Mozdok

Mozdok
Моздок (ven.)
Мæздæг (oset.)

Lidnanznam	Flag
Valdkund	Venäma
Eläjiden lugu (2017)	41 409 ristitud
Pind	17,0 km²
Pämez'	Sergei Džanžakov (2 012—)
Telefonkod	+7-86 736-xx-xxx
Avtokod	15
Aigvö	UTC+3 (MSK+0)

Mozdok (ven.: Моздок, oset.: Мæздæг) om Venäman lidn da lidnankund Pohjoižosetijan — Alanijan Tazovaldkundas. Se om tazovaldkundan kahtenz' surtte lidn, Mozdokan rajonan administrativine keskuz.

Istorii

Eländpunktan aluz om pandud vl 1763 kuti äirahvahaline lidnuz kabardalaižiden mas, kesked Mezdog-mectarhad (ven.: урочище Мездога). Vl 1770 kozakoiden 517 kanzad oliba sirtud sihe Volgan randpolespäi, Emil'jän Pugačovan pereh heiden keskes, valitihe Pugačovad Terekan sodavägen atamanaks.

Trakt ühtenzoiti Mozdokad Tiflisanke 1780-nzil vozil. Forštadt lidnusenke saiba Kavkazan gubernijan makundan lidnan statusad vl 1785. Mozdok šingotihe da änikoiči 19. voz'sadan ezmäižel nelländesel, oli järedaks torguindan keskuseks, tegimed radoiba pästamha muilad, vinad, karasinad, möihe kaikedme imperijadme. Sirtihe traktad polehe vl 1825, i änikoičend tuli lophu. Vl 1835 tühjitadihe Mozdokan lidnust.

Vl 1913 raudte tuli lidnha. Mozdok oli nacistižen Germanijan okkupacijan al nell' kud (23. eloku 1942 — 3. viluku 1943), se toi lujid vigoid ižandusele. Vspäi 1944 lidn om Pohjoižosetijan palaks.

Geografijan andmused

Lidn seižub tazovaldkundan pohjoižen pol'anklavan keskuses, Terek-jogen hural randal, 130 m keskmäižel korktusel valdmeren pindan päl, mecan da stepin zonas. Matkad Vladikavkazhasai om 84 km suvhe orhal vai 95 km avtotedme. Terekan da Kuman kanal augotase suvipäivlaskmha lidnaspäi. Lähembaine lidn om Ingušetijan Malgobek 30 km suvhe orhal.

Mozdok om lidnankundan üks'jäine eländpunkt. Lidnankundan pind om 35 km².

Eläjad

Vn 2010 kaiken Venäman rahvahanlugemižen mödhe eläjiden lugu oli 38 768 ristitud, rajonan ristitišton pol'. Kaikiš suremb ristitišt oli vozil 2002—2003, läz 43 tuhad eläjid.

Rahvahad (enamba 1%, vn 2010 Venäman rahvahanlugemižen mödhe): venälaižed — 59,1%, osetinalaižed — 8,3%, kumikad — 7,1%, armenijalaižed — 6,2%, čečenalaižed — 3,5%, kabardalaižed — 3,2%, turkad — 2,0%, korejalaižed — 2,0%, ukrainalaižed — 1,5%; toižed rahvahad — 5,6%, rahvahuden ozutandata — 1,5%.

Ižanduz da transport

Ižandusen päsarakod oma sömtegimišt (pästtas vinad, lihaproduktoid, leibäd) i tekstil'tegimišt (gardinoiden fabrik, omblendfabrik), mugažo biopreparatoiden tegim i kartonanfabrik oma olmas. Professionaližen opendusen aluzkundad: mehaniž-tehnologine tehnikum, professionaline škol, Vladikavkazan agrarižen mägiuniversitetan filial.

Avtobusad da taksid oma kundaližeks transportaks lidnas. Mozdok-raudtestancii Prohladnii — Gudermes jonol. Venäman strategine sodalendimport sijadase lidnan lodehližen röunan taga.

Irdkosketused

• Lidnankundan administracijan oficialine sait (mozdok-osetia.ru). (ven.)