Rudn' (lidn)

Rudn'
Рудня

Lidnanznam
Valdkund	Venäma
Eläjiden lugu (2021)	8,908 ristitud
Pind	14,79 km²
Pämez'	Jelena Škol'skaja (reduku 2020—)
Telefonkod	+7−48 141-xx-xxx
Avtokod	67
Aigvö	UTC+3 (MSK+0)

Rudn' (ven.: Ру́дня) om Venäman lidn da lidnankund Smolenskan agjan päivlaskmas. Se om Rudnän rajonan administrativine keskuz.

Istorii

Eländpunkt mainitase ezmäižen kerdan vl 1323 kuti Rodn' (ven.: Ро́дня, pol'š.: rodny «väghine, kazvateline»). Nügüdläine lidnan nimi libub Rudn'-jogen nimitusespäi (ven.: Рудня vedenke rostken mujun). Vl 1856 «Vitebsk — Smolensk»-trakt läbiti žilod, vspäi 1868 «Rig — Orel»-raudte mäneb eländpunktadme. Žilo sai lidnan statusad vl 1926. Toižen mail'man sodan aigan lidn oli okkupiruidud (14. heinku 1941 — 29. sügüz'ku 1943).

Rudn' šingotase sömtegimištol (maidkonservtegim, leibänkombinat), pölvhan ümbriradmižen edheotandal. Lidn om živatvodindan rajonan keskuz. Stöklantegim (himižed astjad i termometrad, pol'kalližarvoižed ratud kived, bankad) radab 20 kilometras lidnaspäi čuradusel Smolenskannoks lidnanvuiččes Golinki-žilos.

Geografijan andmused

Lidn sijadase rajonan suvipalas, Pen' Berezin-jogen randoil (ven.: Малая Березина 43 km pitte, Dnepran oigedpol'ne bassein), 190 m ü.m.t. keskmäižel korktusel.

Matkad Vaugedvenäman röunhasai (Vitebskan agj) om kuz' kilometrad lodeheze orhal, Smolenskhasai om 55 km päivnouzmha-suvipäivnouzmha orhal, 59 km avtotel vai raudtel. Toižed lähembaižed lidnad oma Demidov 45 km pohjoižpäivnouzmha orhal vai 48 km avtotedme, Vitebsk (Vaugedvenäma) 60 km lodeheze orhal, 62 km avtotedme vai raudtedme, i Orš (Vaugedvenäma) 64 km suvipäivlaskmha orhal, 91 km avtotedme vai 130 km raudtedme. «Vitebsk — Smolensk»-mante ümbärdab lidnad pohjoižröunaks. Rudn'-raudtestancii radab lidnan keskuzpalan päivlaskmas.

Tobmuz

Rudn' om lidnankundan üks'jäižeks eländpunktaks. Lidnankundan pind — 14,79 km².

Lidnankundan pämez' om sen Nevondkundan ezimez'. Edeline lidnan pämez' om Sergei Kostin (sügüz'ku 2015 — reduku 2020). Lidnankundan erigoittud administracii om likvidiruidud vn 2016 kül'mkus, Natal'ja Holomjeva radoi sen jäl'gmäižen pämehen vn 2013 sulakuspäi.

Eläjad

Vl 1939 lidnan ristitišt oli 7 347 eläjad. Vn 2010 Venäman rahvahalugemižen mödhe lidnan eläjiden lugu oli 9 300 ristitud, rajonan kaks' videndest. Kaik 9 484 eläjad oli lidnas vl 2017. Kaikiš suremb lidnan ristitišt oli 10..11 tuhad eläjid vll 1970−2001 (11 032 rist. vl 1989).

Rahvahad (2010): venälaižed — 95,1 %, vaugedvenälaižed — 1,7 %, armenijalaižed — 1,0 %, toižed rahvahad — 2,2 %.

Ortodoksižen hristanuskondan kaks' jumalanpertid oma saudud i avaitud lidnas: Jumalanmaman Kazanin jumalaižen (2000−2004) i ph. Jurgii-vägestusenkandajan (2016). Niiden ližaks Pühän Hengen Tulendan jumalanpert' ei ole kaičenus.

Privatine Rudnän nügüd'aigaižiden tehnologijoiden kolledž oli lidnan professionaližen opendusen aluzkundaks edel vn 2022 kül'mkud. Valdkundaližed profopendusen aluzkundad ratas lähembaižiš lidnoiš.

Galerei

• 
  Jumalanmaman Kazanin jumalaižen jumalanpert', vn 2018 nägu
• 
  Mihail Jegorov-sodamehen muzei vl 2018 (pani nevondkundališt flagad Saksanman parlamentan päle kahten kesken)
• 
  Rudn' -raudtestancii vl 2018

Irdkosketused

• Lidnankundan tobmuden aluzkundoiden sait (rudnya.admin-smolensk.ru). (ven.)