Sretensk

Sretensk
Сретенск
Lidnanznam;	Flag;
Valdkund	Venäma
Eläjiden lugu (2021)	6,093 ristitud
Pämez'	Roman Bogdanov; (2014—)
Telefonkod	+7−30 246-xx-xxx
Avtokod	75, 80
Aigvö	UTC+9 (MSK+6)

Sretensk (ven.: Сре́тенск) om Venäman lidn da lidnankund Baikalantagaižen randan keskuzpalan pohjoižpäivnouzmas. Se om Sretenskan rajonan administrativine keskuz.

Istorii

Eländpunktan aluz om pandud vl 1689 kuti Stretenskii varmitez (ven.: Стретенский острог), sid' oli tetab kuti Stretensk — kaivuzžilo, kozakoiden stanic. Vhesai 1912 Sretenskan raudtestancii oli Transsiban lopstancijaks, edemba kormazihe jüguid jogilaivoihe da toihe Amuradme. Vl 1926 Sretensk sai lidnan statusad da kändihe rajonan keskuseks.

Sretensk šingotase laivansauvomižen tegimel (pened jogilaivad, meblin tehmine). Raudtestancii om Transsiban vižkümnekilometrižen sarakon lopstancijaks Kueng-stancijaspäi.

Geografijan andmused

Lidn sijadase rajonan suvipäivlaskmas, Šilk-jogen molembil randoil, 490 m ü.m.t. keskmäižel korktusel.

Matkad Čithasai om 365 km päivlaskmha. Lähembaine lidn om Nerčinsk 100 km päivlaskmha.

Klimat om terav kontinentaline, keza om mussonižpirdoidenke. Voden keskmäine lämuz om −2,9 C° vilun tal'ven tagut, kezakun-elokun +16,5..+19,5 C°, tal'vkun-uhokun −23,9..−29,3 C°. Ekstremumad oma −50,7 C° (viluku) i +41,3 C° (kezaku). Paneb sadegid 357 mm vodes, kezal tobjimalaz (98 mm heinkus i 83 mm elokus), i vaiše 52 mm redukus-sulakus (kuidme 3..14 mm).

Tobmuz

Morgul-külä (ven.: Моргул, 44 rist. vl 2017) mülüb lidnankundha Sretenskan ližaks.

Eläjad

Vn 2010 Venäman rahvahanlugemižen mödhe lidnan eläjiden lugu oli 6 850 ristitud, lidnankundan — 6 895 ristitud, rajonan koume kümnendest, vn 2021 lidnan — 6 093 ristitud. Kaik 6 643 eläjad oli lidnas vl 2017. Kaikiš suremb lidnan ristitišt oli 15 138 eläjad vl 1959.

Ortodoksižen hristanuskondan üks'jäine radai ph. Jurgii-vägestusenkandajan jumalanpert'^[1] (saudihe vl 1890) om kaičenus lidnas videspäi, Mikoi-arhangelan jumalanpertin sauvuz kävutase toižin.

Lapsiden opendusen aluzkundad oma nell' nomeruidud päivkodid (nomer 1, 3, 5, 6), keskškol nomer 1, ehtal'ne keskškol, lapsiden sädamižen pert', čomamahtoiden škol, lapsiden da norišton sportškol. Sretenskan pedagogine kolledž^[2] om lidnan professionaližen opendusen aluzkundaks.