Sičovk

Sičovk
Сычёвка

Lidnanznam
Valdkund	Venäma
Eläjiden lugu (2018-01-01)	8 220 ristitud
Pind	7,9 km²
Pämez'	Tat'jana Parahina (kül'mku 2 015—)
Telefonkod	+7-48 130-xx-xxx
Avtokod	67
Aigvö	UTC+3 (MSK+0)

Sičovk (ven.: Сычёвка) om Venäman lidn da lidnankund Smolenskan agjan pohjoižpäivnouzmas. Se om Sičovkan rajonan administrativine keskuz.

Istorii

Eländpunkt mainitaškanzihe vspäi 1448. Sai makundan lidnan oficiališt statusad vl 1776. Toižen mail'man sodan aigan lidn oli okkupiruidud nacistoil (10. reduku 1941 — 8. keväz'ku 1943).

Sičovk šingotase sömtegimištol (maidtegim, lihakombinat, leibtegim), vhesai 2014 elektrodiden tegim radoi mugažo.

Geografijan andmused

Lidn sijadase rajonan keskuzpalan päivnouzmas, kukhikahas i vanoikahas tahondas, Vazuz-jogen (ven.: Вазуза 162 km pitte, Volgan üläjoksmusen oiged ližajogi) i sen huran Losmin-ližajogen (ven. Лосмина, 49 km) keskes niiden ühthejoksmusenno, 200 m ü.m.t. keskmäižel korktusel. Vazuzan vezivaradim (97 km², 177 m ü.m.t.) zavodiše 1 km pohjoižpäivnouzmha lidnaspäi. Matkad Smolenskhasai om 182 km suvipäivlaskmha orhal, 235 km avtotel vai 250 km raudtel. Lähembaižed lidnad oma Gagarin 54 km suvipäivnouzmha orhal, 89 km avtotedme vai 142 km raudtedme, Väz'm 69 km suvhe orhal, 73 km avtotedme vai raudtedme, Ržev i Zubcov (molembad oma Tverin agjas) 44 km pohjoižhe orhal, 50 km avtotedme vai raudtedme. «Väz'm — Zubcov»-avtote mäneb 1 km päivnouzmha lidnaspäi i om ühtenzoittud Sičovkanke 2-kilometrižel sarakol. «Väz'm — Ržev»-raudte läbitab lidnan päivnouzmad. Sičovk-raudtestancii radab lidnan pohjoižes.

Sičovk om lidnankundan üks'jäine eländpunkt. Lidnankundan pind — 7,9 km².

Eläjad

Vl 1939 lidnan ristitišt oli 8 428 eläjad. Vn 2010 Venäman rahvahanlugemižen mödhe lidnan eläjiden lugu oli 7 500 ristitud, rajonan koume videndest. Kaikiš suremb lidnan ristitišt oli 8 300 eläjad vl 1913 i enamba 9 tuhad eläjid vll 1989−1996 (9 643 eläjad vl 1989).

Rahvahad (2010): venälaižed — 96,5%, ukrainalaižed — 1,2%, toižed rahvahad — 2,3%.

Professionaližen opendusen aluzkund om Väz'man politehnižen tehnikuman Sičovkan filial.

Galerei

• 

  Sijaližen tobmuden pert' (2009)

• 

  Blagoveššenjan jumalanpert'
  (vn 2008 fotokuva)

• 

  Vazuz-jogi

• 

  Kinoteatr (2009)

Irdkosketused

• Lidnan Ezitajiden nevondkundan sait (sovet-sichgor.admin-smolensk.ru). (ven.)
• Lidnan da rajonan tobmuden aluzkundoiden oficialine sait (sychevka.admin-smolensk.ru). (ven.)