Nürb

Nürb
Нюрба (ven.)
Ньурба (jakut.)
	Lidnanznam;
Valdkund	Venäma
Eläjiden lugu (2023)	10,055 ristitud
Pind	19 km²
Pämez'	Gennadii Ignatjev; (sügüz'ku 2022—)
Telefonkod	+7−41 134-xx-xxx
Avtokod	14
Aigvö	UTC+9 (MSK+6)

Nürb (ven.: Нюрба́, jakut.: Ньурба) om Venäman lidn da lidnankund Saha Tazovaldkundan päivlaskmas. Se om Nürban rajonan administrativine keskuz da üks'jäine lidn.

Istorii

Eländpunktan aluz om pandud vl 1824 pästtud Vilüihe järven sijas. Vl 1958 Nürb kätihe lidnanvuiččeks žiloks. NSTÜ:n aigan se oli Jakutijan diamantoiden löudmižsijiden otandan kävutamižhe keskuz. Nürb sai lidnan statusad vn 1997 26. päiväl sügüz'kud. Nimituz libub evenkan Nürmagan-roduspäi «tomaridenke».

Nürban ižandusen päsarakod oma diamantoiden samine (ALROSA-kompanijan Nürban kivendkombinat, Venäman diamantoiden nelländez), sauvondmaterialiden pästand, sömtegimišt da kebn tegimišt.

Geografijan andmused

Lidn sijadase rajonan suvičogas, Vilüi-jogen hural randal, 119 m ü.m.t. keskmäižel korktusel.

Matkad Jakutskhasai om 600 km päivnouzmha orhal vai 760 km avtotedme. Lähembaine lidn om Vilüisk 170 km päivnouzmha orhal vai 214 km avtol.

Klimat om kontinentaline, tal'v om kuiv i lujas vilu. Voden keskmäine lämuz om −8,6 C°, kezakun-elokun +13,4..+17,2 C°, tal'vkun-uhokun −30,9..−35,0 C°. Ekstremumad oma −61,0 C° (tal'vku, viluku) i +35,2 C° (kezaku, heinku). Kezaaigan minimum om −13,8 C° (eloku), tal'vaigan maksimum om +1,1 C° (uhoku). Voib panda halad kezaaigan miččel taht kul (heinkun minimum om −1,6 C°). Ei voi olda sulasäd tal'vkus i vilukus (maksimum 0 C°). Paneb sadegid 459 mm vodes, enamba semendkus-sügüz'kus (50..66 mm kus), vähemba tal'vkus-sulakus (12..24 mm kus).

Tobmuz

Nürb om lidnankundan üks'jäižeks eländpunktaks.

Lidnankundan tobmuden pämez' om sen Administracijan pämez'. Edeline lidnan Administracijan pämez' om Aleksandr Ivanov (viluku 2018 — sügüz'ku 2022). Lidnan Deputatoiden nevondkundan ezimez' om Petr Innokentjev vn 2022 redukuspäi.

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 10 157 ristitud, rajonan ristitišton kaks' videndest, vn 2021 — 10 138 ristitud. Kaik 9 850 eläjad oli lidnas vl 2017. Kaikiš suremb lidnan ristitišt oli 11 934 eläjad vl 1989.

Ortodoksižen hristanuskondan ph. Mikulai-čudonsädajan jumalanpert'^[1] om udessündutadud lidnas. Edeline ph. Mikulai-čudonsädajan jumalanpert' (1850−1905) paloi lophu^[2].

Openduz

Lapsiden opendusen aluzkundad oma koume nimitadud i nomeruidud päivkodid («Kitalik», nomer 1 «Tullukčaana» i nomer 2 «Kun Kuo»), kaks' keskškolad (nomer 1 i Ubojanan), sädamižen da innovacižtehnologijoiden keskuz, čomamahtoiden škol, rajonan lapsiden da norišton sportškol.

Nürban tehnikum^[3] om lidnan professionaližen opendusen aluzkundaks.

Transport

Valdmad ratas Vilüi-jogen randal.

Regionaline civiline Nürban lendimport (NYR / НЮР) sijadase lidnan pohjoižes. Tehtas reisid Jakutskhasai da čarterreisid Suntarha i Irkutskannoks.

Homaičendad

↑ Nürban pühäpertin sait (yakutia-12.cerkov.ru). (ven.)
↑ Nürban pühäpertid sobory.ru-saital. (ven.)
↑ Nürban tehnikuman sait (nyr-nt.obr.sakha.gov.ru). (ven.)

Irdkosketused

Lidnan sait Saha (Jakutijan) Tazovaldkundan oficialižel portalal (nyurba.sakha.gov.ru). (ven.) (angl.) (jakut.)

Nürb Vikiaitas

	Saha Tazovaldkundan lidnad
	Aldan \| Jakutsk \| Lensk \| Mirnii \| Nerüngri \| Nürb \| Olökminsk \| Pokrovsk \| Srednekolimsk \| Tommot \| Udačnii \| Verhojansk \| Vilüisk

[1] Nürban pühäpertin sait (yakutia-12.cerkov.ru). (ven.)

[2] Nürban pühäpertid sobory.ru-saital. (ven.)

[3] Nürban tehnikuman sait (nyr-nt.obr.sakha.gov.ru). (ven.)

[1]

[2]

[3]