Novomičurinsk

Novomičurinsk
Новомичуринск
Lidnanznam;	Flag;
Valdkund	Venäma
Eläjiden lugu (2023)	16,752 ristitud
Pind	26,11 km²
Pämez'	Aleksei Sobolev; (sügüz'ku 2017—)
Telefonkod	+7−49 141-xx-xxx
Avtokod	62
Aigvö	UTC+3 (MSK+0)

Novomičurinsk (ven.: Новомичу́ринск) om Venäman lidn da lidnankund Räzanin agjan suvipäivlaskmas. Se om Pronskan rajonan üks'jäine lidn da kaikiš suremb eländpunkt.

Istorii

Eländpunktan aluz om pandud vn 1968 24. päiväl semendkud kuti Räzanin GRES:an sauvojiden žilo. Sai nimitust Ivan Mičurin-biologan (1855−1935) kanzannimen mödhe, hänen kodikülä (nüg. Mičurovk) om läz lidnad. Prefiks om erištamha Mičurinsk-lidnaspäi lähižes Tambovan agjas. Kätihe Novomičurinsk-radnikžiloks vn 1970 4. päiväl heinkud. Räzanin GRES radaškanzi vll 1973−1974. Sen ezmäine jono kävutab sijališt burad hil't (30 %) i Kanskan-Ačinskan basseinan hil't (70 %). Žilo sai lidnan statusad vl 1981. Vspäi 1984 vanhan stancijan pala i kahtenz' jono ottas londuselišt gazad poltuseks. GRES-24 zavodi radod vl 1988, se om Räzanin GRES:an pala vspäi 2008.

Novomičurinsk šingotase elektrusen tehmižel Räzanin GRES:an^[1] abul, se om Venäman kudenz' LES vägevuden mödhe (3130 MVt) i kaikiš suremb Evropas. Toine edheotand om betontegim.

Geografijan andmused

Lidn sijadase rajonan suvipäivnouzmas, Pronin vezivaradimen oiktal suvižel randal (16 km², Okan oigedpol'ne bassein), 120 m ü.m.t. keskmäižel korktusel. Vezivaradimen padosein Pron'-jogel om saudud vodele 1973.

Matkad Räzanihesai om kuz'kümne viž kilometrad pohjoižhe orhal, 80 km avtotel vai 195 km raudtel. Lähembaižed lidnad oma Skopin (passažirraudtestancii) 28 km suvipäivlaskmha orhal, 37 km avtotedme vai 35 km raudtedme, i Korablino (passažirraudtestancii) 23 km suvipäivnouzmha orhal vai 27 km avtotedme. Raudte radab lidnan suves sarakol Skopinaspäi vaiše jüguiden täht.

Tobmuz

Novomičurinsk om lidnankundan üks'jäižeks eländpunktaks. Lidnankundan pind — 26,11 km².

Eläjad

Vl 1979 žilon ristitišt oli 15 824 eläjad. Vn 2010 Venäman rahvahanlugemižen mödhe lidnan eläjiden lugu oli 19 309 ristitud, rajonan koume videndest, vn 2021 — 16 900 ristitud. Kaik 16 852 eläjad oli lidnas vl 2017. Kaikiš suremb lidnan ristitišt oli 20..22 tuhad eläjid vll 1992−2008 (22 tuh. rist. vl 2001).

Rahvahad (2010): venälaižed — 96,0 %, ukrainalaižed — 1,2 %, toižed rahvahad — 2,8 %.

Ortodoksižen hristanuskondan üks'jäine Jumalanmaman «Varastamatoi ihastuz»-jumalaižen pühäpert'^[2] om saudud i avaitud lidnas vspäi 1996.

Lapsiden opendusen aluzkundad oma nell' päivkodid (nomer 1, 2, 5, 6), koume keskškolad (nomer 1, 2, 3), lapsiden sädamižen pert', čomamahtoiden škol. Novomičurinskan äisarakoine tehnikum^[3] om lidnan professionaližen opendusen aluzkundaks.

Galerei

Znam lidnan röunal (2009)
Räzanin GRES vl 2009
Muštnik lidnan alusenpanijoile (2016)

Homaičendad

↑ Räzanin GRES ogk2.ru-saital. (ven.) (angl.)
↑ Novomičurinskan pühäpertid sobory.ru-saital. (ven.)
↑ Novomičurinskan äisarakoižen tehnikuman sait (nmt-gres.ru). (ven.)

Irdkosketused

Novomičurinsk Vikiaitas

	Räzanin agjan lidnad
	Kasimov \| Korablino \| Mihailov \| Novomičurinsk \| Ribnoje \| Räzan' \| Räzanin Spassk \| Räžsk \| Sasovo \| Skopin \| Spas-Klepiki \| Šack

[1] Räzanin GRES ogk2.ru-saital. (ven.) (angl.)

[2] Novomičurinskan pühäpertid sobory.ru-saital. (ven.)

[3] Novomičurinskan äisarakoižen tehnikuman sait (nmt-gres.ru). (ven.)

[1]

[2]

[3]