Mine sisu juurde

Kostamukš

Vikipedii-späi
Kostamukš
Костомукша (ven.)
Koštamuš (ičen. karj.)
Kostamus (suom.)
 Lidnanznam
 Flag
Valdkund Venäma
Eläjiden lugu (2022) 29,739 ristitud
Pind 15 km²
Kostamukš Костомукша (ven.) Koštamuš (ičen. karj.) Kostamus (suom.)
Pämez' Anna Bendikova
(reduku 2014—)
Telefonkod +7−81 459-xx-xxx
Avtokod 10
Aigvö UTC+3 (MSK+0)


Kostamukš (ven.: Костому́кша, ičen. karj. Koštamuš, suom.: Kostamus) om Venäman lidn da lidnümbrik Karjalan Tazovaldkundan lodehes. Se om Karjalan koumanz' lidn eläjiden lugun mödhe.

Istorii[vajehta | vajehtada tekst]

Nügüdläine eländpunkt om saudud enččiden Kontokki- i Kostamukš-küliden sijas kuti žilo sädamha sijaližen raudkivendon ümbriradajad kombinatad. Se sai oficiališt statusad (lidnanvuitte žilo) vn 1977 17. päiväl kül'mkud. Vspäi 1983 (25. sulaku) Kostamukš om lidnan statusanke. Lidnanpäiv praznuiše semendkun 1. päiväl. Vspäi 2007 Kostamukš ei mülü röunmaha, tulend lidnha om joudai.

Raudkivendon küllästamižkombinat zavodi tehmižen vozil 1982−1984. Se sijadase 13 km pohjoižpäivnouzmha lidnan fartaloišpäi. Kostamukš šingotase mugažo mecan ümbriradmižel, sömtegimištol (leibtegim, torpan kazvatuz), avtoelektropaloiden pästandal i turizmal.

Geografijan andmused[vajehta | vajehtada tekst]

Lidn seižub Kontokkijärven (Kondokijärven) päivlaskmaižen i suvižen randpolil, 220 m ü.m.t. keskmäižel korktusel. Matkad Petroskoihesai om 365 km orhal suvipäivnouzmha, 491 km avtotedme. Matkad Suomenman röunhasai om 35 km päivlaskmha, röunal raudten da avtoten «Lüttä-Vartius»-kontrol'punkt om olmas.

Zarečnii-žilo (136 rist. vl 2013), Voknavolok-külä (401 rist. vl 2013) i nell' pen't küläd (6 rist. vl 2013) mülüdas lidnümbrikho Kostamukšan ližaks. Kostamukšan lidnümbrikon pind om 4 046 km² (13nz' sija tazovaldkundas rajoniden i lidnümbrikoiden keskes).

Eläjad[vajehta | vajehtada tekst]

Vl 1979 lidnan ristitišt oli 4 366 eläjad, vl 1989 — 30 432 eläjad. Vn 2010 kaiken Venäman rahvahanlugemižen mödhe lidnan eläjiden lugu oli 28 436 ristitud, lidnümbrikon — 28 997 ristitud. Kaikiš suremb lidnan ristitišt oli 31 900 eläjad vl 2001. Vl 2018 kaik 29 381 ristitud elihe lidnas i 29 906 ristitud kaikes lidnümbrikos.

Ortodoksižen hristanuskondan koume pühäpertid[1] oma olmas lidnümbrikos: Jumalanmaman Katken kafedraline päjumalanpert' (Kostamukš) Emäganpäivän časounänke i ph. Illä-endustajan jumalanpert' (Voknavolok).

Kostamukšan politehnine kolledž[2] om professionaližen opendusen aluzkundaks.

Transport[vajehta | vajehtada tekst]

Päraudtestancii om lidnan pohjoižel röunal.

Kostamukš-lendimport civiližiden südäireisiden täht (КСШ) sijadase vides kilometras päivlaskmha lidnaspäi, vspäi 2013 se ei ole rados.

Galerei[vajehta | vajehtada tekst]

Homaičendad[vajehta | vajehtada tekst]

  1. Kostamukšan pühäpertid sobory.ru-saital. (ven.)
  2. Kostamukšan politehnižen kolledžan sait (kpk-karelia.ru). (ven.)

Irdkosketused[vajehta | vajehtada tekst]



Karjalan Tazovaldkundan lidnad
Anus-lidn | Belomorsk | Kem' | Kondopog | Kostamukš | Lahdenpohj | Medvežjegorsk | Petroskoi | Pit'krand | Pudož | Segež | Sojärv | Sortaval