Šack (Venäma)

Šack
Шацк
Lidnanznam;	Flag;
Valdkund	Venäma
Eläjiden lugu (2023)	5,791 ristitud
Pind	20 km²
Pämez'	Vera Bulgakova; (tal'vku 2005—)
Telefonkod	+7−49 147-xx-xxx
Avtokod	62
Aigvö	UTC+3 (MSK+0)

Šack (ven.: Шацк) om Venäman lidn da lidnankund Räzanin agjan suvipäivnouzmas. Se om Šackan rajonan administrativižeks keskuseks da palaks.

Istorii

Eländpunktan aluz om pandud vl 1553 kuti lidnuz sodapostan sijas Ivan Grazii-carin käskön mödhe. Nimitihe mugažo Šačesk, Šačsk. Lidn oli Šackan provincijan keskuseks vll 1719−1775. Kätihe makundan lidnaks vl 1796. Virifabrik i nahkfabrik radoiba 20. voz'sadan augotišes.

Šack šingotase sömtegimištol (leibtegim, lihakombinat). Nevondkundaližen aigan omblendfabrik i likörtegim radoiba lidnas.

Geografijan andmused

Lidn sijadase rajonan päivlaskmas, penen Šač-jogen hural randal (ven.: Ша́ча 48 km pitte, Okan oigedpol'ne bassein), 140 m ü.m.t. keskmäižel korktusel. Jogi om lidnan suvipäivlaskmaižeks röunaks.

Matkad Räzanihesai om 144 km lodeheze orhal vai 162 km avtotel. Lähembaine lidn om Sasovo (raudtestancii) koumekümnes ühesas kilometras pohjoižhe-pohjoižpäivnouzmha orhal vai 42 km avtotedme. «Ural»-avtotrassan (M5) «Räzan' — Penz»-keskust läbitab lidnan suvipalad i ümbärdab Šackad pohjoižespäi da päivlaskmaspäi, se-žo avtote ühtenzoitab Räzanid Mordovijanke.

Tobmuz

Šack om lidnankundan üks'jäižeks eländpunktaks.

Lidnankundan tobmuden pämez' om Administracijan pämez'. Lidnan Deputatoiden nevondkundan ezimez' om Jurii Nefedov vn 2018 redukuspäi. Edeližed lidnan nevondkundan ezimehed oma Aleksandr Sikačev (viluku-reduku 2018), Anatolii Bahmutov (semendku 2016 — viluku 2018), Jevgenii Mežorin (radoi vn 2016 semendkuhusai).

Eläjad

Vl 1897 lidnan ristitišt oli 13 800 eläjad, vl 1959 — 5 020 eläjad. Vn 2010 Venäman rahvahanlugemižen mödhe lidnan eläjiden lugu oli 6 561 ristitud, rajonan koume kümnendest, vn 2021 — 5 927 ristitud. Kaik 6 029 eläjad oli lidnas vl 2017. Kaikiš suremb lidnan ristitišt oli 15..16 tuhad eläjid vll 1913−1931 i 8 181 rist. vl 1989. Kezaaigan lidnan ümbrišton ristitišt ližadub lujas.

Rahvahad (ozutadud rahvahudenke vl 2002): venälaižed — 96,7 %, ukrainalaižed — 0,7 %, toižed rahvahad — 2,6 %. Kozakišton keskuz om avaitud lidnas.

Ortodoksižen hristanuskondan koume jumalanpertid^[1] oma kaičenus i saudud lidnas.

Openduz

Lapsiden opendusen aluzkundad oma kaks' päivkodid, keskškol, škol-internat, čomamahtoiden škol, lapsiden sädamižen pert'.

Šackan agrotehnologine tehnikum^[2] i Räzanin agjan kul'turkolledž^[3] oma lidnan professionaližen opendusen aluzkundoikš.

Galerei

«Aero L-29 Delfin»-lendim-monument (2019)
Eläban Eziauguižen Stroican jumalanpert', vn 2013 nägu
Lidnan lihaedheotandal vl 2005
Kul'turkeskuz (vn 2013 olend)
Avtobusstancii Sündun Eläbzdusen enččenno päjumalanpertinno vl 2013

Homaičendad

Irdkosketused

Lidnan da rajonan tobmuden aluzkundoiden sait (admshack.ryazan.gov.ru). (ven.)

Šack (Venäma) Vikiaitas

	Räzanin agjan lidnad
	Kasimov \| Korablino \| Mihailov \| Novomičurinsk \| Ribnoje \| Räzan' \| Räzanin Spassk \| Räžsk \| Sasovo \| Skopin \| Spas-Klepiki \| Šack

[1] Šackan pühäpertid sobory.ru-saital. (ven.)

[2] Šackan agrotehnologižen tehnikuman sait (schatt.rzn.eduru.ru). (ven.)

[3] Räzanin agjan kul'turkolledžan sait (ryazokk.ru). (ven.)

[1]

[2]

[3]