Suhiniči

Suhiniči
Сухиничи

Lidnanznam	Flag
Valdkund	Venäma
Eläjiden lugu (2023)	14,407 ristitud
Pind	12,52 km²
Pämez'	Tat'jana Kulabuhova (viluku 2012—)
Telefonkod	+7−48 451-xx-xxx
Avtokod	40
Aigvö	UTC+3 (MSK+0)

Lidnan transportkart (2021) jättud kesketi AZLK-avtotegimen sauvomižen sijadusenke

Suhiniči (ven.: Сухи́ничи) om Venäman lidn, lidnankund da raudtesol'm Kalugan agjan keskuzpalan suves. Se om Suhiničin rajonan administrativine keskuz da pala.

Istorii

Eländpunktan aluz om pandud 14. voz'sadal. Se mainitase nügüdläiženke nimitusenke ezmäižen kerdan vl 1444 Suren Litvanman ruhtinazkundan aigkirjas. Vspäi 1840 om lidnan statusanke, šingotihe torguindteil, vedihe mugoižid tavaroid kut razv, linkabe, linasine voi Volgan i Nämunasan basseinoihe. Tegihe torgust joga sobatan i pühäpäivän, oleskeli jarmankoid kahtišti vodes. Makundan i rajonan keskuz vspäi 1927. Toižen mail'man sodan aigan lidn oli okkupiruidud nacistižen Germanijan sodavägil (7. reduku 1941 — 29. viluku 1942). Sauvoškanzihe «AZLK»-tegimen filialad da sen mikrorajonad vl 1989 ühthekeradamha «Moskvič»-kebnavtoid vodele 1993, no tegimen sauvond jäi kesketi.

Suhiniči šingotase sömtegimištol (maidtegim, kuivateztegim), raudtetransportan edheotandoil, meblin edheotandal, omblendfabrikal, plastiktegesiden fabrikal i kombisötken pästandal.

Geografijan andmused

Suhiničin rajonan sijaduz agjas vn 2012 kartal

Lidn sijadase rajonan keskuzpalan päivnouzmas, Brin'-jogen hural randal tobjimalaz (ven.: Брынь 69 km pitte, Desnan hurapol'ne bassein), 200 m ü.m.t. keskmäižel korktusel. Vezivaradim om saudud ülezjogen ani päivnouzmha lidnaspäi.

Matkad Kalughasai om seičemekümne viž kilometrad pohjoižpäivnouzmha orhal, 98 km avtotel vai 104 km raudtel. Lähembaižed lidnad oma Kozel'sk 29 km päivnouzmha orhal, 31 km avtotedme vai raudtedme, i Meščovsk 25 km pohjoižhe vai 41 km avtotedme.

Suhiniči-Glavnije-raudtestancii radab lidnan suvipäivlaskmas vspäi 1899 «Kalug — Bränsk»-keskustal, i Suhiniči-Uzlovije-raudtestancii radab lidnan pohjoižes siš-žo vodespäi «Kalug — Bränsk»- i «Smolensk — Tul»-keskustoiden ühthižel tahol. «Moskv — Bränsk»-avtote (M3-trass) mäneb vides kilometras päivlaskmha lidnaspäi.

Tobmuz

Suhiniči om lidnankundan üks'jäižeks eländpunktaks. Lidnankundan pind — 12,52 km².

Lidnankundan tobmuden pämez' om sen Duman ezimez'. Tat'jana Kulabuhova radab Duman ezimehen vn 2012 vilukuspäi. Lidnan Dum om reorganizacijan pordhal vn 2025 redukuspäi rajonan toižetamižen ümbrikoks tagut. Lidnankundan Administracii om reorganizacijan pordhal, mugažo vn 2025 redukuspäi. Vladimir Aleksanov tegeb lidnan Administracijan pämehen velgusidme vn 2025 kül'mkuspäi. Andrei Golikov radoi Administracijan edeližen pämehen vn 2025 kül'mkuhusai.

Eläjad

Vl 1939 lidnan ristitišt oli 10 820 eläjad. Vn 2010 Venäman rahvahanlugemižen mödhe lidnan eläjiden lugu oli 16 273 ristitud, rajonan kaks' koumandest, vn 2021 — 14 806 ristitud. Kaik 15 111 eläjad oli lidnas vl 2017. Kaikiš suremb lidnan ristitišt oli 17..18 tuhad eläjid vll 1989−2001 (18 500 rist. vl 1996).

Rahvahad (ozutadud rahvahudenke vl 2010): venälaižed — 94,6 %, ukrainalaižed — 1,7 %, toižed rahvahad — 3,7 %.

Ortodoksižen hristanuskondan nell' pühäpertid oma saudud lidnas: koume jumalanpertid i časoun', niišpäi Jumalanmaman Kazanin jumalaižen pühäpert' (1914) om kaičenus vaiše paloin. Niiden ližaks phh. Afanasii i Kirill Aleksandrijalaižed-patriarhoiden jumalanpert' oli vll 1745−1933, poukahtihe.

Openduz

Lapsiden opendusen aluzkundad oma viž nimitadud i nomeruidud päivkodid (nomer 162, 190), viž keskškolad (nomer 1..4, 12), ližaopendusen keskuz (sportkompleksanke), čomamahtoiden škol.

Suhiničin transportan da servisan kolledž om lidnan professionaližen opendusen aluzkundaks.

Galerei

• 
  Lidnan i rajonan tobmuden sauvuz (2020)
• 
  Jumalanmaman Smolenskan jumalaižen pühäpert' (1770), vn 2008 nägu
• 
  AZLK-avtotegimen okaidud sauvused vl 2018 (zavottihe vl 1989)
• 
  Poliklinik vn 2021 uhokus
• 
  Suhiniči-Glavnije-päraudtestancii
• 
  Suhiniči-Uzlovije-stancii

Irdkosketused

• Suhiničin municipaližen ümbrikon tobmuden sait (suxinichi-r40.gosweb.gosuslugi.ru). (ven.)