Verhojansk

Verhojansk
Верхоянск (ven.)
Үөһээ Дьааҥы / Верхоянскай (jakut.)

Lidnanznam	Flag
Valdkund	Venäma
Eläjiden lugu (2025)	745 ristitud
Pind	25 km²
Pämez'	Mihail Sadovnikov (reduku 2020—)
Telefonkod	+7−41 165-xx-xxx
Avtokod	14
Aigvö	UTC+9 (MSK+6)

Lidnan kart (2018)

Verhojansk (ven.: Верхоя́нск, jakut.: Үөһээ Дьааҥы / Верхоянскай) om Venäman lidn da lidnankund Saha Tazovaldkundan pohjoižes. Se om Verhojanskan rajonan üks'jäine lidn. Mail'man kaikiš vilumb eländpunkt lidnan statusanke (−67,8 C° vn 1892 uhokus).

Istorii

Eländpunktan aluz om pandud vl 1638 Posnik Ivanoval kuti kozakoiden tal'veline eländsija. Se sai lidnan statusad vl 1817. Šingotihe oigetud küksushe mehiden eländsijaks.

Nügüd'aigan mecpunktan ižanduzkeskuz, jogivaldmad da lendimport sijadasoiš lidnas, se šingotase karvpramozlal i maižandusel.

Geografijan andmused

Lidnan sijaduz rajonas i tazovaldkundas vn 2007 kartal

Lidn sijadase rajonan keskuzpalan pohjoižes, Jan-jogen oiktal randal (Jävaldmeren bassein), 127 m ü.m.t. keskmäižel korktusel.

Matkad Batagai-rajonkeskushesai om ühesakümne kaks' kilometrad pohjoižpäivnouzmha avtotedme, Jakutskhasai om 650 km suvhe orhal. Toine lähembaine lidn om Vilüisk 700 km suvipäivlaskmha.

Klimat om terav kontinentaline arktine, tal'v om kuiv i vilu lujas. Voden keskmäine lämuz om −14,5 C°, kezakun-elokun +11,5..+16,4 C°, tal'vkun-uhokun −41,6..−45,3 C°. Ekstremumad oma −67,8 C° (viluku, uhoku) i +38,0 C° (kezaku, heinku). Voib panda halad kezaaigan miččel taht kul (heinkun minimum om −3,2 C°). Ei voi olda sulasäd tal'vkus-uhokus, se oleleb harvoin lujas kül'mkus (maksimum +1,1 C°). Paneb sadegid 178 mm vodes, enamba kezakus-elokus (27..34 mm kus), vähemba tal'vkus-sulakus (5..8 mm kus). Il'man keskmäine vozne relätivine nepsuz om 69 %.

Tobmuz

Verhojansk om lidnankundan üks'jäižeks eländpunktaks.

Lidnankundan pämez' om sen Administracijan pämez'. Edeline lidnan pämez' om Jevgenii Potapov (sügüz'ku 2015 — reduku 2020).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 1 311 ristitud, rajonan kümnendez, vn 2021 — 828 ristitud. Kaik 1 131 eläjad oli lidnas vl 2017. Kaikiš suremb lidnan ristitišt oli kaks' tuhad eläjid vll 1998−2000.

Ortodoksižen hristanuskondan Pühän Jumalanmaman Blagoveššenjan puine päjumalanpert' oli vll 1823−1937, paloi lophu.

Openduz

Lapsiden opendusen aluzkundad oma kaks' päivkodid (nomer 1 i 2), keskškol M. L. Novgorodovan nimed, čomamahtoiden škol.

Professionaližen opendusen aluzkundad ratas Batagai-rajonkeskuses i lähembaižiš lidnoiš.

Galerei

• 
  Jogen bassein Verhojanskanno
• 
  Lidnan klimat kuidme (vn 2005 diagramm)
• 
  Sauptud lendimportan sauvuz vl 2009

Irdkosketused

• Lidnan tobmuden sait tazovaldkundan oficialižel portalal (verhoyansk.sakha.gov.ru) (ven.) (angl.) (jakut.) da sen vanh versii.