Sizran'

Sizran'
Сызрань
Lidnanznam;	Flag;
Valdkund	Venäma
Eläjiden lugu (2025)	159,587 ristitud
Pind	117 km²
Pämez'	Anatolii Lukijenko; (reduku 2021—)
Telefonkod	+7−8464-xxx-xxx
Avtokod	63, 163
Aigvö	UTC+4 (MSK+1)

Sizran' (ven.: Сы́зрань) om Venäman lidn da lidnümbrik Samaran agjan päivlaskmas. Se om agjan koumanz' surtte lidn, järed raudtesol'm, om Sizranin rajonan administrativižeks keskuseks mugažo (ei mülü rajonha).

Istorii

Eländpunktan aluz om pandud vl 1683 Suren Petran käskön mödhe kuti Sizran-lidnuz (möhemba Sizranin kreml') kaičemha Venäman päivnouzmašt röunad. Nimitihe jogen mödhe (ende Сызра́н, nüg. Sizrank-jogi, ven.: Сы́зранка i Сызра́нка 168 km pitte, Volgan oiged ližajogi). Lidnuz sai lidnan statusad vl 1796.

Luja lämoipalo oli tehnus lidnas vl 1906, pölištui enamba tuhad ristituid.

1920-nzil vozil Sizran' putui NSTÜ:n kahtele sijale kivivoin samiženke, Bakun jäl'ghe.

Sizranin tegimišton päsarakod oma kivivoin ümbriradmine, energetik- i transportmašiništon tehmine, peniden jüguavtoiden i avtodetaliden pästand, sauvond, söndtavaroiden tegimed.

Geografijan andmused

Lidn sijadase ümbärdajan rajonan suves, Volgan oiktal randal (Saratovan vezivaradim), 50 m valdmeren pindan päl keskmäižel korktusel. Sizrank-jogi lankteb Volgha lidnas.

Matkad Samarhasai om 137 km päivnouzmha ülüižele, 191 km avtotedme. Lähembaine Oktäbr'sk-lidn vedase pidust' vezivaradimen randad ani päivnouzmha Sizranilpäi.

Lidnümbrikon londuseližed varad oma palab šoidkivi, fosforitad, lete, čurukivi, reskvezi.

Tobmuz

Kaik koume žilod mülüdas lidnümbrikho Sizranin ližaks, niiden ühthine ristitišt om 808 eläjad (2010): Jelizarovo (201 rist. vl 2010), Kašpir (607 rist. vl 2010) i Fomkan Sadud (ven.: Фомкины Сады, kaikenaigaižeta ristitištota vl 2010). Lidnümbrikon pind om 136,06 km².

Edeline lidnümbrikon pämez' om Nikolai Lädin (kül'mku 2013 — eloku 2021).

Eläjad

Vl 1913 lidnan eläjiden lugu oli 43 600 ristituid. Vn 2010 Venäman rahvahanlugemižen mödhe lidnan eläjiden lugu oli 178 750 ristitud, vn 2021 — 165 725 ristitud. Kaik 173 260 eläjad oli lidnas vl 2017. Kaikiš suremb lidnan ristitišt oli 188 107 ristitud vl 2002.

Rahvahad (enamba 0,5 % vl 2010): venälaižed — 84,0 %, totarlaižed — 5,0 %, ukrainalaižed — 1,0 %, armenijalaižed — 0,9 %, mordvinalaižed — 0,8 %, čuvašalaižed — 0,6 %, toižed rahvahad — 1,9 %, rahvahuden ozutandata — 5,8 %.

Ortodoksižen hristanuskondan kaks'kümne kaks' pühäpertid^[1] oma kaičenus i saudud lidnas: kaks' päjumalanpertid (Hristan Raštvoiden i Jumalanmaman Kazanin jumalaižen), kahesatoštkümne jumalanpertid (sidä kesken koume Voznesen'jen mez'jumalankodiš), časoun' i vanhuskolaižiden loičendpert'. Mugažo Azan-pühäpert' om islamanuskojiden täht.

Openduz

Lapsiden opendusen aluzkundad oma päivkodid, keskškolad.

Kaik nell' professionaližen keskopendusen aluzkundad oma avaitud lidnas (kaik oma kolledžad): medgumanitarine^[2], politehnine^[3], gubernine^[4], čomamahtoiden i kul'turan^[5]. Mugažo om üläopendusen aluzkundoiden viž filialad: koume Samaran i üks' Tol'jattin universitetad, üläškol lendajiden täht (Voronežan akademijan filial).

Transport

Avtobusad da taksid oma kundaližeks transportaks lidnan südäimes. Jogilaivad (kezaaigan) i ezilidnelektrojonused üntenzoittas lidnad Samaranke.

Jonused ajadas lidnaspäi kudhe polehe raudteidme. Jogistancii i jogijüguport oma lidnan randal.

Galerei

Jumalanmaman Kazanin jumalaižen päjumalanpert', vn 2014 nägu
Sizranin Kremlin palad, vn 2016 nägu: Spasan čuhunduz i jumalanpert' (huralpäi), Hristan Raštvoiden päjumalanpert' (1717)
Sizranin kivivoin ümbriradai tegim vl 2011
«Sizrangruzavto»-edheotand vl 2012
Sizranin LEK vl 2010
Sizranin medkolledž (2009, ende «Batum»-adivpert' i päjumalanpertin laukad)
Dramteatr A.N. Tolstoin nimed (vn 2008 olend)
Sizran' Gorod -raudtestancii vl 2014
Sizran' 1 -päraudtestancii vl 2008

Tetabad sündnuded

Ivan Demidov (sünd. 1963) — Venäman TV-vedai, TV-prodüser, kinorežissör i politikanmez'.
Sergei Grigorjev (1875−1953) — oli Venälaižen imperijan i Nevondkundaližen Ühtištusen prozan kirjutai lapsiden i norišton täht.
Aleksandr Peskov (sünd. 1965) — Nevondkundaližen Ühtištusen i Venäman teatran da kinon akt'or.

Homaičendad

Irdkosketused

Sizran' Vikiaitas

	Samaran agjan lidnad
	Čapajevsk \| Kinel' \| Neftegorsk \| Novokuibiševsk \| Oktäbr'sk \| Otradnii \| Pohvistnevo \| Samar \| Sizran' \| Žigulövsk \| Tol'jatti

[1] Sizranin pühäpertid sobory.ru-saital. (ven.)

[2] Sizranin medgumanitarižen kolledžan sait (medgum.ru). (ven.)

[3] Sizranin politehnižen kolledžan sait (spk.minobr63.ru). (ven.)

[4] Sizranin gubernižen kolledžan sait (gksyzran.ru). (ven.)

[5] Sizranin čomamahtoiden i kul'turan kolledžan sait (szr-coll-isk.ru). (ven.)

[1]

[2]

[3]

[4]

[5]