Sosenskii

Sosenskii
Сосенский
Lidnanznam;	Flag;
Valdkund	Venäma
Eläjiden lugu (2023)	11,259 ristitud
Pind	4 km²
Pämez'	Natalija Šaihulina; (reduku 2020—)
Telefonkod	+7−48 442-xx-xxx
Avtokod	40
Aigvö	UTC+3 (MSK+0)

Sosenskii (ven.: Со́сенский) om Venäman lidn da lidnankund Kalugan agjan päivnouzmas. Se om Kozel'skan rajonan kahtenz' surtte lidn kahtespäi.

Istorii

Eländpunktan aluz om pandud vl 1952 kuti kaivuzžilo otmaha kävutamižhe buran hilen basseinad. Registriruihe Sosnovskii-žilod oficialižikš vl 1954, taritihe toižid-ki nimitusid (Oktäbr'skii, Leninskii, Šepelevskii). Saihe kaiked kebnad hil't 1980-nzil vozil, no šingotez jätktsihe sodategimištol. Vn 1991 tal'vkun 16. päiväspäi om lidnan statusanke.

Sosenskii šingotase ladimensauvomižen tegimel^[1], specialiždetaliden valamižtegimel, sauvondmaterialiden pästandal (pezatäudui), mugažo üks' edheotand tegeb sädatust, sobid i avtoid specialižiden radnikoičendoiden täht.

Geografijan andmused

Lidn sijadase rajonan päivnouzmas, sijaližel ülüdel, 220 m ü.m.t. keskmäižel korktusel.

Matkad Kalughasai om 60 km pohjoižpäivnouzmha-pohjoižhe orhal vai 80 km avtotel. Lähembaižed lidnad oma Kozel'sk-rajonkeskuz 12 km päivlaskmha orhal vai avtotedme, i Čekalin (Tulan agj) 19 km päivnouzmha orhal vai 69 km avtotedme. Lähembaine raudtestancii om Šepelevo «Suhiniči — Tul»-keskustal, vides kilometras suvipäivnouzmha lidnaspäi avtotedme.

Tobmuz

Šepelevo-raudtestancii (83 rist. vl 2010) i kaks' küläd mülüdas lidnankundha Sosenskijan ližaks. Lidnankundan pind — 4,12 km².

Lidnankundan tobmuden pämez' om sen Duman ezimez'. Edeline lidnankundan pämez' (Duman ezimez') om Lidija Naidük (heinku 2010 — reduku 2020). Lidnan Administracijan pämez' om Margarita Kavočkina vn 2019 keväz'kuspäi. Edeline lidnan Administracijan pämez' om Svetlana Volodčenko (semendku 2016 — keväz'ku 2019).

Eläjad

Vl 1959 lidnan ristitišt oli 7 034 eläjad. Vn 2010 Venäman rahvahanlugemižen mödhe lidnan eläjiden lugu oli 12 392 ristitud, rajonan koume kümnendest, vn 2021 — 11 413 ristitud. Kaik 11 047 eläjad oli lidnas vl 2017. Kaikiš suremb lidnan ristitišt oli 14 700 eläjad vll 1998−2000.

Rahvahad (2010): venälaižed — 94,7 %, ukrainalaižed — 1,9 %, armenijalaižed — 1,3 %, toižed rahvahad — 2,1 %.

Ortodoksižen hristanuskondan ph. Serafim Sarovalaižen jumalanpert'^[2] om saudud i avaitud lidnas vspäi 2002.

Lapsiden opendusen aluzkundad oma koume päivkodid, kaks' keskškolad (nomer 1, 2), muzikškol, lapsiden sädamižen keskuz, lapsiden da norišton sportškol. Sosenskijan politehnine tehnikum^[3] om lidnan professionaližen opendusen aluzkundaks.

Homaičendad

Irdkosketused

Lidnan tobmuden aluzkundoiden sait (sosenskij-r40.gosweb.gosuslugi.ru). (ven.)

Sosenskii Vikiaitas

	Kalugan agjan lidnad
	Balabanovo \| Belousovo \| Borovsk \| Jermolino \| Juhnov \| Kalug \| Kirov \| Kondrovo \| Kozel'sk \| Kremönki \| Lüdinovo \| Malojaroslavec \| Medin' \| Meščovsk \| Mosal'sk \| Obninsk \| Sosenskii \| Spas-Demensk \| Suhiniči \| Žizdr \| Žukov \| Tarus

[1] Sosenskijan ladimensauvomižen tegimen sait (spzavod.ru). (ven.)

[2] Sosenskii-lidnan ph. Serafim Sarovalaižen jumalanpert' sobory.ru-saital. (ven.)

[3] Sosenskijan politehnižen tehnikuman sait (sptt.kaluga.eduru.ru). (ven.)

[1]

[2]

[3]