Dorogobuž

Vikipedii-späi
Dorogobuž
Дорогобуж
 Lidnanznam
 Flag
Valdkund Venäma
Eläjiden lugu (2020) 9,357 ristitud
Pind 13,84 km²
Dorogobuž Дорогобуж
Pämez' Tat'jana Ovčinnikova
(reduku 2020—,
Татьяна Овчинникова)
Telefonkod +7−48 144-xx-xxx
Avtokod 67
Aigvö UTC+3 (MSK+0)


Dorogobuž (ven.: Дорогобу́ж) om Venäman lidn da lidnankund Smolenskan agjan keskuzpalas. Se om Dorogobužan rajonan administrativine keskuz i kahtenz' surtte eländpunkt.

Istorii[vajehta | vajehtada tekst]

Eländpunkt mainitase ezmäižen kerdan 13. voz'sadan augotišes Venän arhijerejan «О погородии»-kirjeižes («Lidnoiden mödhe»). Sen aluz om pandud kuti lidn kaičemha Smolenskan ruhtinazkundan päivnouzmad londoišpäi. Nimituz libub amuižvenän kelen дороги бужать-sanoišpäi «sildatada teid», буж znamoiči «mägi» mugažo.

Vll 1404−1503 lidn oli Suren Litvanman ruhtinazkundan palaks. Sid' lidn oli makundan keskuseks Venäs, puine lidnuz oli saudud siš. Vl 1530 järedan Boldinon mez'jumalankodin aluz om pandud 13 kilometras päivnouzmha lidnaspäi, lidnusenke. Lidnan territorii oli sodaridan objektaks Pol'šanman i Venäman keskes 17. voz'sadan ühtendel polel. Dorogobuž eli läbi lujiš lämoipaloiš vll 1763 i 1812. Toižen mail'man sodan aigan lidn oli okkupiruidud (5. reduku 1941 — 15. uhoku 1942, 7. kezaku 1942 — 1. sügüz'ku 1943) i muretud läz täuzin, Boldinon jumalankodi oli pandud mantazole.

Dorogobuž šingotase himižel tegimel[1] (mineraližed heretused i niiden substancijad) kudes kilometras päivnouzmha lidnaspäi i avtodromal.

Geografijan andmused[vajehta | vajehtada tekst]

Lidn sijadase Dnepr-jogen üläjoksmusen molembil randoil, 210 m ü.m.t. keskmäižel korktusel. Matkad Smolenskhasai om 80 km päivlaskmha orhal vai 87 km avtotel. Lähembaižed lidnad oma Jel'n' (raudtestancii) 38 km suvhe orhal vai 41 km avtotedme, Jarcevo (raudtestancii) 42 km lodeheze orhal vai 63 km avtotedme, i Safonovo (lähembaine passažirraudtestancii) 22 km pohjoižhe orhal vai 24 km avtotedme. Kaks' avtotesildad om saudud Dnepras päliči. Raudtesarak tuleb lidnha Safonovo-lidnaspäi, se radab vaiše jüguiden täht. Rajonan znamasine lidnanvuitte Verhnedneprovskii-žilo om kümnes kilometras pohjoižhe-pohjoižpäivnouzmha.

Dorogobuž om lidnankundan üks'jäine eländpunkt. Lidnankundan pind — 13,84 km².

Eläjad[vajehta | vajehtada tekst]

Vl 1939 lidnan ristitišt oli 8 522 eläjad. Vn 2010 Venäman rahvahalugemižen mödhe lidnan eläjiden lugu oli 11 100 ristitud, rajonan kaks' videndest. Kaikiš suremb lidnan ristitišt oli enamba 13 tuhad eläjid vll 1913, 1992−2000 (13 600 rist. vl 1996). Vl 2017 lidnan ristitišt oli 9 966 eläjad.

Rahvahad (2010): venälaižed — 96,1 %, ukrainalaižed — 1,4 %, toižed rahvahad — 2,5 %.

Ortodoksižen hristanuskondan kaks' jumalanpertid, koume časounäd i ph. Dimitrijan Solunalaižen naižjumalankodi[2] oma olmas lidnas, sidä kesken phh. Pedroin da Pauloin jumalanpert' i puine Jumalanmaman Kazanin jumalaižen pühäpert'.

Lähembaine professionaližen opendusen aluzkund om Verhnedneprovskijan tehnologine tehnikum.

Edeline lidnankundan pämez' (Deputatoiden Nevondkundan ezimez') om Irina Bahmat (reduku 2015 — reduku 2020). Vll 2005−2015 lidnankundan Administracii oli olmas, nügüd' rajonan administracii tegeb sen velgusidme.

Galerei[vajehta | vajehtada tekst]

Homaičendad[vajehta | vajehtada tekst]

  1. Himižen «Dorogobuž»-tegimen lehtpoled acron.ru-saital. (ven.) (angl.)
  2. Dorogobužan pühäpertid sobory.ru-saital. (ven.)

Irdkosketused[vajehta | vajehtada tekst]



Smolenskan agjan lidnad
Demidov | Desnogorsk | Dorogobuž | Duhovščin | Gagarin | Jarcevo | Jel'n' | Počinok | Roslavl' | Rudn' | Safonovo | Sičovk | Smolensk | Veliž | Väz'm