Oh (lidn)

Vikipedii
Jump to navigation Jump to search
Oh
Оха
 Lidnanznam
Coat of Arms of Okha (Sakhalin oblast).png
 Flag
Flag of Okha (Sakhalin oblast).png
Valdkund Venäma
Eläjiden lugu (2018) 20 715 ristitud
Pind 20,98 km²
Oh Оха
Pämez' Sergei Gusev
(keväz'ku 2 017—)
Telefonkod +7-42 437-xx-xxx
Avtokod 65
Aigvö UTC+11 (MSK+8)


Oh (ven.: Оха) om Venäman lidn Sahalinan agjan Sahalin-saren pohjoižes. Se om agjan nellänz' lidn eläjiden lugun mödhe, Ohan lidnümbrikon administrativine keskuz.

Istorii[redaktiruida | redaktiruida purde]

Vl 1880 pen' Ohe-žilo (ven.: Охэ) oli olmas kivivoin pindlöudmižsijanno. Ectihe enamba kivivoid, no satusetomašti, i tacihe žilod. Vl 1910 «Zotovan jäl'gnikad da kompanii» löuzi ezmäšt surt kivivoid, no se jäi kävutandata. Vl 1920−1925 Japonii okkupirui Sahalinad, i vl 1921 saihe ezmäšt kivivoid surel mülündal. Nügüdläižen eländpunktan aluz om pandud vl 1925, nimitihe jogen mödhe. Om lidnan statusanke vspäi 1938.

Vl 1942 saudihe «Oh — Komsomol'sk Amural»-kivivoinveimen. Vn 1995 (28. semendku, 7,2-ballaine) Neftegorskan manrehkaiduz mureni Ohan-ki sauvusid paloin. Vspäi 2005 ühtištuihe Ohan rajonad lidnanke, kätihe lidnümbrikoks. Om severz'-se vahtkundan žiloid lidnas ümbri.

Lidn šingotase mehanižel i raudbetonan tegimil, kivivoin i londuseližen gazan samižen Ohotskan meren šel'faspäi äiluguižil projektoil, mugažo Ohan lämuzelektrokeskuz radab.

Geografijan andmused[redaktiruida | redaktiruida purde]

Lidn sijadase Ohotskan meren Urkt-lahten-järven randal, 30 m ü.m.t. keskmäižel korktusel. Matkad Suvisahalinskhasai om 740 km suvhe orhal vai 850 km avtotedme. Lähembaine raudtestancii sijadase Nogliki-žilos, 230 km suvhe avtotel. Lähembaine lidn om Nikolajevsk Amural (Habarovskan rand) 156 km päivlaskmha orhal. Vll 1999−2006 demontiruihe raudted Noglikišpäi.

Klimat om ven meren, om tazostadud Edahaižen Pohjoižen rajonha vilun Päivnouzmaižsahalinan merijoksmusen tagut. Heinkun i elokun lämuz om +16,1..16,7 C°, vilukun i uhokun — −17,2..17,9 C°. Voden keskmäine lämuz om −0,2 C°.

10 žilod mülüdas lidnümbrikho Ohan ližaks. 26 eländpunktad om likvidiruidud NSTÜ:n olendan jäl'ghe. Lidnümbrikon pind — 14 815,87 km².

Eläjad[redaktiruida | redaktiruida purde]

Vn 2010 Venäman rahvahanlugemižen mödhe lidnan eläjiden lugu oli 23 008 ristitud, lidnümbrikon — 25 855 ristitud. Kaikiš suremb lidnan ristitišt oli 37 000 eläjad vl 1992. Vl 2018 kaik 22 612 ristitud elädas lidnümbrikos. Ortodoksižen hristanuskondan ph. Sergii Radonežalaižen kivine jumalanpert' om saudud vll 1995−2001.

Professionaližen opendusen aluzkundad: Sahalinan industrialine tehnikum i Sahalinan valdkundaližen universitetan filial.

Irdkosketused[redaktiruida | redaktiruida purde]



Sahalinan agjan lidnad
Aleksandrovsk Sahalinal | Aniv | Dolinsk | Holmsk | Korsakov | Kuril'sk | Makarov | Nevel'sk | Oh | Poronaisk | Severokuril'sk | Suvisahalinsk | Tomari | Uglegorsk