Mogoč

Mogoč
Могоча

Valdkund	Venäma
Eläjiden lugu (2021)	12,992 ristitud
Pind	20 km²
Pämez'	Natal'ja Veko (sügüz'ku 2019—)
Telefonkod	+7−30 241-xx-xxx
Avtokod	75, 80
Aigvö	UTC+9 (MSK+6)

Mogoč (ven.: Мого́ча) om Venäman lidn da lidnankund Baikalantagaižen randan pohjoižpäivnouzmas. Se om Mogočan rajonan administrativine keskuz.

Istorii

Eländpunktan aluz om pandud vl 1910 žiloks raudtestancijanno sauvomha Transsiban Amuran raudted. Stancii om avaitud vspäi 1914, nimitihe jogen mödhe. Gidronim libui evenkan kelen mongoči-nimitusespäi: evenkalaižiden mongo-heim i či-suffiks «kenen». Žilo šingotihe kuldan samižel, i vl 1950 sai lidnan statusad.

Vspäi 1968 sijazihe il'mvägid Mogočas i sauvoškanzihe nügüd'aigaižikš. Lidn om kuldan samižen rajonan keskuseks, sen päedheotandad mülüdas raudten i mecan ümbriradmižen sarakoihe.

Geografijan andmused

Lidn sijadase Amazaran mägisel'gan ezimägištol, 620 m ü.m.t. keskmäižel korktusel, Mogoč-jogen lanktendan sijas Amazar-jogehe (Amuran hurapol'ne bassein). Matkad Čithasai om 460 km suvipäivlaskmha orhal vai 585 km «Amur»-avtotedme (R-297). Lähembaižed lidnad oma Skovorodino (Amuran agj) 275 km päivnouzmha orhal vai 345 km «Amur»-avtotedme i Sretensk 215 km suvipäivlaskmha orhal vai 470 km avtol.

Klimat om terav kontinentaline mussonižen pirdoidenke, tal'v om kuiv vilu. Voden keskmäine lämuz om −5,1 C°, kezakun-elokun +14..+17 C°, tal'vkun-uhokun −24..−29 C°. Ekstremumad oma −51,7 C° i +37,6 C°. Paneb sadegid 433 mm vodes, enamba kezakus-elokus (83..110 mm kus), vähemba kül'mkus-keväz'kus (29 mm pordos).

Čaldonk-žilo (ven.: село Чалдонка, 284 rist. vl 2010) i koume pen't žilod raudtestancijanno mülüdas lidnankundha Mogočan ližaks. Lidnankundan pind — 69,38 km².

Eläjad

Vn 2010 Venäman rahvahanlugemižen mödhe lidnan eläjiden lugu oli 13 258 ristitud, lidnankundan — 13 652 ristitud, rajonan viž ühesandest. Kaikiš suremb lidnan ristitišt oli vll 1970−1992, enamba 17 tuh. eläjid (17 884 ristitud vl 1970). Vl 2017 kaik 13 442 ristitud elihe i 13 785 ristitud kaikes lidnankundas.

Ortodoksižen hristanuskondan Raštvoiden jumalanpert' om pühästadud vl 2014.

Professionaližen opendusen aluzkundad ratas lähembaižiš lidnoiš.

Edeline lidnankundan pämez' om Jevgenii Krasnov (tal'vku 2011 — sügüz'ku 2019).

Galerei

• 

  Raudteiden i pertišton nägu päraudtestancijaspäi (2013)

• 

  Znam lidnan röunal (2010)

• 

  Mogoč-päraudtestancijan sauvuz vl 2013

Irdkosketused

• Lidnankundan tobmuden aluzkundoiden oficialine sait (админмогоча.рф). (ven.)