Lipki (lidn)

Lipki
Липки

Valdkund	Venäma
Eläjiden lugu (2021)	8,325 ristitud
Pind	3,35 km²
Pämez'	Natal'ja Strukova (kezaku 2017—)
Telefonkod	+7−48 754-xx-xxx
Avtokod	71
Aigvö	UTC+3 (MSK+0)

Lipki (ven.: Ли́пки) om Venäman lidn da lidnankund Tulan agjan keskuzpalas. Mülüb Kirejevskan rajonha, sen kahtenz'-koumanz' surtte lidn.

Istorii

Ende Lipki-külä oli lidnan sijas 17. voz'sadaspäi. Buran hilen samine zavodiše külänno 1940-nzil vozil.

Nügüdläižen eländpunktan aluz om pandud kaivuzžiloiden ühtištusel vl 1951 kuti Lipkovskii-radnikžilo (ven.: рабочий посёлок Липковский). Se sai lidnan statusad nügüd'aigaiženke nimitusenke vl 1955. Hilen samine jätkustui vhesai 1991.

Lipki šingotase savičuntegimel, lämoipalonvastaižen produkcijan pästandal i leibtegimel. Nevondkundaližel aigal maidtegim radoi mugažo.

Geografijan andmused

Lidn sijadase rajonan päivlaskmaiženno röunanno, Upanjogen oiktal randpolel (ven.: Упа́ 343 km pitte, Okan oiged ližajogi), kahtes..koumes kilometras jogespäi i sen Ščokinon vezivaradimespäi (5,7 km²), 240 m ü.m.t. keskmäižel korktusel.

Matkad Tulhasai om kaks'kümne ühesa kilometrad pohjoižhe orhal vai 41 km avtotel, Kirejevsk-rajonkeskushesai — 15 km päivnouzmha orhal vai 21 km avtotedme. Toižed lähembaižed lidnad oma Sovetsk viž kilometrad päivlaskmha orhal vai 10 km avtotedme, i Bolohovo 18 km pohjoižhe-pohjoižpäivnouzmha orhal vai 25 km avtotedme. «Sovetsk — Lipki — Kirejevsk»-raudtekeskust om muretud, ted oma heittud, raudtestancii om sauptud. Lähembaine passažirraudtestancii radab Ščokino-lidnas 19 km päivlaskmha-lodeheze avtotedme.

Tobmuz

Komsomol'skii-žilo (642 rist. vl 2017) oli lidnan palaks edel 2009. vot, se mülüb lidnankundha Lipkin ližaks.

Lidnankundan tobmuden pämez' om sen Deputatoiden suiman ezimez'. Edeline lidnan suiman ezimez' om Viktor Cveibaum, radoi vn 2017 kezakuhusai. Lidnankundan Administracijan pämez' om Igor' Majorov vn 2023 redukuspäi. Edeližed lidnan Administracijan pämehed oma Nikolai Gerasimenko (heinku 2019 — reduku 2023), Vladimir Demin (kezaku 2017 — heinku 2019), Gennadii Sorokin (tal'vku 2016 — kezaku 2017), Svetlana Tihonova (vn 2016 semendku-tal'vku), Nikolai Čumak (radoi vn 2016 semendkuhusai).

Eläjad

Vl 1989 lidnan ristitišt oli 10 355 eläjad. Vn 2010 Venäman rahvahanlugemižen mödhe lidnan eläjiden lugu oli 8 719 ristitud, lidnankundan — 9 384 ristitud, rajonan kahesandez, vn 2021 lidnan — 8 325 ristitud. Kaik 8 976 eläjad oli lidnas i 9 618 eläjad kaikes lidnankundas vl 2017. Vspäi 1959 kaikiš suremb lidnan ristitišt oli 19 435 eläjad vl 1959.

Rahvahad (2010): venälaižed — 94,0 %, totarlaižed — 1,2 %, saksalaižed — 1,2 %, ukrainalaižed — 1,2 %, toižed rahvahad — 2,4 %.

Seičemenden päivän adventistoiden loičendpert' radab lidnas.

Lapsiden opendusen aluzkundad oma kaks' nimitadud päivkodid, aluzškol nomer 3, keskškol nomer 2, openduzkeskuz nomer 1, lapsiden sädamižen pert', muzikškol. Professionaližen opendusen aluzkund om Bolohovon mašinansauvomižen tehnikuman Lipkin filial (edel 2016. vot — erine politehnine tehnikum).

Galerei

• 
  Lidnan kul'turkeskuz (2024)
• 
  Lapsiden muzikškol (2024)
• 
  Tulendan lidnan stadionha bembelüläh (2024)

Irdkosketused

• Lidnankundan lehtpoled rajonan tobmuden aluzkundoiden kireevsk.gosuslugi.ru-saital. (ven.)