Plavsk

Vikipedii-späi
Plavsk
Плавск
Lidnanznam
Valdkund Venäma
Eläjiden lugu (2018) 15,920 ristitud
Pind 8,64 km²
Plavsk Плавск
Pämez' Ol'ga Vorobei
(reduku 2018—)
Telefonkod +7−48 752-xx-xxx
Avtokod 71
Aigvö UTC+3 (MSK+0)


Plavsk (ven.: Плавск) om Venäman lidn da lidnankund Tulan agjan suvipalas. Se om Plavskan rajonan administrativine keskuz.

Istorii[vajehta | vajehtada tekst]

Eländpunktan aluz om pandud vl 1671 kuti Sergijevskoje-žilo, nimitihe jumalanpertin pühämehen mödhe. Žilo šingotihe teravas leibän torguindtel suvespäi pohjoižhe. «Tul — Kursk»-raudtekeskust läbiti žilod vl 1868, sid' saudihe trahmalantegint i raudantegint. Kätihe Sergijevskojen rajonan keskuseks vn 1924 semendkus. Udesnimitihe žilod da rajonad nügüdläižikš i anttihe lidnan statusad ezmäižikš vn 1926 22. päiväl uhokud, kätihe Plavskoje-žiloks sen-žo voden 6. päiväl sügüz'kud. Oli Plavsk-radnikžiloks vn 1935 elokuspäi. Sai lidnan statusad tošti vn 1949 10. päiväl semendkud. Lidnan ümbrišt oli alastunu redustandale onetomuden jäl'ghe Černobiliš vl 1986.

Plavsk šingotase mašinansauvomižen tegimel[1] (separatorad söm-, zell'- i kivivoitegimišton täht), mugažo pompstancijal kivivoinveimenno. Nevondkundaližen aigan spirttegim i avtokohenduztegim radoiba mugažo.

Geografijan andmused[vajehta | vajehtada tekst]

Lidn sijadase rajonan pohjoižpäivnouzmas da sen röunanno, Plav-jogen randoil (ven.: Плава́ 89 km pitte, Okan oigedpol'ne bassein), 190 m ü.m.t. keskmäižel korktusel. Marmižk-ližajogi (ven. Мармыжка 42 km pitte) oiktalpäi i Lokn-ližajogi (ven. Локна 21 km pitte) huralpäi lanktas Plavha lidnan keskuzpalas i päivlaskmas. Matkad Tulhasai om 58 km pohjoižhe-pohjoižpäivnouzmha orhal, 61 km avtotel vai 63 km raudtel. Lähembaižed lidnad oma Ščokino i Sovetsk 35..40 km pohjoižpäivnouzmha-pohjoižhe. Plavsk-raudtestancii radab lidnan päivnouzmas. «Krim»-avtote (M2-trass, Ukrainan röunannoks) läbitab lidnad.

Plavsk om lidnankundan üks'jäine eländpunkt. Lidnankundan pind — 8,64 km².

Eläjad[vajehta | vajehtada tekst]

Vl 1939 radnikžilon ristitišt oli 10 008 eläjad, vl 1959 lidnan — 12 354 eläjad. Vn 2010 Venäman rahvahanlugemižen mödhe lidnan eläjiden lugu oli 16 165 ristitud, rajonan nell' seičemendest. Lidnan ristitišt vajehtase 15..16 tuhad eläjid röunoiš vspäi 1989 (kaikiš suremb oli 16 800 rist. vl 2003). Ortodoksižen hristanuskondan koume jumalanpertid[2] oma olmas lidnas.

Rahvahad (2010): venälaižed — 95,0%, ukrainalaižed — 1,3%, armenijalaižed — 1,2%, toižed rahvahad — 2,5%.

Professionaližen opendusen aluzkund om Tulan maižanduzkolledžan Plavskan filial.[3]

Galerei[vajehta | vajehtada tekst]

Homaičendad[vajehta | vajehtada tekst]

  1. Plavskan mašinansauvomižen tegimen sait (plava.ru). (ven.) (angl.) (isp.)
  2. Plavskan pühäpertid sobory.ru-saital. (ven.)
  3. Plavskan filial Tulan maižanduzkolledžan tchk071.ru-saital. (ven.)

Irdkosketused[vajehta | vajehtada tekst]



Tulan agjan lidnad
Aleksin | Belöv | Bogorodick | Bolohovo | Čekalin | Donskoi | Jasnogorsk | Jefremov | Kimovsk | Kirejevsk | Lipki | Novomoskovsk | Plavsk | Sovetsk | Suvorov | Ščokino | Tul | Uzlovai | Venöv