Mirnii (Saha Tazovaldkund)

Mirnii
Мирный (ven.)
Мииринэй (jakut.)

Lidnanznam	Flag
Valdkund	Venäma
Eläjiden lugu (2023)	34,013 ristitud
Pind	15 km²
Pämez'	Aleksei Tonkih (sügüz'ku 2022—)
Telefonkod	+7−41 136-xx-xxx
Avtokod	14
Aigvö	UTC+9 (MSK+6)

Sil sanal voib olda toižid znamoičendoid; miše nähta niid, tulgat tänna.

Lidnan kart (2022)

Mirnii (ven.: Ми́рный, jakut.: Мииринэй / Мирнэй) om Venäman lidn da lidnankund Saha Tazovaldkundan päivlaskmas. Se om tazovaldkundan koumanz' lidn eläjiden lugun mödhe, Mirnijan rajonan administrativine keskuz.

Istorii

Vl 1955 avaitihe «Mir»-kimberlitturut, sen samine vedihe vll 1957−2001 kar'jermahtusel. Panihe eländpunktan alust vl 1955 samha diamantoid, nimitihe löudmižsijan mödhe. Vl 1959 Mirnii sai lidnan statusad.

Lidn om Jakutijan koumen rajonan diamantoiden samižen keskuseks, «Venäman diamantoiden pälidnaks». «ALROSA»-kompanijan päfater, sen energetikan tütärkompanijad, kaks' kaivust («Mir», «Internacional'nai») da küllästamižfabrik sijadasoiš täs. Toižed edheotandad oma leibtegim da maidtegim. Kivivoinümbriradai tegim om sauvomas.

Geografijan andmused

Lidnan sijaduz rajonas i tazovaldkundas vn 2007 kartal

Lidn sijadase Ireläh-jogen oiktal randal (jakut.: Иирэлээх, Vilüi-jogen bassein), 350 m ü.m.t. keskmäižel korktusel, vezivaradim om ülezjogen.

Matkad Jakutskhasai om 815 km päivnouzmha orhal vai 1270 km «Vilüi»-avtotedme. Lähembaižed lidnad oma Nürb 237 km pohjoižpäivnouzmha orhal vai 387 km avtotedme i Lensk 209 km suvhe orhal vai 234 km avtol.

Klimat om ven kontinentaline subarktižen röunal, lujas vilunke tal'venke. Voden keskmäine lämuz om −6,9 C°, kezakun-elokun +13,5..+17,2 C°, tal'vkun-uhokun −26,0..−30,4 C°. Ekstremumad oma −54,1 C° (tal'vku, viluku, uhoku) i +36,7 C° (eloku). Kezaaigan minimum om −5,5 C° (kezaku), tal'vaigan maksimum om +0,7 C° (uhoku). Voib panda halad kezaaigan miččel taht kul (heinkun minimum om −0,6 C°). Ei voi olda sulasäd tal'vkus (maksimum −0,6 C°) i vilukus (maksimum −4,0 C°). Paneb sadegid 317 mm vodes, enamba kezakus-elokus (46..53 mm kus), vähemba tal'vkus-sulakus (9..15 mm kus).

Tobmuz

Mirnii om lidnankundan üks'jäižeks eländpunktaks. Lidnankundan pind — 7 177,97 km².

Lidnankundan pämez' om sen Administracijan pämez'. Edeline lidnan Administracijan pämez' om Klim Antonov (keväz'ku 2017 — sügüz'ku 2022). Lidnan Nevondkundan ezimez' om Julija Mödova vn 2021 semendkuspäi.

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 37 188 ristitud, rajonan pol', vn 2021 — 34 035 ristitud. Kaik 35 376 eläjad oli lidnas vl 2017. Kaikiš suremb lidnan ristitišt oli 39..40 tuhad eläjid vll 1992 i 2002−2005 (40 tuh. rist. vl 2003).

Ortodoksižen hristanuskondan Eläban Eziauguižen Stroican jumalanpert', ph. Ezikuctud Ondrii-apostolan mez'jumalankodi i kaks' časounäd oma saudud lidnas.

Openduz

Lapsiden opendusen aluzkundad oma päivkodid, viž keskškolad (nomer 1, 7, 8, 12, 26), lapsiden da noriston sportskol.

Mirnijan regionaline tehnine kolledž i üläopendusen viž filialad (Jakutsk, Tomsk, Novosibirsk) oma lidnan professionaližikš aluzkundoikš.

Transport

Avtobusad oma kundaližeks transportaks lidnas da sen ümbrištos. Lidn ühtenzoitase avtotel Lenskan jogiportanke. «Vilüi»-avtote Jakutskhasai om saudud, no asfal'tkrepindata tobjimalaz, nell' sildad oma pordaigaližed sil. Voib sadas tal'vteidme Irkutskan agjahasai.

Tatanmaine civiline Mirnii-lendimport (МИР / MJZ / UERR / УЕРР, 363 tuh. passažiroid vl 2019) sijadase ani päivnouzmha lidnfartališpäi, uz' lendahtamižsarg om sauvomas i linneb vaumitud vn 2023 lopus. Se om varalendimportaks rahvahidenkeskeižiden reisiden täht Pohjoižamerikaspäi Azijha. Tehtas reisid Moskvha i Sibirin lidnoihe (Irkutsk, Jakutsk, Habarovsk, Novosibirsk).

Galerei

• 
  Mirnijan rajonan administracijan sauvuz (2019)
• 
  Eläban Eziauguižen Stroican jumalanpert', vn 2014 nägu
• 
  «ALROSA»-kompanijan päfater vl 2014
• 
  Zarnica-adivpert' (2019, «Lunad»)
• 
  Universaline teatraliž-kinokoncertine «Jakutsk»-keskuz vn 2014 kezakus
• 
  Mirnii-lendimportan sauvused vl 2019

Irdkosketused

• Lidnan tobmuden sait (мирный-саха.рф). (ven.)
• «Alrosa»-kul'tursportkompleksan sait (ksk.alrosa.ru). (ven.)
• Mirnijan politehnižen licein sait (mptl.ru). (ven.)