Belöv

Belöv
Белёв
Lidnanznam;	Flag;
Valdkund	Venäma
Eläjiden lugu (2024)	12,382 ristitud
Pind	8,58 km²
Pämez'	Vladimir Koristov; (reduku 2014—,; Владимир Корыстов)
Telefonkod	+7−48 742-xx-xxx
Avtokod	71
Aigvö	UTC+3 (MSK+0)

Belöv (ven.: Белёв) om Venäman lidn da lidnankund Tulan agjan päivlaskmas. Se om Belövan rajonan administrativine keskuz. Om «sodavahvuden lidn»-arvnimenke vn 2015 tal'vkuspäi.

Istorii

Eländpunkt mainitase ezmäižen kerdan aigkirjas vl 1147. Oli alištunu Suren Litvanman ruhtinazkundale 14.-15. voz'sadoil. Lidn oli Belövan ruhtinazkundan keskuseks (1390-nded voded — 1558), sid' oli alištunu Moskvan tobmudele. Belövan lidnuz oli tarbhaine 16.-17. voz'sadoil. Sai makundan lidnan oficiališt statusad vl 1777. Toižen mail'man sodan aigan lidn oli okkupiruidud nacistižen Germanijan sodavägil, päzutihe vn 1941 31. päiväl. tal'vkud, no Belövan rajonan okkupacii jätkustui vn 1943 heinkuhusai.

Belöv šingotase mašinansauvomižel (kaluišt i mašiništ raudtetransportan täht), sömtegimištol (leibtegim, koditerine edheotand, šoidukahan jablok pastilan tehmižen äiluguižed edheotandad), omblendfabrikoil, kružavan pästandal. Niiden ližaks nevondkundaližen aigan savičuntegim, terazkonstrukcijoiden tegim, mebel'fabrik i puruvedimdepo oliba olmas.

Geografijan andmused

Lidn sijadase rajonan keskuzpalan lodehes, Okan hural randal (ven.: Ока, Volgan oigedpol'ne bassein), 165 m ü.m.t. keskmäižel korktusel.

Matkad Kalugan agjhasai om kümne kilometrad päivlaskmha orhal. Matkad Tulhasai om 107 km pohjoižpäivnouzmha orhal, 125 km avtotel vai 190 km raudtel. Lähembaižed lidnad oma Bolhov (Orelan agj) 42 km suvhe orhal vai 50 km avtotedme, Kozel'sk (passažirraudtestancii, Kalugan agj) 34 km lodeheze orhal, 41 km avtotedme vai 39 km raudtedme, i Čekalin 35 km pohjoižhe orhal, 40 km avtotedme vai 71 km raudtedme. Belöv-raudtestancii radab lidnan lodehes vspäi 1899, se om vaiše juguiden täht vspäi 2016.

Belöv om lidnankundan üks'jäižeks eländpunktaks. Lidnankundan pind — 11,46 km².

Eläjad

Vl 1897 lidnan ristitišt oli 9 600 eläjad, vl 1939 — 17 602 eläjad. Vn 2010 Venäman rahvahanlugemižen mödhe lidnan eläjiden lugu oli 13 918 ristitud, rajonan kaks' koumandest, vn 2021 — 12 746 ristitud. Kaik 13 362 eläjad oli lidnas vl 2017. Kaikiš suremb lidnan ristitišt oli 17..18 tuhad eläjid vll 1939−2000 (päiči sodas, 18 345 rist. vl 1989).

Rahvahad (enamba 0,4 % vl 2021): venälaižed — 92,4 %, azerbaidžanlaižed — 0,6 %, ukrainalaižed — 0,4 %, darginalaižed — 0,4 %, armenijalaižed — 0,4 %, toižed rahvahad — 2,4 %, rahvahuden ozutandata — 3,4 %.

Ortodoksižen hristanuskondan Spasan Toižetamižen mez'jumalankodi (vspäi 1525), Ristan Zdviženjan naižjumalankodi (zavottihe läz 1625. vot), Eläban Eziauguižen Stroican päjumalanpert' i kahesa jumalanpertid^[1] oma kaičenus i saudud lidnas.

Lapsiden opendusen aluzkundad oma päivkodid, keskškolad. Professionaližen opendusen aluzkundad oma kaks' filialad: Tulan proftehnologijoiden da servisan kolledžan filial^[2] i Tulan agjan medicinižen kolledžan filial^[3].

Galerei

Dorofejev-torgovanan istorine pert' (2017)
Ristan Zdviženjan naižjumalankodi, vn 2013 vilukun nägu
Belöv-raudtestancijan sauvuz vl 2016

Homaičendad

Irdkosketused

Lidnan da rajonan tobmuden aluzkundoiden sait (belevskij-r71.gosweb.gosuslugi.ru). (ven.)

Belöv Vikiaitas

	Tulan agjan lidnad
	Aleksin \| Belöv \| Bogorodick \| Bolohovo \| Čekalin \| Donskoi \| Jasnogorsk \| Jefremov \| Kimovsk \| Kirejevsk \| Lipki \| Novomoskovsk \| Plavsk \| Sovetsk \| Suvorov \| Ščokino \| Tul \| Uzlovai \| Venöv

[1] Belövan pühäpertid sobory.ru-saital. (ven.)

[2] Tulan proftehnologijoiden da servisan kolledžan sait (tkptis.tula.su). (ven.)

[3] Tulan agjan medkolledž — Belövan filialan sait (tomk-belev.ucoz.org). (ven.)

[1]

[2]

[3]