Jefremov (lidn)

Jefremov
Ефремов
	Lidnanznam;
Valdkund	Venäma
Eläjiden lugu (2021)	36,545 ristitud
Pind	21,83 km²
Pämez'	Aleksei Bogatiröv; (reduku 2014—)
Telefonkod	+7−48 741-xx-xxx
Avtokod	71
Aigvö	UTC+3 (MSK+0)

Jefremov (ven.: Ефре́мов) om Venäman lidn Tulan agjan suvipäivnouzmas. Se om agjan seičemenz' lidn eläjiden lugun mödhe, Jefremovan lidnümbrikon (edel 2014. vot — rajonan) administrativine keskuz.

Istorii

Eländpunktan aluz om pandud 1630-nzil vozil kuti pen' Jefremovskai-külä. Puine lidnuz oli saudud senno Mihail Födorovič-carin käskön mödhe vl 1637, muretihe lidnusen hudroid seinid 1680-nzil vozil. Sen aigan eländpunkt mainitase kuti Ofremovan (Afremovan) lidneihut (ven.: Офремова (Афремова) городище), möhemba Ofremov vai Afremov (ven. Офремов, Афремов). Jefremov sai makundan lidnan oficiališt statusad vl 1719 vai vl 1777. Šingotihe villän kazvatandal da torguindal. Toižen mail'man sodan aigan lidn oli okkupiruidud nacistižen Germanijan sodavägil lühüdaks aigaks (20. kül'mku — 13. tal'vku 1941). Jefremov alištui agjan tobmudele oikti vll 1951−2006.

Jefremov šingotase koumel himižel tegimel (sintetižen kaučukan, rikmuiktusen, biohimine — sötmižližadused), kazmusiden mikrobiologižiden kaičendabutusiden tegimel i sömtegimištol (leibtegim, maidkombinat, amerikaižen «Cargill»-kompanijan glükozan da patokan kombinat).

Geografijan andmused

Lidn sijadase lidnümbrikon päivlaskmas, Čoma Meč-jogen hural randal (ven.: Краси́вая Меча́ 244 km pitte, Donan oiged ližajogi), 200 m ü.m.t. keskmäižel korktusel. Matkad Lipeckan agjhasai om kümne kilometrad suvhe orhal.

Matkad Tulhasai om 121 km pohjoižhe orhal, 143 km avtotel vai 166 km raudtel. Lähembaižed lidnad oma Dankov (Lipeckan agj) 71 km päivnouzmha orhal, 78 km avtotedme vai 140 km raudtedme, i Jelec (Lipeckan agj) 64 km suvhe orhal, 72 km avtotedme vai 81 km raudtedme.

Jefremov-raudtestancii radab lidnan päivnouzmas «Tul — Jelec»-keskustal vspäi 1874. «Don»-avtote (M4-trass) mäneb kudes..kümnes kilometras päivnouzmha lidnaspäi, ühtenzoitase senke kahtel sarakol.

Eläjad

Vl 1897 lidnan ristitišt oli 9 tuhad eläjid, vl 1939 — 26 708 eläjad. Vn 2010 Venäman rahvahanlugemižen mödhe lidnan eläjiden lugu oli 42 350 ristitud, lidnümbrikon koume videndest, vn 2021 — 36 545 ristitud. Kaik 35 505 eläjad oli lidnas vl 2017. Kaikiš suremb lidnan ristitišt oli 51..58 tuhad eläjid vll 1973−2001 (58 tuh. rist. vll 1986−1987).

Rahvahad (enamba 0,4 % vl 2021): venälaižed — 90,8 %, toižed rahvahad — 2,9 %, rahvahuden ozutandata — 6,3 %.

Ortodoksižen hristanuskondan Jumalanmaman «Pölištunuziden aznoičend»-jumalaižen päjumalanpert' (om saudud vll 1990−1996), kuz' jumalanpertid^[1] i nell' časounäd oma kaičenus i saudud lidnas.

Lapsiden opendusen aluzkundad oma ühesa nomeruidud päivkodid (nomer 4, 5, 7, 9, 10, 13, 14, 16, 21), ühesa keskškolad (nomer 1, 3..10), gimnazii, fiziž-matematine licei, lapsiden (norišton) sädamižen pert'kulu, muzikškol K.K. Ivanovan nimed, lapsiden da norišton kaks' sportškolad (nomer 1 i 3). Professionaližen opendusen aluzkundad oma Jefremovan himiž-tehnologine tehnikum^[2] i Räzanin medicinižen universitetan filial^[3].

Galerei

Znam lidnan röunal (viluku 2019)
Ph. Mikulai-čudonsädajan jumalanpert' (uz', om saudud vll 2006−2009), vn 2016 nägu
Čomamahtoliž-kodirandantedištandmuzei (2019)
Jevfremov-raudtestancijan sauvuz vl 2008

Homaičendad

Irdkosketused

Lidnan da lidnümbrikon tobmuden aluzkundoiden sait (efremovskij-r71.gosweb.gosuslugi.ru). (ven.)

Jefremov (lidn) Vikiaitas

	Tulan agjan lidnad
	Aleksin \| Belöv \| Bogorodick \| Bolohovo \| Čekalin \| Donskoi \| Jasnogorsk \| Jefremov \| Kimovsk \| Kirejevsk \| Lipki \| Novomoskovsk \| Plavsk \| Sovetsk \| Suvorov \| Ščokino \| Tul \| Uzlovai \| Venöv

[1] Jefremovan pühäpertid sobory.ru-saital. (ven.)

[2] Jefremovan himiž-tehnologižen tehnikuman sait (ehtt.ru). (ven.)

[3] Räzanin medicinine universitet — Jefremovan filialan sait (efr.rzgmu.ru). (ven.)

[1]

[2]

[3]