Beslan

Beslan
Беслан (ven.)
Беслæн (oset.)
	Lidnanznam;
Valdkund	Venäma
Eläjiden lugu (2023)	36,011 ristitud
Pind	23,17 km²
Pämez'	Vadim Tatarov; (viluku 2020—)
Telefonkod	+7−86 737-xx-xxx
Avtokod	15
Aigvö	UTC+3 (MSK+0)

Beslan (ven.: Бесла́н, oset.: Беслæн) om Venäman lidn da lidnankund Pohjoižosetijan — Alanijan Tazovaldkundan päivnouzmas. Se om tazovaldkundan koumanz' lidn eläjiden lugun mödhe, Oigedrandaližen rajonan administrativine keskuz.

Istorii

Eländpunktan aluz om pandud vl 1847 kuti Tulatovo-žilo (ven.: село Тулатово, oset.: Бесланыкау) sijaližen Beslan Tulatov-manpidajan mödhe. Vl 1941 udesnimitihe Iriston-žiloks. Žilo sai lidnan statusad vl 1950 nügüdläiženke nimenke. Vn 2004 1. päiväl sügüz'kud lidn eli läbi teraktas ühtes lidnan keskškoloišpäi.

Beslan šingotase spirttegimišton koumel tegimel, vodkan koumel tegimel i šampanjvinan tegimel, söndtavaroiden pästandal (leibtegim), sauvondan materialiden (šebin', mecanümbriradai tegim) i tegesiden (savič, raudbetontegesed) edheotandoil, mugažo elektromehanine tegim (transformatorad) i omblendfabrik ratas.

Geografijan andmused

Lidn sijadase Terekan oiktal randal, 484 m keskmäižel korktusel valdmeren pindan päl.

Matkad Vladikavkazhasai om 16 km suvhe-suvipäivnouzmha. Toine lähembaine lidn om Nazran' (Ingušetii) kümnes kilometras päivnouzmha.

Tobmuz

Beslan om lidnankundan üks'jäižeks eländpunktaks.

Lidnan Ezitajiden suiman edeline ezimez' (municipaližen ühtnikan pämez') om German Hautov (reduku 2017 — viluku 2020). Lidnan Administracijan nügüdläine pämez' om Hariton Tatrov vn 2023 sulakuspäi. Edeližed lidnan Administracijan pämehed oma Boris Margiev (viluku 2020 — uhoku 2023), Stanislav Dzeboev (tal'vku 2017 — kül'mku 2019).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 36 728 ristitud, rajonan kaks' koumandest. Vl 2017 lidnan ristitišt oli 37 025 eläjad. Vspäi 2013 lidnan ristitišt om kaikiš suremb — läz 37 tuh. eläjid (37 400 rist. vl 2021).

Rahvahad (enamba 1 % vl 2010, ozutadud rahvahudenke): osetinalaižed — 83,4 %, venälaižed — 11,9 %, armenijalaižed — 1,3 %, toižed rahvahad — 3,4 %.

Hristanuskondan seičeme jumalanpertid (viž — ortodoksine^[1], kaks' — vižkümnenden päivän jumalankodikund) oma kaičenus i saudud lidnas. Islaman 20. voz'sadan augotišen mečet' om restavriruidud i avaitud tošti vspäi 2011.

Lapsiden opendusen aluzkundad oma severz'-se päivkodid, kümne keskškolad, gimnazii, muzikškol, čomamahtoine škol, kaks' sportškolad. Pohjoižosetijan valdkundaližen torguimiž-ekonomižen kolledžan palakund^[2] (edel 2021. vot profškol nomer 8) om lidnan professionaližen opendusen aluzkundaks.

Transport

Beslan om raudtesol'meks «Rostov — Baku»-jonol.

Rahvahidenkeskeine civiline Vladikavkaz (Beslan)-lendimport^[3] (OGZ / ВЛА / URMO, oset.: Дзæуджыхъæуы аэропорт, 705 tuh. passažiroid vl 2021) sijadase kahtes kilometras päivnouzmha lidnaspäi i 26 km pohjoižhe Vladikavkazaspäi avtoteidme. Sišpäi tehtas reisid Moskvha, Piterihe i Stambulha.

Galerei

Beslanan Memorial sauvomižes (2011)
Rist Beslanan školan nomer 1 zalas (2008)
Memorialine «Andeloiden lidn»-kaumžom vl 2009
Kul'turkeskuz i memorial pölištunuziden muštoks Suren sodan aigan (2008 vai sen aigemba)
Vladikavkaz-lendimportan terminal vl 2020
Beslan-päraudtestancijan sauvuz vl 2014