Udačnii

Udačnii
Удачный (ven.)
Удачнай (jakut.)

Lidnanznam	Flag
Valdkund	Venäma
Eläjiden lugu (2023)	13,349 ristitud
Pind	2 km²
Pämez'	Artur Prihod'ko (kül'mku 2012—)
Telefonkod	+7−41 136-xx-xxx
Avtokod	14
Aigvö	UTC+9 (MSK+6)

Udačnii (ven.: Уда́чный [ʊˈdatɕnɨj], jakut.: Удачнай — «satusekaz» vepsäks) om Venäman lidn da lidnankund Saha Tazovaldkundan päivlaskmas. Se om Mirnijan rajonan penemb lidn kahtespäi i koumanz' eländpunkt eläjiden lugun mödhe.

Istorii

Eländpunktan aluz om pandud vl 1967 samha diamantoid. Vspäi 1968 oli radnikžilon statusanke. Se om nimitadud «Udačnai»-kimberlitturun mödhe (ven.: Удачная). Toine kimberlitturu om «Zarnic» («lunad» vepsäks). Ühtištadihe severzid-se žiloid Udačnijha da anttihe lidnan statusad vl 1987. Enččed tarbhatomad žilod oma likvidiruidud: Vanh Udačnii vodele 1998 i Polärnii. Nügüd' kaks' lidnanlaptad om lidnas: Varmed (ven.: Надёжный, vspäi 1970, eläjad sirtas sišpäi) da Uz' lidn (ven.: Новый город, vspäi 1971).

Udačnijan ižandusen päsarak om diamantoiden samine tähäsai (ALROSA-kompanii).

Geografijan andmused

Lidn sijadase rajonan pohjoižpäivnouzmaižes čogas, Vilüin platol, 22 km Pohjoižes nabapirdaspäi suvhe, Daldin-jogen randoil (ven.: Далдын), Marh-jogen üläjoksmusel (ven.: Марха́ 1181 km pitte, Vilüin hura ližajogi), 380 m ü.m.t. keskmäižel korktusel.

Matkad Jakutskhasai om 930 km suvipäivnouzmha orhal i 1370 km avtotedme, Mirnii-rajonkeskushesai om 530 km suvhe. Toine lähembaine lidn om Nürb 450 km suvipäivnouzmha orhal vai 900 km avtol.

Klimat om subarktine. Tal'v om sorav kuiv, hätkeline da vilu lujas. Voden keskmäine lämuz om −12,7 C°, kezakun-elokun +10,1..+14,2 C°, kül'mkun-uhokun −29,8..−39,4 C°. Tal'ven ekstremum om −57,7 C° (viluku). Voib panda halad kezaaigan miččel taht kul, heinkun minimum om −4,1 C°. Paneb sadegid 326 mm vodes, enamba kezakus-elokus (46..59 mm kus), vähemba vilukus-keväz'kus (9..12 mm kus). Il'man keskmäine vozne relätivine nepsuz om 74,7 %.

Ei oleskele polärišt öd lidnas. Kaikiš lühüdamban päivän hätkeližuz om 2 časud 22 minutad (22. tal'vku). Polärine päiv jätktase 29 päivest (7. kezaku — 5. heinku).

Tobmuz

Polärnii-žilo (429 rist. vl 2013) mülüi lidnankundha Udačnijan ližaks, se seižui rahvahatoman vl 2017 i om likvidiruidud täuzin. Lidnankundan pind — 2 827,28 km².

Lidnankundan tobmuden pämez' om sen Administracijan pämez'. Lidnan Deputatoiden nevondkundan ezimez' om Väčeslav Faizulin.

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 12 613 ristitud, rajonan kudendez, vn 2021 lidnan — 12 930 ristitud. Lidnankundan i lidnan ristitišt oma tazostadud 11 835 eläjad lugule vl 2017. Kaikiš suremb lidnan ristitišt oli 19 603 eläjad vl 1989.

Ortodoksižen hristanuskondan ph. Serafim Sarovalaižen jumalanpert' om saudud vll 2011−2012.

Lapsiden opendusen aluzkundad oma severz'-se päivkodid, kaks' keskškolad (nomer 19 i 24), ližaopendusen keskuz, čomamahtoiden škol. Mirnii-lidnan Regionaližen tehnižen kolledžan filial om lidnan professionaližen opendusen aluzkundaks.

Transport

Tatanmaine civiline Polärnii-lendimport (PYJ / ПЛЯ / UERP) sijadase ühesas kilometras lidnaspäi päivlaskmha. Sišpäi tehtas reisid Moskvha, Novosibiskha da Irkutskha, mugažo tazovaldkundadme. Se om varalendimportaks rahvahidenkeskeižiden transpolärižiden reisiden täht.

Galerei

• 
  Lidnan tobmuden sauvuz (2019)
• 
  Ph. Serafim Sarovalaižen jumalanpert', vn 2019 nägu
• 
  «Udačnai»-diamantkaivuden nägu punolendimespäi vl 2004
• 
  Eländfartaliden toine nägu (2007)

Irdkosketused

• Lidnan tobmuden aluzkundoiden oficialine sait (мо-город-удачный.рф). (ven.)