Verhovažjen rajon

Verhovažjen rajon
Верховажский район
Znam;	Flag;
Valdkund	Venäma
Administrativine keskuz	Verhovažje
Eläjiden lugu (2015)	13,133 ristitud
Pind	4,255,47 km²

Verhovažjen rajon (ven.: Верховажский район) om rajon Vologdan agjas.

Administrativine keskuz om Verhovažje-žilo.

Istorii[vajehta | vajehtada lähte]

Rajonan aluz om pandud vl 1929 heinkun 15. päiväl Pohjoižen randan Nändoman ümbrikho. Vl 1930 heinkun 30. päiväl heitihe ümbrikod, sid' vozil 1930−1931 da 1935−1936 Verhovažjen rajon mülüi Pohjoižhe randha kuti administrativine ühtnik. Vozil 1931−1935 rajonan territorii oli ühtnenu Vel'skan rajonanke. Vozil 1936−1937 rajon mülüi Pohjoižhe agjaha. Vs 1937 sügüz'kun 23. päiväspäi mülüb Vologdan agjaha. Rajon om olmas nügüdläižiš röunoiš vspäi 1935.

Geografijan andmused[vajehta | vajehtada lähte]

Verhovažjen rajon sijadase agjan pohjoižes. Pind — 4 255 nellikkilometrad. Mec otab territorijan 86% (3662 km²), kavag'mecad (kuz', pedai) da koivikod oma enambuses. Rajonan piduz suvespäi pohjoižhe — 70 km, päivnouzmaspäi päivlaskmha — 85 km.

Om röunoid seičemenke Venäman rajonanke:

päivnouzmas Vologdan agjan Tarnogan rajonanke;
suves Vologdan agjan Tot'man rajonanke;
suvipäivlaskmas Vologdan agjan Sämžan rajonanke;
päivlaskmas Vologdan agjan Vožegan rajonanke;
lodehes Arhangel'skan agjan Konošan rajonanke;
pohjoižes Arhangel'skan agjan Vel'skan rajonanke;
pohjoižpäivnouzmas Arhangel'skan agjan Ustjan rajonanke.

Reljef om kukhikaz päivlaskmas (Ülävagan kukkazsel'g) süviden jogialangištoidenke, tazo päivnouzmas, sokaz sijidme. Znamasine jogi om Vag sen Kuloi- (oiged) da Pežm- (hura) ližajogidenke. Om severz'-se penid järvid (penemba 1 km²). Kaik joged mülüdas Pohjoižen Dvinan (Jävaldmeren) basseinha.

Londuseližed varad oma turbaz, sauvondmaterialad (mouckivi, letked, gravii, saved), mec, reskvezi.

Vs 2015 kezakun 25. päiväspäi rajonan territorii jagase 12 küläkundaks.

Tobmuz[vajehta | vajehtada lähte]

Vs 2012 keväz'kun 4. päiväspäi Gennadii Nepomilujev om valitud i radab rajonan da sen administracijan pämehen. Hänen valdatusiden strok om nell' vot. Kaks' administracijan varapämest oma hänele abhu. Viž ohjandust, 11 palakundad, 1 komitet da 2 laudkundad alištudas rajonan administracijale.

Käskusenandai tobmuz om Ezitajiden Suim (ven. Представительное собрание) 17 ühtnijanke. Kaik rahvaz valičeb heid nelläks vodeks. Järgvaličendad sihe oliba vl 2012 keväz'kun 4. päiväl (videnz' kucund). Vladimir Poležajev radab sen ezimehen vl 2015.