Pavlovsk (Voronežan agj)

Pavlovsk
Павловск

Lidnanznam	Flag
Valdkund	Venäma
Eläjiden lugu (2021)	22,384 ristitud
Pind	8,22 km²
Pämez'	Väčeslav Ščerbakov (sügüz'ku 2013—, Вячеслав Щербаков)
Telefonkod	+7−47 362-xx-xxx
Avtokod	36, 136
Aigvö	UTC+3 (MSK+0)

Sil sanal voib olda toižid znamoičendoid; miše nähta niid, tulgat tänna.

Pavlovsk (ven.: Па́вловск) om Venäman lidn da lidnankund Voronežan agjan suvipalas. Se om Pavlovskan rajonan administrativine keskuz da pala.

Istorii

Kuldaižen ordan endevanh lidneihut sijadase kahtes kilometras Pavlovskaspäi, ei olend kaivandusid. Nügüdläižen eländpunktan aluz om pandud vl 1709 Petr I-carin käskön mödhe kuti sodaverf' da Osered-lidnuz, ottud plenha ročilaižed saudihe niid. Sai lidnan statusad nügüdläiženke nimitusenke vl 1711, makundan lidnan statusad — vl 1779. Paloi läz täuzin nellän lämoipalon tagut 18. voz'sadan lopus.

Pavlovsk šingotase laivansauvomižen tegimel, sauvondmaterialiden pästandal (ozrikkiven samine i šebnän tehmine, kaks' asfal'ttegint) i sömtegimištol (pühävoitegim, leibtegim), mugažo sötken živatoiden täht tegim radab lidnas.

Geografijan andmused

Lidn sijadase rajonan päivlaskmaižel röunal, Don-jogen hural randal, 83 m ü.m.t. keskmäižel korktusel. Osered'-jogi (ven.: Осередь / Осеред 89 km pitte) lankteb Donha huralpäi lidnan päivlaskmas.

Matkad Voronežhasai om 149 km lodeheze-pohjoižhe orhal, 164 km «Don»-avtotrassal vai 280 km raudtel. Lähembaižed lidnad oma Buturlinovk 52 km pohjoižpäivnouzmha orhal, 56 km avtotedme vai 59 km raudtedme, Kalač 62 km päivnouzmha orhal, 66 km avtotedme vai 113 raudtedme, i Rossoš 49 km suvipäivlaskmha orhal, 75 km avtotedme vai 290 km raudtedme. Pavlovsk-Voronežskii-raudtestancii om sarakon Buturlinovkaspäi lopstancijaks, om olmas vspäi 1976, radab vaiše jüguiden täht vides kilometras suvipäivnouzmha lidnaspäi. «Don»-avtoten (M4-trassan) ümbärte om sauvomas lidnan päivnouzmaspäi.

Tobmuz

Pavlovsk om lidnankundan üks'jäižeks eländpunktaks. Lidnankundan pind — 61,62 km², pertišton — 8,22 km². Lidnan pind om 11,75 nellikkilometrad vn 2003 lidnanpirdan projektan mödhe.

Lidnankundan tobmuden pämez' om sen Administracijan pämez'. Lidnan Rahvahandeputatoiden nevondkundan ezimez' om Oleg Šumeiko vn 2022 sügüz'kuspäi. Edeližed nevondkundan ezimehed oma Sergei Kolesnikov (heinku 2020 — sügüz'ku 2022), Viktor Gubert (radoi vn 2020 heinkuhusai).

Eläjad

Vl 1939 lidnan ristitišt oli 11 100 eläjad. Vn 2010 Venäman rahvahanlugemižen mödhe lidnan eläjiden lugu oli 25 126 ristitud, rajonan nell' ühesandest, vn 2021 — 22 384 ristitud. Kaik 25 047 eläjad oli lidnas vl 2017. Kaikiš suremb lidnan ristitišt oli 25..26 tuhad eläjid vll 1989−2017 (26 800 rist. vll 2000−2001).

Rahvahad (2010): venälaižed — 97,9 %, ukrainalaižed — 1,2 %, toižed rahvahad — 0,9 %.

Rahvahad (enamba 0,4 % vl 2021): venälaižed — 87,5 %, toižed rahvahad — 2,3 %, rahvahuden ozutandata — 10,2 %.

Ortodoksižen hristanuskondan viž pühäpertid oma kaičenus i saudud lidnas: Spasan Toižetamižen päjumalanpert', koume jumalanpertid, kodijumalanpert'. Niiden ližaks Jumalanmaman Smolenskan jumalaižen jumalanpert' ei ole kaičenus (päpala oli saudud vl 1831, panihe mantazole vl 1935).

Lapsiden opendusen aluzkundad oma severz'-se päivkodid, augotižškol, koume keskškolad (nomerad 2, 3 i škol eriližiden disciplinoiden süvetud opendusenke), čomamahtoine škol, lapsiden da norišton sportškol. Pavlovskan tehnikum i Gubernijan pedagogižen kolledžan Pavlovskan filial oma lidnan professionaližen opendusen aluzkundoikš.

Galerei

• 
  Don-jogi Pavlovskas (2006)
• 
  Jumalanmaman Kazanin jumalaižen jumalanpert', vn 2016 nägu
• 
  Maižanduztehnikuman sauvuz vl 2011 (ende hengeline škol)
• 
  Pedagogižen kolledžan pert' (2011)
• 
  Kul'turkeskuz vl 2016

Irdkosketused

• Lidnankundan tobmuden aluzkundoiden sait (pavlovsk-r20.gosweb.gosuslugi.ru). (ven.)