Gubkin (lidn)

Gubkin
Губкин
Lidnanznam;	Flag;
Valdkund	Venäma
Eläjiden lugu (2021)	85,225 ristitud
Pind	42 km²
Pämez'	Mihail Lobaznov; (kezaku 2021—)
Telefonkod	+7−47 241-xx-xxx
Avtokod	31
Aigvö	UTC+3 (MSK+0)

Gubkin (ven.: Гу́бкин) om Venäman lidn Belgorodan agjan pohjoižes. Se om agjan koumanz' surtte lidn, Gubkinan lidnümbrikon administrativine keskuz (edel 2008. vot Gubkin i sen rajon oliba eriži).

Istorii

18. voz'sadaspäi Korobkovo-žilo i Saltikovo-külä oliba necil territorijal. Nügüdläižen eländpunktan aluz om pandud vl 1931 žiloks kaivudenno tedoidamha raudkivendod. Žilo sai oficiališt statusad vn 1939 19. päiväl sügüz'kud kuti Gubkin-radnikžilo nevondkundaližen kivivoigeologijan Ivan Gubkin-ohjandajan (1871−1939) muštho. Suren sodan okkupacijan jäl'ghe žilo oli pandud mantazole.

Radnikžilo sai lidnan statusad vl 1955, kändihe lidnaks agjan alištusenke vn 1960 keväz'kul. Vspäi 1967 Lebedinskii-küllästamižkombinat oli sauvomas da radab, sadas raudkivendod kar'jerišpäi lidnan i Vanhan Oskolan keskes.

Gubkin šingotase raudan samižen edheotandoil, sauvondmaterialiden pästandal (sauvondmujud, raudbetontegesed, plastmassiknad), sömtegimištol (lihakombinat, leibän edheotand), mugažo kengiden tegim i omblendfabrik ratas.

Geografijan andmused

Lidn sijadase (Vanh) Oskolec-jogen randoil (ven.: (Старый) Осколец, Donan oigedpol'ne bassein), 180 m ü.m.t. keskmäižel korktusel. Matkad Kurskan agjhasai om 10 km pohjoižhe orhal, Belgorodhasai om 116 km suvipäivlaskmha avtotedme. Lähembaine lidn om Vanh Oskol 10 km päivnouzmha avtol vai raudtedme.

Klimat om ven kontinentaline, keza om toižetui. Voden keskmäine lämuz om +5,9 C°, kezakun-elokun +18..+20 C°, tal'vkun-uhokun −6..−8 C°. Ekstremumad oma −36 C° i +40 C°. Paneb sadegid 480..550 mm vodes, enamba kezakus-elokus (61..69 mm kus), vähemba vilukus-keväz'kus (25..29 mm kus).

Eläjad

Vn 2010 Venäman rahvahanlugemižen mödhe lidnan eläjiden lugu oli 88 560 ristitud, lidnümbrikon koume nelländest. Kaikiš suremb ristitišt oli 88 600 eläjad vl 2011.

Ortodoksižen hristanuskondan viž pühäpertid^[1] oma avaitud lidnas: Sündun Toižetamižen kafedraline päjumalanpert' (om saudud vll 1992−1996) i nell' jumalanpertid.

Nened aluzkundad anttas professionališt opendust lidnas: Gubkinan kaivuzpolitehnine kolledž^[2], Belgorodan valdkundaližen čomamahtoiden i kul'turan institutan filial Gubkin-lidnas^[3] (ende muzikaline kolledž), Belgorodan valdkundaližen tehnologižen universitetan filial i Vanhan Oskolan tehnologižen institutan pala — Nacionaližen MISIS-universitetan filial (Moskv).

Edeližed lidnan pämehed — lidnümbrikon Administracijan pämehed oma Andrei Gaevoi (sügüz'ku 2019 — semendku 2021) i Anatolii Kretov (viluku 1996 — sügüz'ku 2019). Lidnümbrikon Deputatoiden Nevondkundan ezimez' om Galina Kolesnikova vn 2021 vilukuspäi.

Transport

Avtobusad, maršruttaksid da taksid oma kundaližeks transportaks lidnas. Passažiräraudtestancii om saudud raudteiden päl.

Avtobusad da jonused ühtenzoittas lidnad lähižidenke rajonkeskusidenke i regioniden järedoidenke lidnoidenke.

Galerei

«KMAruda»-kombinatan kontor (2018)
Sündun Toižetamižen kafedraline päjumalanpert', vn 2008 nägu
Lebedinskii-küllästamižkombinatan üks' kar'jeroišpäi vl 2004
Raudanbriketoiden tehmižen mašin Lebedinskii-küllästamižkombinatal vl 2006
«Forum»-kul'turkeskuz (2013)
«Gornäk»-sportkompleks (2013, Kaivai)
«Kristall»-sportpert'kulu (2013)
«Linija»-gipermarket vl 2013 (Pird)

Homaičendad

↑ Gubkinan pühäpertid sobory.ru-saital. (ven.)
↑ Gubkinan kaivuzpolitehnižen kolledžan sait (ggpk.ru). (ven.)
↑ Gubkinan filialan lehtpoled bgiik.ru-saital. (ven.)

Irdkosketused

Lidnan sijaližen tobmuden sait (gubkinadm.ru). (ven.)

Gubkin (lidn) Vikiaitas

	Belgorodan agjan lidnad
	Aleksejevk \| Belgorod \| Birüč \| Graivoron \| Gubkin \| Koroč \| Stroitel' \| Šebekino \| Uz' Oskol \| Valuikad \| Vanh Oskol

[1] Gubkinan pühäpertid sobory.ru-saital. (ven.)

[2] Gubkinan kaivuzpolitehnižen kolledžan sait (ggpk.ru). (ven.)

[3] Gubkinan filialan lehtpoled bgiik.ru-saital. (ven.)

[1]

[2]

[3]