Počinok (lidn)

Počinok
Починок

Valdkund	Venäma
Eläjiden lugu (2024)	7,351 ristitud
Pind	7 km²
Pämez'	Irina Romanenkova (sügüz'ku 2020—)
Telefonkod	+7−48 149-xx-xxx
Avtokod	67
Aigvö	UTC+3 (MSK+0)

Počinok (ven.: Почи́нок) om Venäman lidn da lidnankund Smolenskan agjan suvipalas. Se om Počinokan rajonan administrativine keskuz.

Istorii

Eländpunkt mainitaškanzihe vl 1811 kuti pen' külä. Šingotaškanzi raudtestancijal vspäi 1868 i torguindal tukuil (vill', mec, pölvaz). Vl 1926 sai lidnan statusad, vll 1929−1941 oli rajonan keskuseks. Toižen mail'man sodan aigan lidn oli okkupiruidud (17. heinku 1941 — 23. sügüz'ku 1943).

Počinok šingotase sauvondmaterialiden pästandal, sömtegimištol (voitegim, lihan ümbriradmižen edheotand, kombisötken tegim) i omblendfabrikal (galanterei).

Geografijan andmused

Lidnankundan sijaduz rajonas i agjas vn 2021 kartal

Lidn sijadase rajonan keskuzpalan päivlaskmas, Hmar-jogen oiktal randpolel (ven.: Хмара 82 km pitte, Dnepran hurapol'ne bassein), 205 m ü.m.t. keskmäižel korktusel.

Matkad Smolenskhasai om vižkümne kilometrad lodeheze orhal, 55 km avtotel vai raudtel. Toižed lähembaižed lidnad oma Jel'n' 52 km päivnouzmha-pohjoižpäivnouzmha orhal, 56 km avtotedme vai 130 km raudtedme, Roslavl' 58 km suvhe-suvipäivnouzmha orhal, 65 km avtotedme vai raudtedme, i Mstislavl' (Vaugedvenäma) 63 km suvipäivlaskmha orhal vai 72 km avtotedme.

Počinok-raudtestancii radab lidnan keskuses «Smolensk — Roslavl'»-keskustal. «Smolensk — Bränsk»-avtote mäneb koumes kilometras päivlaskmha lidnaspäi, ühtenzoitase lidnanke kahtel sarakol.

Tobmuz

Počinok om lidnankundan üks'jäižeks eländpunktaks.

Lidnankundan pämez' om sen nevondkundan ezimez'. Edeline lidnan pämez' om Svetlana Petrovskaja (sügüz'ku 2015 — sügüz'ku 2020). Lidnan Administracii om likvidiruidud vn 2013 vilukus, rajonan administracii tegeb sen velgusidme.

Eläjad

Vl 1939 lidnan ristitišt oli 3 182 eläjad. Vn 2010 Venäman rahvahanlugemižen mödhe lidnan eläjiden lugu oli 9 000 ristituid, rajonan koume kümnendest, vn 2021 — 7 575 ristitud. Kaik 8 688 eläjad oli lidnas vl 2017. Kaikiš suremb lidnan ristitišt oli 10..11 tuhad eläjid vll 1979−2001 (11 100 rist. vl 1996).

Rahvahad (enamba 0,4 % vl 2021): venälaižed — 94,4 %, ukrainalaižed — 0,5 %, armenijalaižed — 0,4 %, vaugedvenälaižed — 0,4 %, toižed rahvahad — 2,2 %, rahvahuden ozutandata — 2,1 %.

Ortodoksižen hristanuskondan Jumalanmaman Blagoveššenjan jumalanpert' om saudud lidnas vll 1990−1999. Baptizman loičendpert' om avaitud mugažo.

Lapsiden opendusen aluzkundad oma nell' nomeruidud päivkodid (nomer 1, 2, 4, 6), kaks' keskškolad (nomer 1 i 2), čomamahtoiden škol, sportškol A.I. Maksimenkovan nimed. Kozlovkan äiprofil'ne agrarine kolledž (Roslavlin rajonan Kozlovk-külä), sen Počinokan profopenduzkeskuz (edel vn 2015 redukud Počinokan industrialiž-tehnologine tehnikum) om lidnan professionaližen opendusen aluzkundaks.

Galerei

• 
  Kodirandantedištandmuzei (2021)
• 
  Jumalanmaman Blagoveššenjan jumalanpert', vn 2021 nägu
• 
  ZAGS:an sauvuz vl 2021
• 
  Kul'turkeskuz (2021)
• 
  Počinok-raudtestancii vl 2021

Irdkosketused

• Lidnankundan Ezitajiden nevondkundan oficialine sait (sovet-pochgrad.admin-smolensk.ru). (ven.)
• Rajonan tobmuden aluzkundoiden oficialine sait (pochinok.admin-smolensk.ru). (ven.)