Sämžan rajon

Sämžan rajon
Сямженский район
Znam;	Flag;
Valdkund	Venäma
Administrativine keskuz	Sämž
Eläjiden lugu (2015)	8,344 ristitud
Pind	3,948 km²

Sämžan rajon (ven.: Сямженский район) om rajon Vologdan agjas.

Vspäi 1953 administrativine keskuz om Sämž-žilo (rajonan ristitišton läz pol't).

Istorii[vajehta | vajehtada lähte]

Rajonan aluz om pandud vl 1929 heinkun 15. päiväl Pohjoižen randan Vologdan ümbrikho, Djakovskai-külän keskuseks (nece külä vl 1953 oli ühtnenu toižiden külidenke Sämž-külähä). Vl 1930 heinkun 30. päiväl heitihe ümbrikod, sid' vozil 1930−1931 da 1935−1936 Sämžan rajon mülüi Pohjoižhe randha kuti administrativine ühtnik. Vozil 1931−1935 rajonan territorii oli jagadud Tot'man da Harovskan rajoniden keskes. Vozil 1936−1937 rajon mülüi Pohjoižhe agjaha. Vs 1937 sügüz'kun 23. päiväspäi mülüb Vologdan agjaha. Vozil 1962−1965 rajonan territorii oli ühtnenu Harovskan rajonanke. Rajon om olmas nügüdläižiš röunoiš vspäi 1935.

Geografijan andmused[vajehta | vajehtada lähte]

Sämžan rajon sijadase agjan keskuses, pohjoižpäivnouzmha Vologdaspäi. Pind — 3 948 nellikkilometrad. Mec otab territorijan viž kudendest (3275 km²), kavag'mecad oma enambuses. Sod — 6%.

Om röunoid videnke Vologdan agjan rajonanke:

päivnouzmas Tot'man rajonanke;
suves Sokolan rajonanke;
päivlaskmas Harovskan rajonanke;
lodehes Vožegan rajonanke;
pohjoižpäivnouzmas Verhovažjen rajonanke.

Reljef om tazo keskuses, kukhikaz päivnouzmas da suves (Harovskan kukkazsel'g), sokaz sijidme. Znamasižed joged oma Kuben (Suhonan bassein) da Vag (Pohjoižen Dvinan bassein). Kaikiš suremb järvišpäi om Šičenganjärv (10,2 km²). Kaik joged mülüdas Jävaldmeren basseinha.

Londuseližed varad oma turbaz, sauvondmaterialad (letked, gravii), mec, reskvezi.

Vs 2008 heinkun 2. päiväspäi rajonan territorii alajagase 8 küläkundaks.

Tobmuz[vajehta | vajehtada lähte]

Vs 2012 keväz'kun 4. päiväspäi Aleksandr Frolov om valitud i radab rajonan da sen administracijan pämehen. Kaks' administracijan varapämest oma hänele abhu. Nell' ohjandust, 10 palakundad, 1 komitet da 1 radnikoičend alištudas rajonan administracijale.

Käskusenandai tobmuz om Ezitajiden Suim (ven. Представительное собрание) 15 ühtnijanke. Kaik rahvaz valičeb heid nelläks vodeks. Järgvaličendad sihe oliba vl 2012 keväz'kun 4. päiväl. Nikolai Borskii radab sen ezimehen vl 2015. Ezitajiden Suim alištub rajonan pämehele.

Vspäi 2010 Kundaline Nevondkund (ven. Общественный Совет) radab rajonas (12 ühtnijad).