Poronaisk

Poronaisk
Поронайск

Lidnanznam	Flag
Valdkund	Venäma
Eläjiden lugu (2023)	15,953 ristitud
Pind	55 km²
Pämez'	Anton Karpukov (uhoku 2022—)
Telefonkod	+7−42 431-xx-xxx
Avtokod	65
Aigvö	UTC+11 (MSK+8)

Poronaisk (ven.: Порона́йск, japon.: ポロナイスク Poronaisku, edel 1946. vot — japon.: 敷香 Sikuka / Sisuka augotižlibundanke ainan kelespäi) om Venäman lidn da meriport Sahalinan agjan Sahalin-saren keskuzpalan päivnouzmas. Se om Poronaiskan lidnümbrikon (edel 2006. vot — rajonan) administrativine keskuz.

Istorii

Eländpunktan aluz om pandud kuti Venäman imperijan Tihmenevskii-kaičendsodapost igähižiden rahvahiden külidenno vn 1869 elokus. Šingotihe pästnuzil mehil katargaspäi, tehtihe jarmankoid. Vozil 1905−1945 oli Japonijan palaks. Udesnimitihe Poronai-jogen mödhe (ven.: Порона́й 350 km pitte). Cellülozbumagaine tegim, cementan i omblendfabrik radoiba 1990-nzihe vozihesai.

Poronaisk šingotase poltuzenergetižel sarakol (sadas hil't, järed Sahalinan GRES) i sömtegimišton edheotandoil (maidtegim, leibkombinat, kalan ümbriradmine), mugažo torguindmeriportal.

Geografijan andmused

Lidn sijadase Poronai-jogensun oiktal randal tobjimalaz i Tünen valdmeren Ohotskan meren suvipäivlaskmaižel randal (Tirpandan laht, ven.: залив Терпения), koume metrad ü.m.t. keskmäižel korktusel. Matkad Suvisahalinskhasai om 250 km suvhe orhal, 290 km avtotedme vai raudtedme. Lähembaižed lidnad oma Makarov 70 km suvhe orhal, 77 km avtotedme vai raudtel i Uglegorsk 77 km suvipäivlaskmha orhal vai 220 km avtotedme.

Poronaisk-raudtestancii radab vspäi 1936, se om passažiroiden i jüguiden täht, sijadase «Korsakov — Nogliki»-jonon läz pol'tel.

Klimat om ven mussonine, Edahaižen Pohjoižen klimatha tazostadud. Voden keskmäine lämuz om +0,7 C°, heinkun-elokun +13,9..+16,2 C°, tal'vkun-uhokun −13,1..−14,6 C°. Ekstremumad oma −39,8 C° (viluku, uhoku) i +36,2 C° (heinku). Kezaaigan minimum om −2,1 C° (kezaku), tal'vaigan maksimum om +8,4 C° (tal'vku). Ei voi panda halad heinkus vaiše. Paneb sadegid 744 mm vodes, enamba heinkus-redukus (82..126 mm kus), vähemba tal'vkus-keväz'kus (21..33 mm kus).

Eläjad

Vn 2010 Venäman rahvahanlugemižen mödhe lidnan eläjiden lugu oli 16 120 ristitud, lidnümbrikon koume nelländest. Kaik 15 311 eläjad oli lidnas vl 2017. Kaikiš suremb lidnan ristitišt oli 19 463 eläjad vl 1935 i 26 100 eläjad vl 1992.

Ortodoksižen hristanuskondan ph. Tihonan Moskvalaižen jumalanpert' om pühästadud vl 2012.

Opendusen aluzkundad lapsiden täht oma viž keskškolad, čomamahtoiden škol, sportškol. Sahalinan politehnine keskuz nomer koume om lidnan professionaližen opendusen aluzkundaks.

Municipaližen ühtnikan pämez' om sen Administracijan pämez'. Edeline lidnan pämez' om Aleksandr Radomskii (tal'vku 2017 — uhoku 2022).

Galerei

• 
  Lidnan tobmuden sauvuz da torg senno (2012)
• 
  Poronaiskan lidnümbrikon kel'dtaho (2014)
• 
  Lämuzvedimed lidnan raudtedepos vl 2016
• 
  Poronaiskan kodirandantedištandmuzei (2015)
• 
  Poronaisk-päraudtestancijan sauvuz vl 2018

Irdkosketused

• Lidnan da lidnümbrikon tobmuden aluzkundoiden oficialine sait (poronaisk.admsakhalin.ru). (ven.)
• Lidn da lidnümbrik Sahalinan agjan ohjastusen oficialižel sakhalin.gov.ru-saital. (ven.)