Holmsk

Holmsk
Холмск

Lidnanznam	Flag
Valdkund	Venäma
Eläjiden lugu (2023)	25,082 ristitud
Pind	32 km²
Pämez'	Dmitrii Lübčinov (heinku 2020—)
Telefonkod	+7−42 433-xx-xxx
Avtokod	65
Aigvö	UTC+11 (MSK+8)

Holmsk (ven.: Холмск, japon.: ホルムスク Horumusku, edel 1946. vot — Maok, japon.: 真岡 Maoka) om Venäman lidn Sahalinan agjan Sahalin-saren suvipäivlaskmas. Se om agjan koumanz' lidn eläjiden lugun mödhe, Holmskan lidnümbrikon (edel 2006. vot — rajonan) administrativine keskuz.

Istorii

Eländpunktan aluz om pandud Venäman imperijha Mauk-kaičendsodapostaks (ven.: Маука) vn 1870 21. päiväl semendkud ainalaižiden amuižen penen külän sijas. Nimitihe külän mödhe, šingotihe merikalanpüdandal i merikapustan kazvatandal. Vll 1905−1945 udesnimitadud Maok oli Japonijan palaks sodan rezul'tataks, om lidnan statusanke vspäi 1922. Suren sodan aigan Rusked Armii anasti lidnad vn 1945 20. päiväl elokud. Udesnimitihe mererandaližiden kukhiden mödhe.

Holmsk šingotase Tünen valdmeren meriportaks i «Vanino (Nevondkundaline Port) — Holmsk»-ehtatimel, sömtegimištol (leibänkombinat, lihakombinat, maidtegim, kalanpüdandan laivišton baz) i lehtraudaižastjoiden järedal fabrikal kalakonserviden täht, laivankohendusen «Sahalinremflot»-tegimel.

Geografijan andmused

Lidnümbrikon sijaduz agjas (2010)

Lidn sijadase Tünen valdmeren Tataran sal'men suvipäivnouzmaižel randal, 29 m ü.m.t. keskmäižel korktusel.

Matkad Suvisahalinskhasai om 53 km päivnouzmha orhal, 83 km avtotel vai 263 km raudtel. Toine lähembaine lidn om Nevel'sk 43 km suvipäivlaskmha orhal, 44 km raudtedme vai 47 km avtotedme. Holmsk-Pohjoine-, Holmsk-Suvine-, Holmsk-sortiruind- raudtestancijad i vedimdepo ratas lidnas. Vspäi 1994 ei ole oiktad raudted Suvisahalinskhasai.

Tobmuz

Lidn jagase seičemeks mikrorajonaks territorialižešti. Kaik 23 žilod mülüdas lidnümbrikho Holmskan ližaks.

Edeližed lidnan pämehed (merad) oma Aleksei Letečin (vn 2019 vilukuspäi tal'vkuhusai), Andrei Suhomesov (keväz'ku 2016 — viluku 2019).

Eläjad

Vn 2010 Venäman rahvahanlugemižen mödhe lidnan eläjiden lugu oli 30 937 ristitud, lidnümbrikon koume nelländest, vn 2021 — 25 677 ristitud. Kaik 28 217 eläjad oli lidnas vl 2017. Kaikiš suremb lidnan ristitišt oli 51 800 eläjad vl 1992.

Ortodoksižen hristanuskondan kaks' jumalanpertid oma avaitud lidnas: ph. Mikulai-čudonsädajan kivine (saudihe vll 1994−2005 nevondkundaližes pertišpäi) i Spasan Toižetamižen puine (letihe vll 2005−2009).

Lapsiden opendusen aluzkundad oma kahesa päivkodid, nell' keskškolad, kaks' liceid, korrekcine škol, lapsiden sädamižen pert', čomamahtoiden škol (seičeme palakundad), lapsiden da norišton kompleksine sportškol. Sahalinan saraktehnologijoiden da holitusen tehnikum i Sahalinan ülämeriškol oma lidnan professionaližen opendusen aluzkundoikš.

Galerei

• 
  Holmskan lidnümbrikon administracijan sauvuz (2012)
• 
  Ph. Mikulai-čudonsädajan jumalanpert', vn 2012 nägu
• 
  Sahalinan meripurulaivišton ofis vl 2012
• 
  Laivankohenduztegim vl 2012
• 
  Kul'turkeskuz (2012)
• 
  Keskuzläžundkodi (2012)
• 
  «Sahalinan majak»-stadion (2012)
• 
  Ujundbassein (2012)
• 
  Holmsk-Pohjoine-raudtestancii vl 2012
• 
  Torguindportan merikar vl 2012

Irdkosketused

• Lidnan da lidnümbrikon Nevondkundan oficialine sait (sobranie-kholmsk.ru). (ven.)
• Lidnan da lidnümbrikon Administracijan oficialine sait (kholmsk.sakhalin.gov.ru). (ven.)
• Lidn da lidnümbrik Sahalinan agjan ohjastusen oficialižel sakhalin.gov.ru-saital. (ven.)