Izberbaš

Izberbaš
Избербаш (ven.)
Избир (darg.)
Йизбирбаш (kum.)
Избербаш / Изберг (lez.)

Lidnanznam
Valdkund	Venäma
Eläjiden lugu (2025)	59,275 ristitud
Pind	22,55 km²
Pämez'	Rasul Bakaev (reduku 2024—)
Telefonkod	+7−87 245-xx-xxx
Avtokod	05
Aigvö	UTC+3 (MSK+0)

Stell tuldes ajaden Izberbašha (2009. voz' vai sen aigemba)

Izberbaš (ven.: Изберба́ш, darg.: Избир, kum.: Йизбирбаш, lezg.: Избербаш / Изберг) om Venäman lidn da lidnümbrik Dagestanan Tazovaldkundan suvipäivnouzmas.

Istorii

Nügüdläižen eländpunktan aluz om pandud vl 1932 kuti Izberg-radnikžilo samha kivivoid meren pohjan alpäi. Nimitihe žilod mägen mödhe, kudamban nimi om nügüd' Izberbaš (vai Puškin-tau profilän tagut mägenpäl, 223 m ü.m.t.). Žilo sai lidnan statusad vl 1949, kätihe Izberbaš:aks.

Izberbaš šingotase sömtegimištol (maidtegim, leibtegim, kaks' konditerišt fabrikad, vinkon'jaktegim, südäiveziden tegim), kivivoin lopmižiden samižel, elektrotermižen mašiništon tegimel, radiotegimel, fil'truindmašiništon tegimel, omblendfabrikal, merikurortaks.

Geografijan andmused

Izberbaš-lidnümbrikon sijaduz tazovaldkundan keskuzpalas vn 2011 kartal

Lidn vedase pidust' Kaspijan mererandad kümneks kilometraks, seižub 13 m keskmäižel korktusel valdmeren pindan päl.

Matkad Mahačkalhasai om kuz'kümne viž kilometrad lodeheze, sen Kaspiisk-ezilidn om lähembaižeks lidnaks.

Tobmuz

Izberbaš om lidnümbrikon üks'jäižeks eländpunktaks. Röunatab Kajakentan rajonanke suves i Karabudahkentan rajonanke päivlaskmas.

Lidnümbrikon tobmuden pämez' om sen Administracijan pämez'. Edeližed lidnan Administracijan pämehed oma Magomed Isakov (viluku 2019 — reduku 2024), Abdulmedžid Suleimanov (2008−2014, eloku 2015 — viluku 2019). Lidnümbrikon Deputatoiden suiman ezimez' om Musa Musaev vn 2024 kül'mkuspäi. Edeližed lidnan suiman ezimehed oma Rasul Bakaev (sügüz'ku 2021 — kül'mku 2024), Mahač Saipulaev (sulaku-sügüz'ku 2021), Islamali Bagomedov (reduku 2017 — sulaku 2021), Jaroslava Azimova (radoi vn 2017 redukuhusai).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 55 646 ristitud, vozile 2008 i 2010 ühtištadihe lidnad lähižidenke eländpunktoidenke, vn 2021 — 55 996 ristitud. Kaik 58 147 eläjad oli lidnas vl 2017. Kaikiš suremb lidnan ristitišt oli 60 453 eläjad vl 2020.

Rahvahad (enamba 1 % vl 2010): darginalaižed — 64,9 %, kumikalaižed — 15,1 %, lezginalaižed — 7,8 %, venälaižed — 3,7 %, avarad — 3,5 %, lakalaižed — 2,5 %, toižed rahvahad — 2,2 %, rahvahuden ozutandata — 0,3 %.

Islaman koume pühäpertid oma avaitud lidnas, niiden kesken Keskuzline Džuma-mečet'. Ortodoksižen hristanuskondan ph. Serafim Sarovalaižen jumalanpert' radab lidnas, om saudud vll 2000−2002.

Openduz

Lapsiden opendusen aluzkundad oma üks'toštkümne nomeruidud päivkodid (nomer 1..4, 6, 8, 10..14), seičeme keskškolad (nomer 1..3, 8, 10..12), ehtal'ne škol, specialine (korrekcine) škol-internat, lapsiden sädamižen pert', čomamahtoiden škol, nell' sportškolad (lapsiden da norišton specializiruidud, futbolan Mount Boys 11 filialanke, üks'borcuindoiden Uf-keskuz G. G. Magomedgadžievan nimed, dzüdzücun sportškol).

Nene professionaližen opendusen aluzkundad ratas lidnas:

• Industrialiž-tegimištoline kolledž,
• Professionaliž-pedagogine kolledž M. M. Medžidovan nimed,
• Čeläbinskan radiotehnikuman Izberbašan filial,
• Medicinižen kolledžan Bašlarovan nimed (Mahačkal) filial.

Galerei

• 
  Lidnan tobmuden sauvuz (2010)
• 
  Lidnan käskuzkund, vn 2022 nägu
• 
  Kinoteatr vl 2022
• 
  Darginan teatr (2022)
• 
  Izberbaš-päraudtestancijan sauvuz vl 2022

Irdkosketused

• Lidnan tobmuden aluzkundoiden oficialine sait (mo-izberbash.ru). (ven.)