Jel'n'

Jel'n'
Ельня
Lidnanznam;	Flag;
Valdkund	Venäma
Eläjiden lugu (2024)	7,911 ristitud
Pind	15 km²
Pämez'	Marina Novikova; (reduku 2020—)
Telefonkod	+7−48 146-xx-xxx
Avtokod	67
Aigvö	UTC+3 (MSK+0)

Jel'n' (ven.: Е́льня) om Venäman lidn da lidnankund Smolenskan agjan lodehes. Se om Jel'nän rajonan administrativine keskuz. Om «sodahoštusen lidn»-arvnimenke vn 2007 redukuspäi.

Istorii

Eländpunkt mainitaškanzihe Smolenskan Rostislav-ruhtinasen käskkirjeižes vl 1150 kuti Jeln (ven.: Елна), sen jändused oma kaičenus Desnan hural randal. Lidnan territorii oli ridan objektaks Venän i Litvanman keskes. Vspäi 1654 om Venäman palaks. Vl 1776 sai makundan lidnan statusad. Toižen mail'man sodan aigan lidn oli okkupiruidud (18. heinku — 6. sügüz'ku 1941 i 6. reduku 1941 — 30. eloku 1943).

Jel'n' šingotase mecanpilindal i savičun tegimel.

Geografijan andmused

Lidn sijadase rajonan päivlaskmas, Smolenskan-Moskvan ülüden vedenjagajal tazangištol, Desn-jogen üläjoksmusen oiktal randal tobjimalaz (Dnepran hura ližajogi), 225 m ü.m.t. keskmäižel korktusel.

Matkad Smolenskhasai om 77 km päivlaskmha-lodeheze orhal, 108 km avtotel vai 80 km raudtel. Toižed lähembaižed lidnad om Dorogobuž 38 km pohjoižhe orhal vai 41 km avtotedme, Spas-Demensk (Kalugan agj) 57 km päivnouzmha orhal, 67 km avtotedme vai raudtedme, Desnogorsk 48 km suvhe orhal vai 57 km avtotedme, i Počinok 52 km päivlaskmha-suvipäivlaskmha orhal, 56 km avtotedme vai 130 km raudtedme.

Jel'n' -raudtestancii radab lidnan päivlaskmas «Smolensk — Tul»-keskustal. «Safonovo — Počinok»-avtote ümbärdab lidnad päivlaskmaspäi.

Tobmuz

Kaik kümne küläd mülüdas lidnankundha Jel'nän ližaks. Lidnankundan pind — 86 km².

Lidnankundan tobmuden pämez' om sen Nevondkundan ezimez'. Edeline lidnan pämez' om Irina Bogačeva (viluku 2019 — reduku 2020).

Eläjad

Vl 1939 lidnan ristitišt oli 7 132 eläjad. Vn 2010 Venäman rahvahanlugemižen mödhe lidnan eläjiden lugu oli 9 900 ristitud, rajonan seičeme kümnendest, vn 2021 lidnan — 8 332 ristitud. Kaik 9 168 ristitud elihe lidnas i 9 419 ristitud kaikes lidnankundas vl 2017. Kaikiš suremb lidnan ristitišt oli 11 600 eläjad vll 1998.

Rahvahad (enamba 0,4 % vl 2021): venälaižed — 93,0 %, ukrainalaižed — 1,1 %, totarlaižed — 0,7 %, vaugedvenälaižed — 0,6 %, tadžikalaižed — 0,6 %, armenijalaižed — 0,4 %, toižed rahvahad — 3,0 %, rahvahuden ozutandata — 0,6 %.

Ortodoksižen hristanuskondan nell' pühäpertid^[1] oma letud lidnas: ph. Illä-endustajan jumalanpert', Jumalanmaman «Pölištunuziden aznoičend»-jumalaižen jumalanpert' (om sauvomas), kaks' časounäd. Niiden ližaks Spasan Toižetamižen päjumalanpert' i Hristan Eläbzdusen jumalanpert' ei ole kaičenus.

Lapsiden opendusen aluzkundad oma koume nimitadud päivkodid, koume keskškolad (nomer 1, 2, 3), rajonan lapsiden sädamižen keskuz, muzikškol, sportškol. Kozlovkan äiprofil'ne agrarine kolledž (Roslavlin rajonan Kozlovk-külä), sen Jel'nän profopenduzkeskuz^[2] (edel vn 2015 sügüz'kud Jel'nän maižanduztehnikum^[3]) om lidnan professionaližen opendusen aluzkundaks.

Galerei

Desn-jogi Jel'näs (2008)
Ph. Illä-endustajan jumalanpert', vn 2008 nägu
Kutuzovan lidnanlapt vl 2004
Kul'turkeskuz i Mihail Glinka-muzikankirjutajan muštnik (2004)
Jel'n' -raudtestancii vl 2008

Homaičendad

Irdkosketused

Lidnankundan oficialine sait elnya-gp.admin-smolensk.ru-saital. (ven.)

Jel'n' Vikiaitas

	Smolenskan agjan lidnad
	Demidov \| Desnogorsk \| Dorogobuž \| Duhovščin \| Gagarin \| Jarcevo \| Jel'n' \| Počinok \| Roslavl' \| Rudn' \| Safonovo \| Sičovk \| Smolensk \| Veliž \| Väz'm

[1] Jel'nän pühäpertid sobory.ru-saital. (ven.)

[2] Jel'nän profopenduzkeskuz Kozlovkan äiprofil'žen agrarižen kolledžan km-ak.ru-saital. (ven.)

[3] Jel'nän maižanduztehnikuman sait (elnsht.narod.ru). (ven.)

[1]

[2]

[3]