Tarnogan rajon

Tarnogan rajon
Тарногский район

Znam	Flag
Valdkund	Venäma
Administrativine keskuz	Tarnogan Lidnut
Eläjiden lugu (2015)	11,795 ristitud
Pind	5,181,55 km²

Tarnogan rajon (ven.: Тарногский район) om rajon Vologdan agjas.

Administrativine keskuz om Tarnogan Lidnut-žilo (pagin. Tarnog).

Istorii

Rajonan aluz om pandud vl 1935 vilukun 25. päiväl Pohjoižhe randha, i vodhe 1936 tal'vkun 5. päivhäsai rajon mülüi sihe kuti administrativine ühtnik. Vozil 1936−1937 oli Pohjoižen agjan palaks. Vs 1937 sügüz'kun 23. päiväspäi mülüb Vologdan agjaha. Vozil 1963−1964 Nüksenican rajonan territorii mülüi Tarnogan rajonha. Rajon om olmas nügüdläižiš röunoiš vspäi 1965.

Geografijan andmused

Tarnogan rajon sijadase agjan pohjoižpäivnouzmas. Pind — 5 181 nellikkilometrad. Mec otab territorijan nell' videndest (4258 km²). Pedajikod, koivikod da kuzištod oma enambuses.

Om röunoid nellänke Venäman rajonanke:

• päivnouzmas Vologdan agjan Nüksenican rajonanke;
• suves Vologdan agjan Tot'man rajonanke;
• päivlaskmas Vologdan agjan Verhovažjen rajonanke;
• pohjoižes Arhangel'skan agjan Ustjan rajonanke.

Reljef om kukhikaz keskuses, päivlaskmas da suves, tazo päivlaskmas, sokaz pohjoižes. Znamasižed joged oma Kokšen'g (Ustjan ližajogi) sen huran Uftüg-ližajogenke. Suhon-jogi om rajonan suvipäivnouzmaižeks röunaks. Om 9 pen't järved (kaik penemba 1 km², no erased 20..30 m süvütte). Kaik joged mülüdas Pohjoižen Dvinan (Jävaldmeren) basseinha.

Londuseližed varad oma turbaz, sauvondmaterialad (saved, (gravii, letked), mouckivi, mec, reskvezi.

Vs 2009 sulakun 8. päiväspäi rajonan territorii alajagase 6 küläkundha.

Tobmuz

Vs 2009 keväz'kun 1. päiväspäi Sergei Gusev om valitud i radab rajonan da sen administracijan pämehen kahtenden strokun, viž vot valdatusiden strokunke. Rajonan pämehen järgenduseližed valičendad oliba vl 2014 sügüz'kun 14. päiväl, kaik rahvaz valiči händast. Kaks' administracijan varapämest oma hänele abhu. Koume ohjandust, 10 palakundad da üks' komitet alištudas rajonan administracijale.

Käskusenandai tobmuz om Ezitajiden Suim (ven. Представительное собрание) 15 ühtnijanke. Kaik rahvaz valičeb heid nelläks vodeks. Järgvaličendad sihe oliba vl 2014 sügüz'kun 14. päiväl (videnz' kucund). Valentina Popova radab sen ezimehen vl 2015.

Vspäi 2012 Kundaline Nevondkund (ven. Общественный Совет) radab rajonas (12 ühtnijad vl 2014).

Eläjad

Vn 2010 Venäman rahvahanlugemižen mödhe eläjiden lugu oli 12 838 ristitud.

Kaik om 266 eländpunktad rajonas, sidä kesken viž žilod da 261 küläd. Ei ole toižid järedoid eländpunktoid.

Ižanduz

Rajonan ižandusen päsarakod oma mecan varhapanend da ümbriradmine (pilindmaterialad, cilindruidud parded), tor'vikveimtransport, maižanduz da sömtegimišt, turizm.

Irdkosketused

• Tarnogan rajonan oficialine sait (tarnoga-region.ru). (ven.)
• Tarnogan rajon Vologdan agjan ohjastusen oficialižel vologda-oblast.ru-portalal. (ven.) (angl.)