Kubenansun rajon

Kubenansun rajon
Усть-Кубинский район

Znam	Flag
Valdkund	Venäma
Administrativine keskuz	Ustje
Eläjiden lugu (2015)	7,912 ristitud
Pind	2,444 km²

Kubenansun rajon (ven.: Усть-Кубинский район) om rajon Vologdan agjas.

Administrativine keskuz om Ustje-külä (rajonan ristitišton pol').

Istorii

Rajonan aluz om pandud vl 1929 heinkun 15. päiväl Pohjoižen randan Vologdan ümbrikho. Vl 1930 heinkun 30. päiväl heitihe ümbrikod, i vodhe 1936 tal'vkun 5. päivhäsai rajon mülüi Pohjoižhe randha kuti administrativine ühtnik. Vozil 1936−1937 oli Pohjoižen agjan palaks. Vs 1937 sügüz'kun 23. päiväspäi mülüb Vologdan agjaha. Vozil 1960−1965 rajonan territorii mülüi Sokolan rajonha. Rajon om olmas nügüdläižiš röunoiš vspäi 1965.

Geografijan andmused

Kubenansun rajon om Vologdan agjan kesktaho. Pind — 2 444 km², sidä kesken mec otab kaks' koumandest (1684 nellikkilometrad), kavag'mec da lehtezmec ühteverzin. Rajonan piduz suvespäi pohjoižhe — 80 km, päivnouzmaspäi päivlaskmha — 40 km.

Om röunoid 5 Vologdan agjan rajonanke:

• päivnouzmas Harovskan rajonanke;
• suvipäivnouzmas da suves Sokolan rajonanke;
• suvipäivlaskmas Vologdan rajonanke;
• lodehes Kirillovan rajonanke;
• pohjoižes Vožegan rajonanke.

Znamasižed joged oma Kuben da Uftüg. Kaik joged mülüdas Kubenanjärven (Jävaldmeren) basseinha. Kubenanjärv om suvižel da suvipäivlaskmaižel röunoil. Kaik om 18 järved.

Reljef om tazo tobjimalaz, kukhikaz keskuses. Om äi penid soid. Kubenanjärven päivnouzmaine rand om sokaz alangišt.

Londuseližed varad oma turbaz, sauvondmaterialad (letked, gravii), mec, reskvezi.

Vs 2015 sulakun 28. päiväspäi rajonan territorii alajagase 4 küläkundha.

Tobmuz

Vs 2013 sügüz'kun 19. päiväspäi Mihail Lebedev radab rajonan da sen administracijan pämehen. Koume rajonan varapämest oma hänele abhu. Kaik rahvaz valičeb rajonan pämest videks vodeks. 5 ohjandust da 8 palakundad alištudas rajonan administracijale.

Käskusenandai tobmuz om rajonan parlament — Ezitajiden Suim (ven. Представительное Собрание) 15 ühtnijanke. Kaik rahvaz valičeb heid nelläks vodeks. Jelena Kalabaškina radab Suiman ezimehen vl 2015.

Vspäi 2012 Kundaline Nevondkund (ven. Общественный Совет) radab rajonas (12 ühtnijad).

Järgvaličendad Ezitajiden Suimha oliba vl 2013 sügüz'kun 8. päiväl, sil-žo päiväl valitihe rajonan pämest.

Eläjad

Vn 2010 Venäman rahvahanlugemižen mödhe eläjiden lugu oli 8 800 ristitud.

Kaik om 268 eländpunktad rajonas, sidä kesken 2 žilod da 266 küläd, niišpäi 108 oma kaikenaigažen ristitištonke. Toižid surid eländpunktoid ei ole.

Ižanduz

Ižandusen päsarakod oma jogitransport, mecan varhapanend i sen ümbriradmine pilindmaterialoihe, sömtegimišt da maižanduz, turizm.

Irdkosketused

• Kubenansun rajonan administracijan oficialine sait (kubena35.ru). (ven.)
• Kubenansun rajon agjan oficialižel vologda-oblast.ru-portalal. (ven.) (angl.)