Mihailov (lidn)

Mihailov
Михайлов
Lidnanznam;	Flag;
Valdkund	Venäma
Eläjiden lugu (2023)	10,085 ristitud
Pind	8 km²
Pämez'	Sergei Tämisov; (keväz'ku 2009—)
Telefonkod	+7−49 130-xx-xxx
Avtokod	62
Aigvö	UTC+3 (MSK+0)

Mihailov (ven.: Миха́йлов) om Venäman lidn da lidnankund Räzanin agjan päivlaskmas. Se om Mihailovan rajonan administrativižeks keskuseks da palaks.

Istorii

Eländpunkt mainitase ezmäižen kerdan ph. Ipatijan jumalankodin aigkirjas vozil 1172 i 1238. Eziauguižin se oli meščora-rahvahan žilo, möhemba segoitadud slaviženke. Mihailov-nimituz om anttud miččen-se sijaližen ruhtinasen nimen mödhe. Varmitadud lidnusen aluz oli pandud Ivan Grazii-carin käskön mödhe vl 1551.

Anttihe makundan lidnan statusad vl 1708. Saudud vodele 1898 raudte abuti lidnan šingotesele. Kružavan pramozl oli olmas lidnas da sen makundas 19. voz'sadan lopuspäi. Toižen mail'man sodan aigan lidn oli okkupiruidud lühüdaks aigaks vl 1941 (24. kül'mku — 7. tal'vku).

Mihailov šingotase sömtegimištol (maidkombinat). Cementan järed tegim radab lähižes lidnanvuiččes Oktäbr'skii-žilos kudes kilometras päivlaskmha.

Geografijan andmused

Lidn sijadase rajonan keskuzpalan pohjoižes, Pron'-jogen molembil randoil (ven.: Проня 336 km pitte, Okan hura ližajogi), 166 m ü.m.t. keskmäižel korktusel.

Matkad Moskvan agjhasai om kaks'kümne kilometrad lodeheze orhal, Tulan agjhasai — 15 km päivlaskmha orhal. Matkad Räzanihesai om 62 km pohjoižpäivnouzmha orhal, 69 km avtotel vai 120 km raudtel. Toižed lähembaižed lidnad oma Skopin suvipäivnouzmha, Kimovsk (Tulan agj) suvipäivlaskmha i Venöv (Tulan agj) päivlaskmha. Mihailov-raudtestancii radab lidnan päpalan päivlaskmaižel röunal. «Moskv — Astrahan'»-avtote («Kaspii»-trass, R-22) ümbärdab lidnad pohjoižpäivnouzmaspäi.

Tobmuz

Kaik kuz' eländpunktad mülüdas lidnankundha Mihailovan ližaks: Kozlovk-žilo (1043 rist. vl 2010), koume pen't žilod i kaks' küläd. Enzne Elektrik-žilo om lidnan palaks vides kilometras pohjoižhe. Lidnankundan pind — 59,88 km².

Lidnan administracii om likvidiruidud vn 2019 kül'mkus, rajonan administracii tegeb sen velgusidme.

Eläjad

Vl 1897 lidnan ristitišt oli 9 200 eläjad, vl 1939 — 6 538 eläjad. Vn 2010 Venäman rahvahanlugemižen mödhe lidnan eläjiden lugu oli 11 784 ristitud, lidnankundan — 13 097 ristitud, rajonan koumandez, vn 2021 lidnan — 10 303 ristitud. Kaik 11 633 ristitud elihe lidnankundas vl 2017. Kaikiš suremb lidnan ristitišt oli 14..15 tuhad eläjid vll 1970−2001 (15 302 rist. vl 1989).

Rahvahad (ozutadud rahvahudenke vl 2010): venälaižed — 95,5 %, čiganalaižed — 1,6 %, toižed rahvahad — 2,9 %.

Ortodoksižen hristanuskondan seičeme pühäpertid^[1] oma kaičenus i saudud lidnas: Jumalanmaman Katken naižjumalankodi, nell' jumalanpertid i kaks' časounäd.

Openduz

Lapsiden opendusen aluzkundad oma nell' nimitadud päivkodid, koume keskškolad (nomer 1..3), škol-internat (augotižškol i aluzškol), lapsiden sädamižen pert', čomamahtoiden škol V. I. Agapkinan nimed, lapsiden da norišton sportškol.

Professionaližen opendusen aluzkundad oma Mihailovan ekonomine kolledž-internat^[2] i Mihailovan tehnikum A. Merzlovan nimed^[3].

Galerei

Lidnan administracijan sauvuz (2012, om saudud vl 1912)
Sündun Raštvoiden pühäpert', vn 2012 nägu
Sild Pron'-joges päliči vl 2012
«T-34»-tank-muštnik (2015)

Homaičendad

Irdkosketused

Lidnan lehtpoled rajonan tobmuden aluzkundoiden mihrayadm.ru-saital. (ven.)

Mihailov (lidn) Vikiaitas

	Räzanin agjan lidnad
	Kasimov \| Korablino \| Mihailov \| Novomičurinsk \| Ribnoje \| Räzan' \| Räzanin Spassk \| Räžsk \| Sasovo \| Skopin \| Spas-Klepiki \| Šack

[1] Mihailovan pühäpertid sobory.ru-saital. (ven.)

[2] Mihailovan ekonomižen kolledžan-internatan sait (meki62.ru). (ven.)

[3] Mihailovan tehnologižen tehnikuman sait (tehnikum2013.edusite.ru). (ven.)

[1]

[2]

[3]