Krasnokamensk

Krasnokamensk
Краснокаменск
Lidnanznam;	Flag;
Valdkund	Venäma
Eläjiden lugu (2021)	51,137 ristitud
Pind	73 km²
Pämez'	Igor' Mudrak; (sügüz'ku 2020—)
Telefonkod	+7−30 245-xx-xxx
Avtokod	75, 80
Aigvö	UTC+9 (MSK+6)

Krasnokamensk (ven.: Краснока́менск) om Venäman lidn da lidnankund Baikalantagaižen randan suvipäivnouzmas. Se om randan kahtenz' lidn eläjiden lugun mödhe, Krasnokamenskan rajonan administrativine keskuz.

Istorii

Eländpunktan aluz om pandud vl 1968 kuti geologijan žilo tedoidamha uranan löudmižsijad. Vl 1969 sai lidnan statusad nügüdläiženke nimenke, saudihe samha uranad kaivuzmahtusel, kudamban kivendon muju om rusked. Järedad sodaväged sijazisoiš lidnas nevondkundaližen aigan.

Krasnokamensk šingotase uranan samižel tähäsai (Arguninverine tegimištoline kaivuzhimine ühtelmaz), mugažo hilen samižel.

Geografijan andmused

Lidn sijadase rajonan keskuzpalas, Argunin mägisel'gan ezimägištol, 535 m ü.m.t. keskmäižel korktusel.

Matkad Kitain röunhasai om vižkümne kilometrad suvipäivnouzmha, Čithasai om 380 km lodeheze orhal vai 550 km avtotedme. Lähembaižed lidnad oma Borz' 112 km päivlaskmha orhal vai 155 km avtol i Man'čžurii (Kitai, kit.: 满洲里 Mǎnžōulǐ) 105 km suvipäivlaskmha avtotedme. Raudtestancii om lopuline sarakol Priargunsk-žilhosai. Lidnan pertid mülüdas mikrorajonihe, läz ei ole nimitadud irdoid.

Klimat om terav kontinentaline. Voden keskmäine lämuz om −2,2 C° vilun tal'ven tagut, kezakun-elokun +16,7..+19,8 C°, tal'vkun-uhokun −23,1..−26,8 C°. Paneb sadegid 340 mm vodes, kezal tobjimalaz (107 mm heinkus i 80 mm elokus), i vaiše 37 mm redukus-sulakus.

Tobmuz

Krasnokamensk om lidnankundan üks'jäižeks eländpunktaks.

Edeline lidnankundan pämez' (sen Administracijan pämez') om Jurii Didenko (sügüz'ku 2015 — sügüz'ku 2020). Lidnankundan da rajonan Nevondkundan ezimez' om Igor Mereskin vn 2023 redukuspäi, sen edeline ezimez' om Pötr Bezborodov (reduku 2018 — reduku 2023).

Eläjad

Vn 2010 Venäman rahvahanlugemižen mödhe lidnan eläjiden lugu oli 56 670 ristitud, rajonan seičeme kahesandest, vn 2021 — 51 137 ristitud. Kaik 52 811 eläjad oli lidnas vl 2017. Kaikiš suremb lidnan ristitišt oli 70 tuhad eläjid vl 1987.

Ortodoksižen hristanuskondan Spasan londuseližen mel'kuvan jumalanpert'^[1] om saudud vll 2002−2005.

Lapsiden opendusen aluzkundad oma päivkodid, keskškolad. Professionaližen opendusen aluzkundad oma Krasnokamenskan tegimištoliž-tehnologine kolledž^[2], medicinine kolledž^[3], kaivuztegimištoline tehnikum^[4], MIFI:n filial.