Zarečnii (Penzan agj)

Zarečnii
Заречный
Lidnanznam;	Flag;
Valdkund	Venäma
Eläjiden lugu (2020)	65,502 ristitud
Pind	27,61 km²
Pämez'	Oleg Klimanov; (sügüz'ku 2014—)
Telefonkod	+7−8412-xxx-xxx
Avtokod	58
Aigvö	UTC+3 (MSK+0)

Sil sanal voib olda toižid znamoičendoid; miše nähta niid, tulgat tänna.

Zarečnii (ven.: Заре́чный) om Venäman lidnümbrik da sauptud lidn Penzan agjan keskuzpalan päivnouzmas. Se om agjan koumanz' lidn eläjiden lugun mödhe, Penzan päivnouzmaine ezilidn.

Istorii

Vn 1954 heinkus nevondkundaline tobmuz päti sauda Penzan ladimentegint, sil-žo vodel sauvond zavodihe mectahondas. Municipalitetan oficialine aluz om pandud Penzan Zarečnii-rajonaks vn 1958 elokus. Eländpunkt om erigoittud Penzaspäi vn 1958 10. päiväl tal'vkud kuti lidn nügüdläiženke nimitusenke. Ladimiden järed tegim radaškanzi vl 1961. Vll 1954−1964 kävutihe türmatud mehiden i sodasauvojiden töid lidnan sauvomižes. Vll 1962−1992 lidnan nimituz oli Penz-19 (ven.: Пенза-19).

Zarečnii šingotase atomšlibakoiden paloiden tehmižel, «Hrizantem»-raketkompleksan pästandal, ladimensauvomižel (läz kümned edheotandoid), sömtegimištol (lihan edheotand).

Geografijan andmused

Lidn sijadase 200 m ü.m.t. keskmäižel korktusel. Röunatab Penzan lidnümbrikonke päivlaskmas i pohjoižes, om erigoittud Penzan fartališpäi 10-kilometrižel mecmassival. Toižed lähembaižed lidnad oma Gorodišče 37 km päivnouzmha orhal vai 41 km avtotedme, i Sursk 37 km päivnouzmha-suvipäivnouzmha orhal vai 65 km avtotedme. «Penz — Sizran'»-avtote mäneb kahtes kilometras pohjoižhe lidnaspäi. Tulend lidnha om vaiše laskendbumagan mödhe. «Penz — Sizran'»-raudte om lidnan pohjoižeks i päivnouzmaižeks röunaks, sen lähembaine stancii om Seliks (ven.: Селикса).

Zarečnii om lidnümbrikon üks'jäine eländpunkt. Lidnümbrikon pind — 27,61 km².

Eläjad

Vl 1959 lidnan ristitišt oli 6 450 eläjad. Vn 2010 Venäman rahvahanlugemižen mödhe lidnan eläjiden lugu oli 63 601 ristitud. Kaikiš suremb lidnan ristitišt oli 63 900 eläjad vl 1996 i om nügüd'.

Rahvahad (2010): venälaižed — 92,6%, mordvinalaižed — 4,5%, ukrainalaižed — 1,2%, toižed rahvahad — 1,7%.

Ortodoksižen hristanuskondan viž pühäpertid^[1] oma saudud lidnas vspäi 1994: nell' jumalanpertid i ph. Panteleimon-spravitajan časoun' (2008) läžundkodiden kompleksas.

Zarečnijan tehnologine institut (vhesai 2005 tehmižtehnikum i kolledž) — Penzan valdkundaližen tehnologižen universitetan filial^[2] om lidnan professionaližen opendusen aluzkundaks.