. Edeližed lidnan suiman ezimehed oma Nasretdin Babajev (kül'mku 2015 — reduku 2025), Galim Galimov (radoi vn 2015 kül'mkuhusai).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 27 923 ristitud, vn 2021 — 31 412 ristitud. Kaik 29 238 eläjad oli lidnas vl 2017. Kaikiš suremb lidnan ristitišt om nügüd'.

Rahvahad (enamba 1 % vl 2010): tabasaranalaižed — 46,2 %, azerbaidžanlaižed — 23,1 %, lezginalaižed — 17,8 %, darginalaižed — 6,6 %, agulalažed — 3,1 %, venälaižed — 1,1 %, toižed rahvahad — 1,8 %, rahvahuden ozutandata — 0,3 %.

Islaman sur' pühäpert' (mülütab seičemed tuhad uskojid) om avaitud lidnas vn 2023 keväz'kus.

Openduz

Lapsiden opendusen aluzkundad oma päivkodid, üks' augotižškol, kahesa keskškolad (nomer 1..8), ehtal'ne škol, lapsiden sädamižen pert', kaks' čomamahtoiden školad (nomer 1 i 2), koume sportškolad (nomer 2, 3, 4).

Agrarine kolledž^[2]^[3] om lidnan professionaližen opendusen aluzkundaks.

Galerei

Pertišt (2013)
Stöklantegimen produkcii vl 2013
Stöklantegimen kul'turkeskuz (vn 2013 olend)
Federaline trass läbitab lidnad (2013)

Homaičendad

↑ Lidnan stöklantegimen sait (dagsteklotara.ru). (ven.) (angl.)
↑ Lidnan Agrarižen kolledžan aktualine sait (agraogni.ru). (ven.)
↑ Lidnan Agrokolledžan sait (agrok.dagestanschool.ru). (ven.)

Irdkosketused

Lidnan tobmuden sait (dag-ogni.ru). (ven.)

Dagestanan Lämoid Vikiaitas

	Dagestanan Tazovaldkundan lidnad
	Buinaksk \| Dagestanan Lämoid \| Derbent \| Hasavürt \| Izberbaš \| Kaspiisk \| Kizilürt \| Kizlär \| Mahačkal \| Suvisuhokumsk

[1] Lidnan stöklantegimen sait (dagsteklotara.ru). (ven.) (angl.)

[2] Lidnan Agrarižen kolledžan aktualine sait (agraogni.ru). (ven.)

[3] Lidnan Agrokolledžan sait (agrok.dagestanschool.ru). (ven.)

[1]

[2]

[3]