Vologdan rajon

Vologdan rajon
Вологодский район

Znam	Flag
Valdkund	Venäma
Administrativine keskuz	Vologd
Eläjiden lugu (2015)	51,930 ristitud
Pind	4,552 km²

Vologdan rajon (ven.: Вологодский район) om rajon Vologdan agjas.

Administrativine keskuz om Vologd-lidn. Nece lidn ei mülü rajonha. Rajonan tobmuden organad sijadasoiš siš.

Istorii

Rajonan aluz om pandud vl 1929 heinkun 15. päiväl Pohjoižen randan Vologdan ümbrikos. Sil aigal 1115 eländpunktad oli rajonas, eli 74 869 ristitud. Vl 1930 heinkun 30. päiväl heitihe ümbrikod, i vodhe 1932 kezakun 20. päivhäsai rajon mülüi Pohjoižhe randha kuti administrativine ühtnik. Sid' heitihe rajonad, jagoihe sen enččed territorijad lähižiden rajoniden keskes, alištihe ezilidnad Vologdan lidnnevondkundale. Vs 1938 sügüz'kun 1. päiväspäi udessündutihe rajonad jo Vologdan agjaha. Rajon om olmas nügüdläižiš röunoiš vspäi 1965, Šeksnan rajonan sädandan jäl'ghe.

Geografijan andmused

Vologdan rajon om Vologdan agjan keskuztaho. Pind — 4 552 km².

Om röunoid seičemenke Venäman rajonanke:

• pohjoižpäivnouzmas Vologdan agjan Kubenansun da Sokolan rajonidenke;
• päivnouzmas Vologdan agjan Jogidenkeskeižen rajonanke;
• suvipäivnouzmas Vologdan agjan Gräzovecan rajonanke;
• suves Jaroslavlin agjan Pošehonjen rajonanke;
• päivlaskmas Vologdan agjan Šeksnan rajonanke;
• lodehes Vologdan agjan Kirillovan rajonanke.

Znamasižed joged oma Vologd da Tošn', ned mülüdas Suhonanjogen (Jävaldmeren) basseinha. Pened joged lodehes da suves mülüdas Volgan (Kaspijan meren) basseinha. Kaikiš suremb vezišt om Kubenanjärv, rajonan pohjoižpäivnouzmaine röun mäneb sen keskedme.

Londuseližed varad oma turbaz, sauvondmaterialad (letked, saved), mec, reskvezi.

Vs 2009 sulakun 8. päiväspäi rajonan territorii jagase 12 küläkundaks.

Tobmuz

Rajonan administracijan pert' Vologdas

Vs 2005 redukun 2. päiväspäi Aleksandr Gordejev radab rajonan da sen administracijan pämehen koumanden strokun. Kaks' rajonan varapämest oma hänele abhu. Viž ohjandust da kaks' komitetad alištudas administracijale.

Käskusenandai tobmuz om Ezitajiden Suim (vozil 1993−2005 — Ičeohjandusen Komitet) 15 ühtnijanke, Andrei Klökov radab sen ezimehen vs 2012 sulakun 3. päiväspäi. Rajonan kaik rahvaz valičeb ezitajid nelläks vodeks.

Järgvaličendad Ezitajiden Suimha oliba vl 2012 keväz'kun 4. päiväl. Valitihe rajonan pämest järgkerdan vl 2013 sügüz'kun 8. päiväl.

Eläjad

Vn 2010 Venäman rahvahanlugemižen mödhe eläjiden lugu oli 50 438 ristitud.

Kaik om 924 eländpunktad rajonas, sidä kesken 885 küläd, 31 žilod, 6 raudtestancijad da 2 raudtesarakod.

Toižed sured eländpunktad oma Fedotovo-žilo (5,3 tuh. vl 2010) da Kubenskoje-žilo (3,2 tuh. vl 2010).

Ižanduz

Rajonan ižandusen päsarakod oma maižanduz da sömtegimišt, mecan ümbriradmine, turizm, mašinoiden paloiden tehmine.

Irdkosketused

• Vologdan rajonan administracijan oficialine sait (volraion.ru). (ven.)
• Tedod rajonas agjan oficialižes vologda-oblast.ru-portalaspäi. (ven.) (angl.)