Kasimov

Vikipedii-späi
Kasimov
Касимов
 Lidnanznam
 Flag
Valdkund Venäma
Eläjiden lugu (2019-01-01) 29,700 ristitud
Pind 31,6 km²
Kasimov Касимов
Pämez' Galina Abramova
(reduku 2017—)
Telefonkod +7−49 131-xx-xxx
Avtokod 62
Aigvö UTC+3 (MSK+0)


Kasimov (ven.: Каси́мов) om Venäman lidn da lidnümbrik Räzanin agjan pohjoižpäivnouzmas. Se om agjan kahtenz' lidn eläjiden lugun mödhe, om Kasimovan rajonan administrativižeks keskuseks, ei mülü sihe.

Istorii[vajehta | vajehtada tekst]

Eländpunkt mainitase ezmäižen kerdan vl 1152 kuti Meščoran lidneihut-röunlidnuz (ven.: Городец Мещёрский) vähän mödvedhe nügüdläižes Kasimovaspäi. Se voz' lugese lidnan alusenpanendan oficialižeks. Vl 1376 polttihe lidnad täuzin mongolalaižiden londan aigan, no pigai uz' eländpunkt oli saudud Uz' Alahaine lidn-nimitusenke (ven. Новый Низовой Город) vhesai 1471.

Lidn oli Kasimovan hankundan (tot.: Касыйм ханлыгы / Qasím xanlığı) keskuseks vll 1452−1681, om pandud nügüd'aigaižhe sijha Šah-Ali-hanan-totarlaižen ohjastusen aigan, se oli 16. voz'sadan keskes. Kasimov (tot.: Ханкирмән, Касыйм) sijazihe hankundan pohjoižes. Hankund i lidn oma nimitadud ezmäižen Kasim-hanan mödhe (ohjasti vll 1452−1469), ned oliba alastunuded Moskvan ruhtinazkundan tobmudele. Kätihe makundan keskuzlidnaks vl 1773. Severz'-se istorižid erižpertid om kaičenus lidnas.

Kasimov šingotase kalližarvoižiden metalloiden tegimel, sauvondmaterialiden pästandal (meckombinat, savičtegim, keramikan edheotand), medicinižladimiden tegimel (sterilizatorad), sömtegimištol (leibtegim, konditerine fabrik, maidon edheotand) i turizmal (samvaroiden i kelloiden muzejad), mugažo omblendfabrik i verkoiden fabrik ratas lidnas. Jogiport om olmas turistlaivoiden täht.

Geografijan andmused[vajehta | vajehtada tekst]

Lidn sijadase rajonan keskuzpalas, Okan hural randal tobjimalaz, 130 m ü.m.t. keskmäižel korktusel. Matkad Räzanihesai om 111 km päivlaskmha-suvipäivlaskmha orhal vai 165 km avtotel. Lähembaižed lidnad oma Sasovo (raudtestancii) 74 km suvipäivnouzmha orhal vai 96 km avtotedme, Spas-Klepiki 81 km päivlaskmha orhal vai 88 km avtotedme, i Viks (Alalidnan agj) 65 km pohjoižpäivnouzmha orhal vai 88 km avtotedme.

Sijaližiden avtoteiden sol'm. Lähembaine Kasimov-raudtestancii radab vspäi 1964 penes Kasimov-žilos 7 km suvhe lidnan keskusespäi vai ani suvipäivlaskmha lidnaspäi. Se om 68-kilometrižen üks'raižuižen sarakon lopstancii Ušinskii-stancijaspäi «Räzan' — Saransk»-keskustal, radab passažiroiden i jüguiden täht, znamasine socialižikš.

Kasimov om lidnümbrikon üks'jäine eländpunkt. Lidnümbrikon pind — 31,6 km².

Eläjad[vajehta | vajehtada tekst]

Vl 1897 lidnan ristitišt oli 13 547 eläjad, vl 1939 — 22 198 eläjad. Vn 2010 Venäman rahvahanlugemižen mödhe lidnan eläjiden lugu oli 33 491 ristitud. Kaikiš suremb lidnan ristitišt oli 36..37 tuhad eläjid vll 1989−2001 (37 900 rist. vl 1992). Ortodoksižen hristanuskondan Sündun Voznesenjan päjumalanpert', seičeme jumalanpertid i časoun'[1] oma olmas lidnas, Kazanin naižjumalankodi eile rados. Islaman pühäpert' udessündutase.

Rahvahad (2010): venälaižed — 97,0%, totarlaižed — 1,0%, toižed rahvahad — 2,0%.

Professionaližen opendusen aluzkundad oma Kasimovan vezitransportan tehnikum[2] i Kasimovan kivivoigazan kolledž[3], mugažo Räzanin pedagogižen kolledžan filial.

Galerei[vajehta | vajehtada tekst]

Homaičendad[vajehta | vajehtada tekst]

  1. Kasimovan pühäpertid sobory.ru-saital. (ven.)
  2. Kasimovan vezitransportan tehnikuman sait (ktvt.info). (ven.)
  3. Kasimovan kivivoigazan kolledžan sait (kngk.info). (ven.)

Irdkosketused[vajehta | vajehtada tekst]



Räzanin agjan lidnad
Kasimov | Korablino | Mihailov | Novomičurinsk | Ribnoje | Räzan' | Räzanin Spassk | Räžsk | Sasovo | Skopin | Spas-Klepiki | Šack