Spas-Demensk

Spas-Demensk
Спас-Деменск

Lidnanznam	Flag
Valdkund	Venäma
Eläjiden lugu (2025)	4,558 ristitud
Pind	6 km²
Pämez'	Mihail Nečajev (reduku 2015—)
Telefonkod	+7−48 455-xx-xxx
Avtokod	40
Aigvö	UTC+3 (MSK+0)

Spas-Demensk-raudtestancii vl 2014

Spas-Demensk (ven.: Спас-Де́менск) om Venäman lidn da lidnankund Kalugan agjan päivlaskmas. Se om agjan kaikiš päivlaskmaižemb lidn, Spas-Demenskan rajonan administrativine keskuz.

Istorii

Eländpunkt mainitase ezmäižen kerdan Suren Litvanman ruhtinazkundan aigkirjas vl 1446 kuti Demen-volost' (ven.: волость Демена). Vl 1818 ortodoksižen hristanuskondan Spasan Toižetamižen kivine jumalanpert' om saudud, i nimitaškanzihe žilod Spas-Demenskoje:ks. Vl 1855 kätihe sijaižeks. Vspäi 1917 om lidnan oficialiženke statusanke, makundan keskuz vn 1921 keväz'kuspäi. Toižen mail'man sodan aigan lidn oli okkupiruidud nacistižen Germanijan sodavägil (4. reduku 1941 — 13. eloku 1943).

Spas-Demensk šingotase omblendfabrikal, sömtegimištol (argvoin i saguden tegim, konditerine fabrik), mechozal, šebnän da letken samižel.

Geografijan andmused

Spas-Demenskan rajonan sijaduz agjas vn 2012 kartal

Lidn sijadase rajonan keskuzpalas, Bolv-jogen üläjoksmusen hural randpolel (ven.: Болва 213 km pitte, Desnan hura ližajogi), 225 m ü.m.t. keskmäižel korktusel.

Matkad Smolenskan agjhasai om kaks'kümne kilometrad päivlaskmha i pohjoižhe, Kalughasai om 144 km päivnouzmha orhal, 180 km avtotel vai 190 km raudtel. Lähembaižed lidnad oma Mosal'sk 62 km päivnouzmha orhal vai 94 km avtotedme, i Kirov 42 km suvipäivnouzmha-suvhe orhal, 69 km avtotedme vai 60 km raudtedme. Spas-Demensk-stancii radab lidnan keskuzpalan pohjoižes vspäi 1899, «Suhiniči — Smolensk»-raudtel.

Tobmuz

Spas-Demensk om lidnankundan üks'jäižeks eländpunktaks. Lidnankundan pind — 13,69 km².

Lidnankundan tobmuden pämez' om sen Duman ezimez'. Lidnan Dum om reorganizacijan pordhal vn 2025 kül'mkuspäi rajonan toižetamižen tagut ümbrikoks. Edeline Duman ezimez' om Viktor Jermačenkov, radoi vn 2006 vilukuspäi. Lidnankundan Administracii om reorganizacijan pordhal mugažo, vn 2025 redukuspäi. Lidnan Administracijan pämez' om Sergei Smirnov vn 2016 uhokuspäi. Edeline Administracijan pämez' om Valerii Brilliantov, radoi vn 2015 tal'vkuhusai.

Eläjad

Vl 1939 lidnan ristitišt oli 4 232 eläjad. Vn 2010 Venäman rahvahanlugemižen mödhe lidnan eläjiden lugu oli 4 896 ristitud, rajonan koume videndest, vn 2021 — 4 569 ristitud. Kaik 4 357 eläjad oli lidnas vl 2017. Kaikiš suremb lidnan ristitišt oli 7 119 eläjad vl 1970.

Rahvahad (ozutadud rahvahudenke vl 2010): venälaižed — 94,5 %, toižed rahvahad — 5,5 %.

Rahvahad (enamba 0,4 % vl 2021): venälaižed — 89,8 %, tadžikalaižed — 2,2 %, armenijalaižed — 0,6 %, vaugedvenälaižed — 0,4 %, ukrainalaižed — 0,4 %, uzbekad — 0,4 %, čiganalaižed — 0,4 %, toižed rahvahad — 2,4 %, rahvahuden ozutandata — 3,4 %.

Ortodoksižen hristanuskondan kaks' pühäpertid oma saudud lidnas: Sündun Toižetamižen jumalanpert' (1818) i časounäd ruinad lidnan kaumžomal.

Openduz

Lapsiden opendusen aluzkundad oma Räbinka-päivkodi («Pihlüt»), kaks' keskškolad (nomer 1 i 2), kul'turižozutelendkeskuz, čomamahtoiden škol, sportškol.

Lähembaine professionaližen opendusen aluzkund radab Kirov-lidnas.

Irdkosketused

• Spas-Demenskan municipaližen ümbrikon tobmuden sait (spasdemensk.gosuslugi.ru). (ven.)