Čekalin (lidn)

Čekalin
Чекалин

Lidnanznam
Valdkund	Venäma
Eläjiden lugu (2018)	914 ristitud
Pind	5,42 km²
Pämez'	Ksenija Smirnova (sügüz'ku 2 018—)
Telefonkod	+7-48 763-xx-xxx
Avtokod	71
Aigvö	UTC+3 (MSK+0)

Čekalin (ven.: Чека́лин, edel 1944. vot Lihvin) om Venäman lidn da lidnankund Tulan agjan päivlaskmas. Mülüb Suvorovan rajonha, sen kahtenz' lidn i videnz' eländpunkt eläjiden lugun mödhe. Venäman üks' kaikiš penembiš lidnoišpäi, vaiše Innopolis om penemb.

Istorii

Om löutud neolitan i paleolitan seižutesid, severz'-se amuižid lidnoid Čekalinan ümbrištos, sidä kesken Devägorsk-lidnan (ven. Девягорск, 11. voz'sada — 1147. voz') Dun-jändused (ven. городище Дуна).

Lidn om tetab vspäi 1565 kuti Lihvin-lidnuz (ven.: Ли́хвин). Maine pudotez om kaičenus puižes lidnusespäi. Lihvin oli makundan keskuseks vspäi 1727. Šingotihe torguindlidnaks Okanjogel 19. voz'sadan augotišes, torgovanoiden i valdkundan sauvusiden pertišt om olmas tämbäi-ki. Aigan mändes Okanjogi madalzdui i eile laivjogeks, raudted oma saudud edahan lidnaspäi, i se tuli lanktushe. Vll 1905−1941 Lihvin-stancii radoi Okan vastrandal. Toižen mail'man sodan aigan lidn oli okkupiruidud nacistoil kaks' kud vl 1941. Om udesnimitadud nügüdläižikš vl 1944 surmitud vn 1941 kül'mkus noren Aleksandr Čekalin-partizanan kanzannimen mödhe. Lidn oli Čekalinan rajonan keskuseks vll 1944−1958.

Čekalin šingotase valdkundan aluzkundoiden radol. Nevondkundaližen aigan edheotandad oma okaidud: maidtegim, sijakatusiden edheotand, lapsidensanatorii, mechoz.

Geografijan andmused

Lidn sijadase rajonan päivlaskmaiženno röunanno, Okan hural vanoikahal randal, 190 m ü.m.t. keskmäižel korktusel, jogen veden tazopind om 122 m ü.m.t.. Kalugan agjan röun om ani päivlaskmha lidnaspäi. Matkad Tulhasai om 90 km päivnouzmha orhal vai 111 km avtotel, Suvorov-rajonkeskushesai (lähembaine lidn) — 17 km päivnouzmha orhal vai 20 km avtotedme. Čekalin-raudtestancii om saudud 7 kilometras lidnaspäi i eile rados vspäi 2009.

Čekalin om lidnankundan üks'jäine eländpunkt. Lidnankundan pind — 5,42 km².

Eläjad

Vl 1897 lidnan ristitišt oli 1 600 eläjad, vl 1939 — 2 384 eläjad. Vn 2010 Venäman rahvahanlugemižen mödhe lidnan eläjiden lugu oli 994 ristitud, rajonan koume procentad. Kaikiš suremb ristitišt oli 2 900 eläjad vl 1856. Ortodoksižen hristanuskondan Pühän Jumalanmaman pühäpertihe Ezivendan jumalanpert' (saudihe vll 1821−1835) i üks' časoun' (1913) oma olmas lidnas, ende ph. Stroican päjumalanpert' i kaks' jumalanpertid oliba olmas niiden ližaks.

Rahvahad (2010): venälaižed — 93,4%, moldovalaižed — 1,3%, totarlaižed — 1,2%, ukrainalaižed — 1,1%, pol'šanmalaižed — 1,1%, toižed rahvahad — 1,9%.

Professionaližen opendusen aluzkundad ratas lähembaižiš lidnoiš.

Galerei

• 

  Lidnan administracijan pert'
  (2011)

• 

  Pühän Jumalanmaman pühäpertihe Ezivendan jumalanpert'
  (vn 2016 nägu)

• 

  Nevondkundaližiden sodamehiden velleskaum i Okanjogi lidnanno

• 

  Znam lidnan röunal

Irdkosketused

• Lidnan tobmuden aluzkundoiden sait (chekalin.tulobl.ru). (ven.)