Väz'm

Väz'm
Вязьма
Lidnanznam;	Flag;
Valdkund	Venäma
Eläjiden lugu (2018-01-01)	52,506 ristitud
Pind	50,1 km²
Pämez'	Aleksandr Grigorjev; (heinku 2014—)
Telefonkod	+7-48 131-xx-xxx
Avtokod	67
Aigvö	UTC+3 (MSK+0)

Väz'm (ven.: Вя́зьма) om Venäman lidn, lidnankund da transporttesol'm Smolenskan agjan pohjoižpäivnouzmas. Se om agjan kahtenz' lidn eläjiden lugun mödhe, Väz'man rajonan administrativine keskuz. Vspäi 2009 Väz'm om «sodahoštusen lidn»-arvnimenke.

Istorii[redaktiruida | redaktiruida purde]

Eländpunkt mainitaškanzihe vspäi 1239 kuti anttud valdoičemha Väz'm-lidn Kijevan Vladimir Rürikovičun Andrei-poigale. Vll 1403−1493 oli Suren Litvanman ruhtinazkundan palaks. Eziauguižešti puine Kreml'-lidnuz oli saudud tošti vodele 1632 kivižel variantal, sen pühäpertid i üks' čuhunduz oma kaičenus. Väz'm sai makundan lidnan oficiališt statusad vl 1776. Toižen mail'man sodan aigan lidn oli okkupiruidud (7. reduku 1941 — 12. keväz'ku 1943).

Väz'm šingotase mašinansauvomižen tegimel (pezend- i puhtastandmašiništ), sauvondmaterialiden pästandal (pertid brusaspäi, savič, raudbetontegesed, raudbetonšpalad, polimerkerteh), sömtegimištol (leibänkombinat, kalategim), sintetižiden produktoiden tegimel (sömližadused, vahad, voižimed), brusitan, plastiktegesiden i grafittegesiden edheotandoil, pölvhankombinatal, nahktegimel i järedal omblendfabrikal (specialižed sobad da kengäd, kaičendabutused). Raudtetransportan edheotandad ratas lidnas.

Geografijan andmused[redaktiruida | redaktiruida purde]

Lidn sijadase rajonan keskuzpalas, ühtennimižen jogen randoil (ven.: Вязьма 147 km pitte, Dnepran üläjoksmusen hura ližajogi), 255 m ü.m.t. keskmäižel korktusel. Bozn'-järv (ven. Бозня 5 km²) om lidnan päivnouzmaižel röunal. Matkad Smolenskhasai om 150 km päivlaskmha-suvipäivlaskmha orhal, 166 km avtotel vai 169 km raudtel. Lähembaižed lidnad oma Juhnov (Kalugan agj) 79 km suvipäivnouzmha orhal vai 96 km avtotedme, Safonovo i Dorogobuž 68 km da 71 km päivlaskmha-suvipäivlaskmha orhal, 75 km da 87 km avtotedme vai raudtedme, i Sičovk 69 km pohjoižhe orhal, 73 km avtotedme vai raudtedme. «Smolensk — Moskv»-avtote mäneb lidnan pohjoižröunaks. «Smolensk — Moskv»-raudte läbitab lidnad. Väz'm-raudtestancii radab lidnan suvipalas vspäi 1870. Toine stancii om Väz'm-Bränskai (ven.: Вязьма-Брянская) 6 kilometras, om avaitud vl 1930 i sijadase lähižes ühtennimižes žilos.

Väz'm om lidnankundan üks'jäine eländpunkt.

Eläjad[redaktiruida | redaktiruida purde]

Vl 1939 lidnan ristitišt oli 33 774 eläjad. Vn 2010 Venäman rahvahanlugemižen mödhe lidnan eläjiden lugu oli 54 600 ristitud, rajonan kaks' koumandest. Kaikiš suremb lidnan ristitišt oli 60 500 eläjad vl 1996. Ortodoksižen hristanuskondan Johann-endustajan naižjumalankodi, Stroican päjumalanpert' i kuz' pühäpertid oma olmas lidnas.

Rahvahad (2010): venälaižed — 94,9%, ukrainalaižed — 1,2%, toižed rahvahad — 3,9%.

Professionaližen opendusen aluzkundad oma Väz'man politehnine tehnikum^[1], Väz'man raudtetehnikum^[2], Väz'man medicinine kolledž^[3], Väz'man aeroklub.

Galerei[redaktiruida | redaktiruida purde]

Lidnusen Spasskai-čuhunduz
Ph. Stroican päjumalanpert'
Vedimdepo
Kul'turkeskuz (2013)
Väz'm-päraudtestancii

Homaičendad[redaktiruida | redaktiruida purde]

Irdkosketused[redaktiruida | redaktiruida purde]

Lidnan oficialine sait (mgorv.ru). (ven.)

Väz'm Vikiaitas

	Smolenskan agjan lidnad
	Demidov \| Desnogorsk \| Dorogobuž \| Duhovščin \| Gagarin \| Jarcevo \| Jel'n' \| Počinok \| Roslavl' \| Rudn' \| Safonovo \| Sičovk \| Smolensk \| Veliž \| Väz'm

[1] Väz'man politehnižen tehnikuman sait (technicum.ru). (ven.)

[2] Väz'man raudtetehnikuman sait (vzt67.ru). (ven.)

[3] Väz'man medicinižen kolledžan sait (vyazmamed.ru). (ven.)

[1]

[2]

[3]