Jermolino (Kalugan agj)

Jermolino
Ермолино

Lidnanznam	Flag
Valdkund	Venäma
Eläjiden lugu (2023)	11,189 ristitud
Pind	7,24 km²
Telefonkod	+7−48 438-xx-xxx
Avtokod	40
Aigvö	UTC+3 (MSK+0)

Jermolino (ven.: Ермо́лино) om Venäman lidn da lidnankund Kalugan agjan pohjoižpäivnouzmas. Se om Borovskan rajonan kaikiš penemb lidn koumespäi, Obninskan pohjoine ezilidn.

Istorii

Eländpunkt mainitase ezmäižen kerdan Boris Godunovan kirjeižes vn 1601 kezakul kut valdkundaline Jermakovo (Jermolino)-žilut (ven.: сельцо Ермолино), sid' kut külä. Šingotihe kaugedraudan tehmižel 18. voz'sadal i tekstil'fabrikal vspäi 1880. Toižen mail'man sodan aigan žilo oli okkupiruidud nacistižen Germanijan sodavägil (20. reduku 1941 — 3. viluku 1942). Vspäi 2008 om lidnan statusanke.

Jermolino šingotase puvillkanghankombinatal, optižen kabelän tegimel, sömtegimištol (lihapol'fabrikatad) i lidnan jarmankal. Jermolino-sodalendimport radab lidnas. Ühtennimine söndtavaroiden Produkti Jermolino-torguindverk («Söndtavarad Jermolino») om tetab Venäman regionoiden enambuses.

Geografijan andmused

Borovskan rajonan sijaduz agjas vn 2012 kartal

Lidn sijadase rajonan päivnouzmaižes palas, Protv-jogen molembil randoil (ven.: Протва́ 282 km pitte, Okan hura ližajogi), 150 m ü.m.t. keskmäižel korktusel.

Matkad Moskvan agjhasai om seičeme kilometrad pohjoižhe orhal. Matkad Kalughasai om 79 km suvhe orhal vai 95 km avtotel. Lähembaižed lidnad oma Borovsk-rajonkeskuz nelläs kilometras päivlaskmha orhal vai avtotedme, Balabanovo (raudtestancii) koumes kilometras päivnouzmha orhal vai kuz' kilometrad avtotedme, i Obninsk kudes kilometras suvhe orhal vai 10 km avtotedme. Sur' Moskvan avtorengaz (A-108) läbitab Jermolinon pohjošt.

Tobmuz

Jermolino om lidnankundan üks'jäižeks eländpunktaks. Lidnankundan pind — 7,24 km².

Lidnankundan tobmuden pämez' oli sen Duman ezimez' edel Borovskan rajonan toižetamišt ümbrikoks vn 2025 kül'mkuspäi. Enččen lidnan Duman ezimehed oliba Jelena Samokrutova (kezaku 2021 — kül'mku 2025), Lüdmila Fedotova (sulaku 2017 — kezaku 2021), Vladimir Bodrov (radoi vn 2017 sulakuhusai). Lidnan Administracijan pämez' om Jevgenii Gurov vn 2017 tal'vkuspäi. Edeližed Administracijan pämehed oma Oleg Zapol'skii (tal'vku 2015 — tal'vku 2017), Natal'ja Gusakovskaja (oli radnikusel vn 2015 tal'vkuhusai).

Eläjad

Vl 1939 žilon ristitišt oli 5 833 eläjad. Vn 2010 Venäman rahvahanlugemižen mödhe lidnan eläjiden lugu oli 10 409 ristitud, rajonan kudendez, vn 2021 — 10 809 ristitud. Kaik 10 158 eläjad oli lidnas vl 2017. Kaikiš suremb lidnan ristitišt oli 11 tuhad eläjid vll 2000−2001 i om nügüd'.

Rahvahad (ozutadud rahvahudenke vl 2010): venälaižed — 94,1 %, ukrainalaižed — 1,4 %, moldovalaižed — 1,2 %, toižed rahvahad — 3,3 %.

Ortodoksižen hristanuskondan nell' pühäpertid oma kaičenus i saudud lidnas: Jumalanmaman Kalugan jumalaižen pühäpert' (letihe vll 2003−2006), enččen Rusinovo-žilon ph. Mikulai-čudonsädajan jumalanpert' (kivine om saudud vl 1830, udessündutihe vspäi 2005) i kaks' časounäd.

Openduz

Lapsiden opendusen aluzkundad oma koume nimitadud i nomeruidud päivkodid (nomer 15, 17, 18), keskškol, čomamahtoiden škol, lapsiden da norišton fizižen vaumičendan klub.

Jermolinon tehnikum om lidnan professionaližen opendusen aluzkundaks.

Galerei

• 
  Lidnankundan tobmuden sauvuz (2019)
• 
  Ph. Mikulai-čudonsädajan jumalanpert' Rusinovos, nägu vn 2017 elokus
• 
  Jermolinon keskškol (2019)
• 
  Jermolinon tehnikum (2019)
• 
  Lidnan kul'turkeskuz (2019)
• 
  Avtotesild Protvas päliči vn 2019 heinkus

Irdkosketused

• Lidnan tobmuden aluzkundoiden sait (ermolino-r40.gosweb.gosuslugi.ru) i sen vanh versii (admermolino.ru), om täuttud vn 2024 redukuhusai. (ven.)